Daily news
Хороскопските знаци и среќата
Среќа е да ги препознаете вистинските можности и да ја искористите шансата. Многу нешта влијаат на среќата, а и астрологијата често влијае врз неа.
ОВЕН
Овните имаат младешки дух и знаат кога треба да “скокнат“ во студена вода и храбро да бидат први во нешта што водат до успех и среќа.
БИК
За да бидат среќни, на припадниците на овој знак им треба добра организација и можност постепено да го кројат својот пат без големи чекори. За нив на пример најголема среќа може да биде изградбата на преубав дворец од песок кој нема да го сруши ниту еден морски бран.
БЛИЗНАЦИ
За Близнаците несреќа е само ако им е здодевно, а среќа може да биде сѐ останато. Проекти, размена на идеи и посебни вештини и интерес на “големите“ за нив, ги прави среќни.
РАК
Раковите наоѓаат задоволство и среќа во спомените. Во нивното сеќавање секогаш остануваат луѓето кои им значат и кои биле дел од нивниот живот.
ЛАВ
Лавовите среќата ја наоѓаат во сјајот, гламурот и значајните моменти. Во овие нешта црпат енергија, а токму тие нешта ги прават среќни.
ДЕВИЦА
Среќни се кога знаат дека се потребни и неопходни некому. Среќни се кога им помагаат на другите луѓе, бидејќи нивна желба е да придонесат за подобар свет.
ТЕРЕЗИЈА
Терезиите својата среќа ја наоѓаат во балансот, општата хармонија и не сакаат никој да ги вознемирува. Веруваат дека секој има своја мисија која може да влијае на општата среќа или хаос.
СКОРПИЈА
Скорпиите среќата ја гледаат во победата. За нив животот претставува боречка арена и секоја ситуација во која се впуштаат е предизвик, целта им е победа со сила, вештина или љубов.
СТРЕЛЕЦ
Стрелецот се радува на мали нешта и среќата ја доживува како чиста, едноставна работа како што е насмевка на разминување, добра шега или вкусна храна. Среќа е да ги бодрат другите или другите да ги бодрат нив. Таа нивна спортска дисциплина е прилично заразна, и воопшто не е чудно што другите се чувствуваат среќно во нивно присуство.
ЈАРЕЦ
Тие својата најголема среќа наоѓаат во верноста кон другите. Многу често тие се среќни, а не се свесни за тоа. Јарците се вистински приврзаници на среќата, а кога прават некого среќен нивното срце е исполнето.
ВОДОЛИЈА
За Водолиите среќа е можноста да биде индивидуалец, односно можноста да ги прави работите на сопствен карактеристичен начин, без притисок од страна.
РИБИ
Рибите среќата ја наоѓаат во соништата и мистериите. Нивната среќа не е целосна ако нивниот живот нема поголема смисла, односно ако не можат да им помогнат на другите во неволја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.