МАКФАКС

Доделени наградите на Cinedays: „Златна ѕвезда“ за филмот „Влажност“

Доделени наградите на Cinedays: „Златна ѕвезда“ за филмот „Влажност“
20.11.2016, 11:06

Жирито во состав Чедомир Колар, еден од извонредните продуценти во холивудската индустрија и претседател на жирито, Зринко Огреста, сценарист и режисер, професор по филмска режија на Академијата за драмски уметности во Загреб и член на Европската Филмска Академија во Берлин и македонскиот режисер Игор Иванов – Изи во сабота вечер ги соопштија наградите во официјалната конкуренција.

Најдобар филм и „Златна ѕвезда“ за филмот- „Влажност“
Наградата за најдобар филм ја добива „Влажност“ во режија на Никола Љуца, затоа што со оригинален филмски јазик успева да ја разобличи современата брачна заедница, прикажувајќи ги апсурдот и хопокризијата со кои се соочени денешните генерации, во обидите да ги оддржат традиционалната форма и вредности.

Најдобра режија – Атила Тил
Наградата за најдобра режија ја добива филмот „Убијци на тркала“ во режија на Атила Тил, затоа што преку жанровски обоена фикција ја одсликува социјалната реалност на една маргинализирана група, нурнувајќи длабоко во мотивите, фрустациите, немоќта и надежите на хендикепираните лица.

Најдобро сценарио – Марен Аде
Наградата за најдобро сценарио ја добива филмот „Тони Ердман“ по сценарио и режија на Марен Аде, поради сугестивниот и силен, а воедно и духовит приказ на современото општество во кое таканаречените лажни вредности ја гушат секоја човечност, заканувајќи се да го разорат она што е суштинско и темелно- семејството.

Категорија СинеБалкан:

За најдобар филм во оваа категорија е прогласен филмот „Не ми зјапај во чинијата“ на Хана Јусиќ.

„Кога си губитник, биди губитник до крај. Оваа реченица совршено ја опишува хероината на овој филм. Нејзината фамилија, како и градот во кој живее се опасно заразни, но недоволни за таа да замине. Единственото нешто што таа го поседува е нејзиното тело и слободата да прави што сака со него. Нејзиното тело е материјализиран крик.“Ne gledaj mi u pijat” е токму тоа, мачен и осамен крик“, се вели во образложението на жирито во состав, Если Ердем, продуцент од Турција, словенечката актерка Нина Раковец и словенечкиот режисер Дамир Чучиќ.

И годинава селектор на филмовите во официјалната селекција и во категоријата „Синебалкан“ беше Бернд Будер,

Доделена е награда и за најдобар филм во категоријата Студентска програма. Наградата ја добива Сандра Јовановска за филмот „Страшилото крст“. Таа е студент на Академија за уметност, Универзитет во Нова Горица.

Жирито во состав, Влатко Галевски, Илина Јакимовска и Виолета Караџовска – Стојанова ги прогласи најдобрите на конкурсот за Филмска критика. Првата награда ја доби Фросина Крушкаровска, втората награда е за Владимир Лазороски, а третата награда оди во рацете на Вероника Камчевска. /крај/со/ст

Поврзани написи

Макфакс е-билтен

Email *