Македонија
Тачи на конвенција во Тетово го претстави претседателскиот кандидат и листите за пратеници
Дводомен парламент, официјална употреба на албанскиот јазик, пропорционална застапеност и правична распределба на буџетот се главните адути на лидерот на ДПА, Мендух Тачи, кој на конвенцијата на партијата која се одржа во неделата во Тетово на своите симпатизери им порача да му помогнат овој пат да ги реализира своите цели.
Конвенцијата се одржа во сала на Гимназијата „Кирил Пејчиновиќ” во Тетово каде пред присутните лидерот на ДПА, го претстави претседателскиот кандидат од редовите на партијата, Илјаз Халими, како и листите за пратеници во пет изборни единици и нивните носители.
Носител на листата на ДПА во првата Изборна единица е Беким Фазлиу, во втората Орхан Ибраими, Хабиб Максути во третата, носител на листата во петтата Изборна единица од редовите на ДПА е Зија Јонузи и во шестата Изборна единица носител на листата е Мендух Тачи, како и двајца кандидати од дијаспората, Шпенд Саити за Европа и Ферки Бекташи од Америка.
Тачи од присутните во салата ја побара поддршката и за претседателските и за предвремените парламентарни избори.
„Гласајте за нас бидејќи го заслужуваме мандатот и исполнете ми го сонот Илјаз Халими да добие 300 илјади гласови. Состојбата е тешка и затоа ни треба вашиот максимален ангажман ДПА да биде дел од Владата и за 18 месеци да се реши проблемот со евроатланските интеграции”, истакна Тачи.
За време на конвенцијата Тачи се осврна и на своите политички ривали од албанскиот блок, ДУИ, за кои како што како што истакна не дале ниту еден цент за Албанците.
„ДУИ извршија кражба со Цар Душан, со Бурманли џамија која стана канцеларија на српски офицери. Не дадоа ниту еден цент за Албанците, а оние кои учествуваа во конфликтот во 2001 година ги уапсија и ги убија како што е случајот со Харун Алиу. Минатата година за локалните избори СДСМ и ВМРО – ДПМНЕ заедно им помогнаа на ДУИ да не победат во Тетово, а сега тие треба да им овозможат цензус за претседателските избори и за Иванов”, истакна Тачи.
На присутните во салата им се обрати и кандидатот за претседател Илјаз Халими.
„Поддршката на мојата кандидатура зависи од вашите гласови. Мојата цел е Албанците да ги направиме одлучувачки во државата. Овој момент треба да се искористи. Ве повикувам да ги обединиме гласовите, како што тоа го направивме за локалните избори во Кичево и Струга. Настојувавме да бидеме обединети, да дејствуваме заедно со ДУИ, но од таму како да возвраќаа со `глуво уво`”, нагласи Халими./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: Земјотресот почна, се надевам дека на 8 мај ќе дојде промената ДУИ да биде опозиција
Масовниот одѕив на гласачите на овие претседателски избори за Арбен Таравари, претседателски кандидат на коалицијата ВЛЕН, е показател дека промените се почнати. На првата прес-конференција по затворањето на избирачките места тој рече дека очекува победа на 8 мај.
„Земјотресот по се изгледа дека денеска почна со масовното учество на граѓаните во изборите, а се надевам дека на 8 мај ВЛЕН ќе победи и ќе дојде долго очекуваната промена ДУИ да биде во опозиција“, рече Таравари.
Тој јавно се заблагодари на граѓаните за масовниот одѕив и изрази надеж дека набљудувачите нема да дозволат злоупотреби на гласовите.
„Сега веќе се знае дека на овие избори имаше многу помасовно излегување на гласање отколку претходните избори што зборува дека промените ни се приближуваат и ни доаѓаат. Ние како ВЛЕН сме пресреќни дека добивме гласови генерално од Албанците. Сега веќе промените се внатре во кутиите кои веќе се отвораат. Се надевам дека нашите набљудувачи ќе ги контролираат и нема да дозволат да има злоупотреби и ќе се гарантира секој глас кој што е даден на демократски начин дека ќе излезе на површина“, рече Таравари.
Македонија
Кузеска: Констатирани се мали прекршувања на изборниот процес, ги очекуваме резултатите и уверени сме дека граѓаните ќе ја поддржат европската иднина
Богданка Кузеска од Изборниот штаб на СДСМ, по затворањето на избирачките места изјави дека изборниот ден бил демократски, а гласањето се одвивало во фер и демократска атмосфера.
„Граѓаните својата волја ја изразија слободно и достоинствено како што доликува на една демократска земја – членка на НАТО со започнати преговори со ЕУ. Констатирани се само неколку многу мали прекршувања на изборниот процес. Сакаме да изразиме благодарност до сите граѓани кои денеска гласаа. Самото гласање е суштински чин кој произлегува од моќта на граѓаните да одлучуваат за својата иднина и иднината на државата. Ги очекуваме изборните резултати и уверени сме дека граѓаните и денеска и на 8 мај ќе ја поддржат европската иднина за Македонија. Иднина во која Македонија е дел од европското семејство и членка на ЕУ“, порача Кузеска.
Повтори дека ги очекуваат изборните резултати и наскоро ќе излезат со точни податоци.
Македонија
Евидентирани 12 случаи на фотографирање гласачко ливче, шест пријави за нудење поткуп и 15 пријави за агитирање, соопшти Тошковски
Според министерот за внатрешни работи Панче Тошковски денешниот изборен ден поминал во безбедна, мирна и демократска атмосфера.
Како што рече, безбедните избори биле резултат на добрата соработка меѓу полицијата, Државната изборна комисија и сите други чинители кои биле вклучени во спроведувањето на изборниот процес
„Овие избори беа уште еден тест за демократијата и во таа насока сакам да им честитам на граѓаните кои излегоа на гласање и ја исполнија својата граѓанска должност и со тоа уште еднаш го истакнаа демократскиот капацитет на државата и значењето на нивната активна улога во градењето на инклузивно општество“, кажа Тошковски.
Истакна дека биле евидентирани повеќе настани кои се однесуваат на прекршување на изборниот процес.
„На ниво на целата држава евидентирани се 12 случаи на фотографирање на гласачкото ливче, два случаи на кинење на гласачко ливче, шест пријави за нудење на поткуп и 15 пријави за агитирање. На подрачје на СВР Скопје во врска со пријавата за испукана димна бомба од страна на тимот за антитероризам извршена е проверка , подигната е направата и предадена е на претседателот на избирачкиот одбор. Констатирани се шест прекршоци, а ќе бидат поднесени и две кривични пријави, една за повреда на тајност на гласањето и една за повреда на избирачко право“, потенцира Тошковски.
Во Охрид било пријавено јавно гласање пред комисијата а во Тетово биле пријавени упатени навреди кон шеф на штаб на политичка партија.
Во Куманово како што додаде, две гласачки места во село Умин Дол биле затворени а избирачкиот материјал бил вратен во канцелариите на ОИК.
Во Струмица едно лице го покажало гласачкото ливче на набљудувач.