Daily news
Шун: За високото реноме на Охридско лето се знае и во Кина
Неверојатен спој со публиката на Охридско лето имаа кинеските музичари од камерниот оркестар ЕЛК, кои одржаа концерт синоќа во црквата „Света Софија“.
Громогласниот аплауз и бурните овации беа награда за нивниот извонреден настап. Насмеани лица заминуваа по едночасовниот концерт разменувајќи ги меѓу себе возбудата и позитивните коментари за она што го видоа и слушнаа на овој музички настан.
– Не е првпат со моите студенти да настапуваме во странство. Ни студентите не знаат како би реагирала публиката која не е од Кина затоа што, сепак, станува збор за специфична традиционална музика и традиционални инструменти. На крајот испадна дека поради аплаузот што го добивме од македонската публика, нашите земји воопшто не се далечни. Иако сме илјадници и илјадници километри физички оддалечени, сепак, ние сме толку блиски. Од друга страна, прекрасната организација на фестивалот Охридско лето им овозможи на студентите да свират многу опуштено и да се чувствуваат како дома – вели професорот Лиу Шун.
Кинеските студенти додека музицираа на своите инструменти, истовремено играа и со своите тела на подиумот покажувајќи дека го доживуваат ритамот.
– Овие не се какви било студенти, тие се професионалци затоа што ги свират своите инструменти од три-четиригодишна возраст, што значи дека најмладите од нив веќе имаат најмалку 10-годишно искуство и затоа систематски се научени да уживаат во ритамот и во она што го свират – додава Шун.
Кинеските учесници на Охридско лето приредија вистинско изненадување со македонските композиции „Македонско сирто“ и „Чамче“. Иако, според нивниот професор Шун, им било потешко да влезат во шема со македонската музика бидејќи не се научени на ваков ритам, сепак, тие со задоволство ги отсвиреа избраните дела.
Некои од студентите, како што појаснува професорот, до доаѓањето во Охрид немале претстава за високото реноме на Охридско лето, но Министерството за култура на Кина и професорите по музика биле добро запознаени со фестивалот.
– Бевме поканети од Охридско лето и од Министерството за култура на Република Македонија да одржиме концерт на фестивалот и ова беше извонредна шанса младите студенти од нашата земја да се дружат со младите студенти и идни професионалци од Македонија. Повеќето од нив можеби не слушнале за овој реномиран фестивал сѐ до настапот, но професорите, а исто така и нашето Министерство за култура, добро се запознаени со високото реноме на Охридско лето. Овој фестивал е точно во согласност со она што ние го промовираме во областа на културата во нашата земја – истакна професорот Лиу Шун.
Камерниот оркестар ЕЛК е еден од најквалитетните музички ансамбли и токму затоа е избран од страна на Министерството за култура на Кина да ја промовира кинеската култура во светот.
Copyright 2017 makfax. Сите права се задржани. Текстов не смее да се печати или емитува, во целина или во делови, без договор со makfax. Во спротивно makfax го задржува правото да го фактурира преземениот текст согласно својот ценовник и правил
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.