Економија
Макроекономската политика за економски раст и подобар животен стандард: Да се привлече странскиот капитал
Клучно за макроекономската политика во земјата, за економски раст и подобар животен стандард, е да се привлекуваат странските инвестиции, како и капитал и штедењето, рече гувернерот на Народната банка (НБРМ), Димитар Богов, кој во петокот учествуваше на конференцијата „Перспективи 2016“ во организација на бизнис магазинот Економија и бизнис.
„Трендот на најсилните европски држави во однос на штедењето е дека каматите ќе паѓаат и тука ни е шансата да го привлечеме тој капитал од Европа за да може да се кредитираат домашните фирми. Работната сила и населението во иднина ќе се намалуваат и треба да се почне со обука на кадри за сегашните трендови како ИТ технологијата и програмирањето. Компаниите да почнат да се стимулираат да извезуваат, а такви сé уште се во мал број во Македонија, и тие да бидат моторот на Македонија“, порача гувернерот Богов.
Во однос на тоа како да се финансира економскиот раст, тој напомена дека сега најголемиот товар е на банките и оти е потребно да се вклучи и пазарот на капитал – хартии од вредност.
На крајот Богов истакна дека е потребно вложување во истражувањето со цел полесно да им се помогне на домашните фирми на странскиот пазар. Во Македонија има вишок ликвидност и се подобруваат условите за кредитирање.
Според Марјан Петрески професор на Универзитетот Американ колеџ Скопје, треба техничкиот јаз да се затвори и домашните фирми да се доближат до странските фирми, односно македонски фирми да станат снабдувачи на странските.
Притоа потенцираше дека финансиските средства кои како дознаки доаѓаат од странство, кои се движат од 400 милиони до милијарда долари, треба да се искористат подобро и да се започне со издавање обврзници со овие пари .Според Петрески, фирмите треба да бидат потранспарентни, бидејќи во Македонија уште доминираат фирми со ограничена дејност, ткн ДООЕЛ. Истакна дека и Џини коефициентот за 2008 за Македонија бил 44 отсто, за во 2013/2014 да падне на 38 проценти. Нееднаквиста, според него, се намалила од 1990-те години./крај/мф/ип
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.