Daily news
Ф4 Истанбул: Сите имаат еднакви шанси за титулата
ЦСКА, Олимпијакос, Фенербахче и Реал Мадрид имаат подеднакви шанси да освојат титула во кошаркарската Евролига. Завршниот турнир во Евролигата започнува в петок со двете полуфинални пресметки, а ќе се заврши в недела кога ќе се одигра натпреварот за третото место и големото финале.
Завршниот турнир во Евролигата ќе го отворат минатогодишниот финалист Фенербахче и шпанскиот првак Реал. Натпреварот ќе почне во 17:30 часот.
Фенербахче оваа сезона сака да стигне до самиот крај откако минатата сезона го загуби финалето од ЦСКА по продолжението и со поените на Виктор Хријапа постигнати во последната секунда.
Инаку, тренерот на Фенербахче, Жељко Обрадовиќ, токму во Истанбул со Партизан во 1992 година ја освои првата од осумтте титули европски првак. Обрадовиќ титулата европски првак ја има освојувано со четири различни екипи: Партизан, Хувентуд, Реал и Панатинаикос.
„Поискусни сме во однос на изминатите две сезони, особено од минатата кога игравме во финалето. Нема фаворити на овој турнир, секој има шанса. Реал има девет титули европски првак, ЦСКА седум, Олимпијакос три“, рекол Обрадовиќ.
Играта на Фенербахче во многу нешта зависи од Богдан Богдановиќ, кој игра одлична сезона поради што беше избран во идеалната петорка на Евролигата.
„Мораме да заборавиме на сè она што се случувало во минатото. Полуфиналето е специфично, на завршниот турнир чувството е многу поинакво. Мораме да бидеме фокусирани и да го покажеме на теренот она што го работевме во текот на сезоната“, рекол српскиот бек.
Пабло Ласо, предводникот на Реал, ќе се обиде да стигне до втората евро титула како тренер на „Кралскиот клуб“. Реал во Истанбул ќе се обиде да ја освои јубилејната десетта титула во клупската историја.
„Секој ваков турнир е приказна за себе. Од Фенербахче загубивме четири од последните пет натпревари, но тоа не значи ништо. Тоа е статистика, кого тоа го интересира. Полуфиналето е нов натпревар и размислувам само за тој меч“, рекол Ласо.
Во второто полуфинале, кое ќе почне во 20:30 часот, ќе играат бранителот на трофејот ЦСКА и грчки Олимпијакос.
„Сите говорат дека играме полуфинале, а за нас ова е како финале. По маратонската сезона, многу повреди и прилагоидувањата на новиот систем, сега дојде ред за завршниот турнир. Задоволни сме што дојдовме до шансата да го браниме трофејот. Имаме голема обврска кон клубот да дадеме сè од себе и да стигнеме до целта“, рекол Димитрис Итудис, тренерот на рускиот шампион.
Олимпијакос е екипа која во минатото победувала на значајни натпревари против ЦСКА, последен пат грчкиот тим славеше пред две години на завршниот турнир во Мадрид.
„Тој меч го имаме заборавено. Условите сега се многу поинакви, ЦСКА е европски првак, а ние по една година пауза се вративме на завршниот турнир. Од психолошки аспект, сега работите се многу поинакви“, рекол тренерот на Олимпијакос, Јанис Сфаропулос. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.