Daily news
Царовска: Општините може да го зголемат бројот на вработени во градинките
Општините ќе моѓе да го зголемат бројот на вработени во градинките и во предизборен период, доколку има потреба за дополнителни вработувања од итен и неодложен карактер. Министерство за труд и социјална политика по изборниот период ќе даде согласност за нив и тие ќе си бидат вклучени во градинките како негователи или воспитувачи согласно каков кадар ќе има потреба, изјави денеска министерката за труд и социјална политика Мила Царовска. Таа со заменик-министерот за култура, Владимир Лазовски присуствуваше на редовната седница на Советот на Самостојниот синдикат за образование, наука и култура (СОНК).
Посочи дека има потреба од поголем број кадар во градинките и додаде дека во изминатите 11 години е направен недостиг на кадар во градинките од повеќе од 2.000 луѓе, што, според неа, значи дека системски се уривала заштитата на деца во Македонија.
На средбата станало збор и за втората смена во градинките, дополнително усогласување со Колективниот договор или зголемувањето на платите на воспитувачите и негователите во градинките уште оваа година и истиот тренд да продолжи наредната година. „Во делот на втората смена во градинките сметаме дека голем дел од граѓаните ја имаат оваа потреба и ние како Влада одговорно се однесуваме кон потребите на граѓаните, рече Царовска.
Во врска со противењето на општина Карпош на воведувањето двосменско работење на градинките, рече дека многу е важно општините да ги слушаат своите граѓани. „Ако граѓаните на општина Карпош имаат потреба од втора смена градоначалникот треба да излезе во пресрет и да подготви по еден објект од градинките во таа општина за втора смена. Во општина Карпош се појавија родители кои имаат потреба и сметам дека тие таа волја и потреба ќе ја изразат со градоначалникот лично“, рече Царовска.
Претседателот на Самостојниот синдикат за образование, наука и култура (СОНК), Јаким Неделков вели дека предлогот на Владата за воведување втора смена во градинките е избрзан без оглед на тоа што сметаат дека е добра идеја. Упати апел до сите директори на градинките кои одлучиле да организираат втора смена, да не се ни обидуваат да го изменат работното време на воспитувачите и негователите, односно да го применуваат работното време како што било и досега пропишано со закон и колективен договор.
Исто така побара Министерството за труд и социјална политика да направи уште еден напор за минималната плата да помине по процедура така како што треба, на Економско-социјалниот совет да се разгледа можноста за утврдување на минималната плата со предлог кој е утврден и усогласување со платите во јавниот сектор по колективните договори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.