Daily news
Откриен 113 милиони години стар фосил на четириножна змија
Фосилот стар 113 милиони години од единствениот примерок на змија со четири нозе е откриен во Бразил и упатува на заклучокот дека предците на овие влекачи потекнуваат од копното а не од морето како што досега се веруваше, покажало истражувањето чии резултати се објавени во американскиот научен магазин Science.
Досега непознатиот вид наречен Tetrapodophis amplectus живеел во последниот и најдолг период од Мезозоикот. Изгледала како многубројните слични видови змии од сегашниот период, но имал многу подвижен ‘рбет, издолжена глава, крлушки по телото, закривени заби и флексибилна вилица која била неопходна за да се проголта што поголем плен. Единствено овој вид од денешните змии ги разликувале четирите мали нозе, кои според мислењето на научниците првенствено служеле за со нив да може да го грабне пленот, отколку за да го олесни движењето по копното. Нозете на пронајдениот фосил се долги само четири, односно седум милиметри.
Авторите на студијата утврдиле и дека Tetrapodophis amplectus нема долга опашка типична за водените рептили, како на пример алигаторите. Анализирајќи го пронајдениот фосил, научниците велат дека овој вид покажувал прилагодување на животот во земјаните премини а не во вода, што оди во прилог на претпоставката според којашто предците на змиите потекнуваат од копното. За ова прашање, инаку, се водат остри дискусии меѓу палеонтолозите, бидејќи многумина од нив сметат дека змиите потекнуваат од водените рептили.
Според сегашниот изглед, карактеристичната змиулеста форма на телото, односно долгото тело глава и отсуството на какви и да се екстремитети, можел да се развие меѓу претпоставените предци на змиите во менувањето на формата од најмалку 26 пати. Разнообразните форми на телата на древните змии, чии фосили се пронајдени во седименти коишто потекнуваа од периодот на Мезозоикот и Кенозоикот, не им овозможуваа на научниците да го постигнат консензусот, зошто тие еволуирале и како минале на овој начин на живот.
Николас Лонгрич, од британскиот универзитет Бат и неговите колеги со откритието на Tetrapodophis amplectus сметаат дека го пронашле можниот одговор на споменатите прашања, проучувајќи го фосилот кој потекнува од периодот Јура пронајден во Бразил.
Во студијата се истакнува дека во една приватна збирка научниците успеале да откријат остатоци од суштество коешто според сите свои карактеристики, голем број пршлени, издолжен череп и куса вилица, подвижна структура на ребра, наликува на денешните змии. Авторите на статијата наведуваат дека името Tetrapodophis amplectus го дале во чест на неговите необични карактеристики.
Фактот што ова суштество, за разлика од другите фосилни предци на змиите, има четири полноправни екстремитети, укажува дека ова животно можело слободно да се движи, потенцираат научниците. Тие, како што се претпоставува, немале функција само при движењето, туку и при ловот на пленот, односно за давење или при јадење на жртвата, па дури и единките од различен пол да се придржуваат за време на парењето.
Втората необична карактеристика на ова суштество е што тоа не живеело на површината на земјата или во крошните на дрвјата, туку во дупките коишто оваа древна змија самата ги прокопувал во почвата. И овој заклучок е спротивен од ставовите на некои палеонтолози, според кои змиите се потомци на морски влекачи, а не на копнени четириножни суштества.
Судејќи, пак, според закривените заби и флексибилната челуст, Tetrapodophis amplectus, се хранел со мали ‘рбетници, коишто, како и неговите современи потомци, ги голтал цели. Тоа би значело дека змиите првично биле месојади, а не инсектојад, како што сметаат некои зоолози.
Возраста на овие останки се проценуваа на меѓу 146 и 110 милиони години, поради карактерот на фосилите, што упатува на тоа дека станува збор за еден од најраните видови змии на планетата, вид кој се појавил на Земјата, како што сугерираат ДНК анализите, пред 150 милиони години. Покрај тоа, компаративната анатомска анализа сугерира дека Tetrapodophis amplectus може да се смета и за предок на сите змии, или за нивен најблизок роднина, заклучуваат авторите на студијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.