Daily news
Хороскопски знаци кои се родени победници
Овен: роден за лидер
Овенот пред сè е храбар знак. Ентузијазмот и одлучноста се негови главни особини. Ако сакате нешто да биде завршено, дајте му го нему. Неговата продорност и проникливост го прават одличен шеф, директор кој секогаш е во некакво движење, а токму таа енергија им ја пренесува на сите во фирмата. Доследно ги исполнува ветувањата, но истото го очекува и од останатите. Мрази лаги, озборувања и предавство. Тој би бил одличен хирург, градежен инженер, војник, офицер, актер или најдобар комичар како што некогаш бил Чарли Чаплин. Тој е љубовник како познатиот Казанова или одличен политичар кој ќе успее во секоја своја замисла, па ако се најдете во близина на овој знак знајте дека нема бегање. Подгответе се за работа и дајте го и последниот атом сила кој го имате, бидејќи само така ќе успеете да победите, но и да освоите поени кај овој знак.
Стрелец: оптимист, аристократ
Владетел на овој знак е планетата Јупитер. Онаму каде се наоѓа оваа планета во нашата натална карта, таму лежи и нашата среќа. Овој знак токму како и неговата планета владетел претставува моќ, успех, уживање… Стрелците се препознатливи по нивниот млад дух, надворешната убавина, атлетската градба, но и постојаната насмевка на лицето, желбата за патување и добра храна. Стрелецот е отмен аристократ, понекогаш се претвора во нескротлив бунтовник, кој ги почитуваа традициите, но сепак го следи својот пат. Соработката со Стрелецот не е воопшто лесна, бидејќи понекогаш знае да биде многу арогантен и строг. Животните желби на овој знак се големи, но тој секогаш наоѓа начин да ги оствари. За овој хедонист не постои поголема казна од живот без задоволства и пари.
Јарец: деспот, авторитет
Јарецот се смета за еден од највлијателните знаци на зодијакот. Јарецот своите успеси ги должи на својата дисциплина, работа и стратегија, нешта кои ги користи при секоја работа. Тој е знак кој не се плаши од стресот или загубата на работното место, бидејќи знае дека тоа е местото кое природно му припаѓа. Неговиот авторитет е нешто со кое се раѓа и кое останува засекогаш главна црта во неговиот карактер. Јарецот е успешен доктор, хемичар, биолог, политичар, банкар, адвокат, композитор, пејач… Одличен пример за тоа е Елвис Присли роден токму во овој знак.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.