Daily news
Фестивалот за современи уметности АКТО почнува утре во киното „Култура“
Фестивалот за современи уметности ќе започне утре со отворен штанд за продажба на независни музички изданија во холот на киното „Култура“. Идејата на овој музички саем е да се промовираат новата македонска музика и македонските артисти, со посебен акцент на трендот на издавање македонска музика на плочи.
В петок вечер, пак, од 20 часот програмата продолжува во киното „Култура“ под мотото „АКТО за заедниците“, а ќе се одржи едно своевидно истражувачко студио за храна, наука и уметност, во кое учесниците преку процесот на готвење храна ќе ја истражуваат поврзаноста помеѓу кулинарството, науката и ументноста или процесот од идеја до готово дело.
По готвењето, следува музичкиот дел, со диџеј-сетови на Мирко Попов, Флодер и Илина Ангел, кои ќе нè потсетат како излгледале журките во градот кога се пуштало музика на плочи пред ерата на дигитализација.
В сабота, на вториот фестивалски ден, програмата се сели во Железничката зграда на улицата Борка Талевски бр 26. Од пладне, па до 15 часот, ќе се одржи перформативно-истражувачки проект со наслов „Кога зградите би зборувале“, а ќе го проследи специјален настап на сајд-пректот на Фолтин, „Дејви Д’Боуви + Паднатите од Марс“, кој ќе започне во 13.30 часот. Бидејќи просторните услови во зградата налагаат настаните да ги проследи поограничен број луѓе, заинтересираните треба да се пријават на фејсбук-страницата „АКТО фестивал со порака“.
„Кога зградите би зборувале“ е уметнички перформативно-истражувачки процес на авторот Филип Јовановски, кој ја ангажира локалната заедница во креирањето на делото и создава поволен контекст за адресирање на прашањата за јавното и заедничкото наспроти приватните и конзервативните интереси на разни општествено-социолошки нивоа. Централна позиција во овој развоен, испитувачки и колаборативен проект има Железничката зграда во Скопје, културно наследство од 1946 година, со уникатни решенија за колективно домување во земјава, кое директно се соочува со непогодите на овие неколку децении.
Овој проект е во континуитет на мапирањето простори во Битола и Скопје, кои имаат потенцијал да се вратат во служба на јавно добро во фунцкија на културните настани и на граѓаните и притоа да се изнајде соодветен начин на нивно одржување и коуправување. Ова лето на изданието на АКТО во Битола се отвори прашањето за ревитализација на Офицерскиот дом и негово враќање во фунцкија на граѓаните и културата, а сега АКТО се сели во Скопје во обид да ги заживее просторите на Железничката зграда и веќе постојниот културен центар, киното „Култура“.
Фестивалот е поддржан од Министерство за култура на РМ, Фондација „Фридрих Еберт“ и Општина Центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.