Македонија
Апропо сообраќајката на Спасов: Колку тежат моралните вредности на нашите политичари?
Сообраќајна несреќа се случи во петокот вечер во скопската населба Тафталиџе во која учествуваше дополнителниот заменик министер за труд и социјална политика Диме Спасов, кој според очевидци, бил во алкохолизирана состојба и додека траел полицискиот увид, со друго возило го напуштил местото на настанот.
Според првичните информации, Спасов управувајќи со џип „туарег“, во сопственост на Агенцијата за вработување, ноќеска околу полноќ, откако претходно престојувал во хотел во близна на скопскиот Градски парк, удрил во две паркирани возила, по што, наместо да даде изјава на увидната екипа, тој со друго возило побегнал. Подоцна полицијата кај Спасов извршила тестирање за евентуално присуство на алкохол и психотропни супстанци, а резултатите би требало да бидат објавени во текот на денот.
Како што изјавија очевидци, веднаш по несреќата на местото на настанот дошло трето лице кое дало изјава дека тој возел со автомобилот.
Со тоа, пак, дополнително, во целиот инцидент се направени неколку кривични дела, од предизвикување на општа опасност во сообраќајот, до давање на лажен исказ, напуштање на местото на настанот…
Од кабинетот на Спасов преку фејсбук реагираат дека станува збор за „типичен пример на организиран и координиран напад поттикнат во политички цели против дополнителниот заменик министер и во наредните денови не е исклучено и поведување постапки пред надлежните судови за докажување на вистината.
Забележливо е, меѓутоа, дека во реакцијата не се негира категорично дека се случила сообраќајна незгода, туку во прашање се доведуваат медиумските квалификации за последиците од инцидентот.
Во целата оваа работа станува очигледно дека кај македонските политичари недостига доблест, да се признае вината и согласно сторениот „грев“ да се понесе соодветна одговорност.
Но, се чини, дека кај нас работите се поставени опаку. Доколку некој од функционерите во власта го прекрши законот, се активираат милион механизми како тоа да се забошоти, па дури и вината да се префрли врз друг.
На нашите видни политички фигури во минатото и денес, не им е туѓо да „тргнат“ по некоја чашка, па потоа да седнат во возилото и да управуваат, како, само тие си знаат.
Министри, директори, спортисти, естрадни уметници, под дејство на алкохол често правеа прекршоци, па подоцна се јавуваа кај некои „повисоки структури“ да им „ја скинат“ пријавата, да ја претстават поинаку сообраќајката, или дури и да се заканат со тужби кон медиумите кои евентуално нешто ќе напишат.
„Знаеш ли кој сум јас…Има да те нема…Ќе леташ од работа само еден број да свртам…“, се најчестите реплики кои „недопирливите“ ги упатуваат кон оние што евентуално ќе им посочат дека згрешиле.
Па во оваа наша „убава Македонија“, дури и еден поранешен премиер, малку „под гас“, покоси електричен столб, па никому ништо. Тогаш речиси и да немаше информација за инцидентот, ниту, пак, за лицето што управувало со возилото.
Родителите на 20 годишната Фросина Цековска, студентка од Крива Паланка, која во април минатата година беше прегазена на булеварот Партизански одреди, тврдат дека „хондата“ што ја прегази нивната ќерка била управувана од син на политичар од власта, но, според нивните тврдења, за да се затскрие целата работа во полиција подоцна се пријавило друго лице.
Сомневањата се подгреани и од фактот што истрагата доцни, снимките од надзорните камери и останатите докази подоцна се доставени, па сето тоа кај родителите на настраданата девојка само ги продлабочуваат сомнежите.
„Истрагата е насочена против лицето кое се пријавило, но има јаки сомнежи. Недостигот од папиларни линии, бришење на воланот, наоѓање разни отпечатоци на седиштата. Не се совпаѓаат папиларните линии на воланот со папиларните линии на убиецот. Сто отсто е друг“, рече таткото на Цековска, во изјава за медиумите на едно од судењата.
Значи, од морален аспект, лицето што е на одредена функција во државата, треба со својот пример да покаже дека не е над законот, туку дека доколку згрешил, ќе си ја плати заслужената казна. Само на тој начин и обичните граѓани, оние што стојат на земја, ќе веруваат дека „сите сме еднакви пред законот“.
Како е во другите држави
Но, постојат културни држави во кои законот важи за сите, без оглед дали некој е политичар, син на политичар, или некоја друга „крупна ѕверка“.
Дваесет и деветгодишната шведска министерка за средношколско и образование на возрасните, која беше претставувана како нова надеж на социјалдемократската партија, Аида Хаџиалиќ, поднесе оставка поради тоа што полицијата ја запрела додека возела под влијание на алкохол.
„Беше тоа најголемата грешка во мојот живот (…) Ја преземам одговорноста. Објавувам дека имам намера да поднесам оставка на министерската должност. Сфаќам дека многумина се разочараа во мене. И самата сум си лута себеси и искрено жалам“, рече министерката на прес-конференција во Стокхолм, а медиумите забележуваат дека била видно потресена.
Заменик премиерот на канадската провинција Саскатчеван, Дон МекМорис, поднесе оставка откако возел во алкохолизирана состојба.
„Не требаше да седнам зад воланот по пиењето…Многу жалам и преземам одговорност за моите дела“, рече МекМорис, образложувајќи ја оставката.
Претставникот на Тајван во Сингапур, Антонио Чианг, поднесе оставка откако бил фатен како вози под дејство на алкохол.
Чианг во изјавата рече дека жали што и направил проблеми на владата и поднел неотповиклива оставка.
Судија од Кларксвил во САД исто поднесе оставка заради возење во пијана состојба.
„Сметам дека моето однесување е неприфатливо. Беше опасно, и, очигледно дека ја наруши довербата на заедницата во избраните органи, со што го доведува под знак прашалник интегритетот на судот, а не е во ред јас да дозволам да биде загрозена квалитетната работа на судот“, рече судијата Мики Вебер, образложувајќи ја одлуката за оставката.
Вакви примери може да наведуваме уште стотици, што покажува како треба да се однесува еден човек кому заедницата му ја дала довербата, а тој се чувствува дека ја изневерил нивната доверба и заради тоа си заминува.
Епилог
И после сѐ, кога ќе се вратиме повторно кај нас, целата работа најверојатно ќе заврши со образложение дека едните на другите политички им подметнуваат, дека ситуацијата е исценирана, дека посочениот не управувал со возилото, дека некој друг е виновен…
Но, уште повеќе зачудува фактот што висок претставник во власта, заменик министер, припадник на демохристијанска партија која се залага за негување на семејните вредности, се оддава на пороци и води раскалашен живот што не доликува на функцијата што ја врши.
Покрај тоа, дали постои етика во чинот на бегање од местото на настанот. Дали во еден момент не се запрашал дали е некој повреден или, не дај Боже, настрадан во сообраќајката што ја предизвикал.
Во спрега со инертното судство, кое експресно во краток рок ќе глоби обичен смртник со 300 евра само затоа што застанал 15 секунди на автобуска постојка само од него да излезе патник или, пак, зошто случајно не пропуштил пешак, тогаш повеќе од јасно станува дека сѐ набргу ќе се заборави, исто како и претходно што се случуваше низ годините.
А бидејќи кај нас сите се „оперирани“ од морални вредности, тешко е да се очекува дека Спасов ќе си поднесе оставка, но многу веројатно е дека ќе следат прес конференции, тужби, закани…
Како и да е, единствена светла точка во последниот инцидент од синоќа е што нема настрадани со смртни последици.
Па така, ни останува само горчливиот вкус во устата, со спознанието дека државата ни ја водат манипуланти кои ни мачкаат очи пред секои избори претставувајќи се како „невини луѓе што ќе изгинат за доброто на народот“, а во суштина се само „грст чемер и јад“ кои се богатат на маката на обичниот човек. /крај/мф
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Европскиот фронт е голема идеја чие време е дојдено
Кандидатот на Европскиот фронт, Бујар Османи, вечерва на митинг пред граѓаните на Кичeво изрази благодарност до лидерите на Европскиот фронт и коалицијата која, како што вели Османи, е продолжение на битките во континуитет една по една, за разбивање на замоците на етничките монополи.
„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.
Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.
„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател. Значи, браќа и сестри, се натпреварувам, на 24 април да ја разберете тежината на оваа мисија, дека вашиот глас не е само за мојата кандидатура, вашиот глас, вашата поддршка е за да ја разбиете последната тврдина на етничкиот монопол и за заокружување на еднаквоста на сите заедници во нашата заедничка држава“, заклучи Османи.
Македонија
Таравари: Ќе ја вратиме некогашната репутација на Куманово и Липково
Ќе ја вратиме некогашната репутација на Куманово и Липково. Ќе го поврземе Куманово со Гњилане и Прешево, ќе инвестираме во агробизнис, грантови и земјоделци Ќе ги поврземе Куманово со Гњилане и Прешево, ќе инвестираме повеќе во агробизнисот, во грантови за земјоделците и во економски развој за да ја вратиме некогашната репутација на земјоделството и производството на регионот на Липково и Куманово. Ова беа дел од пораките кои претседателскиот кандидат Арбен Таравари ги испрати вечерва од општина Липково. Оваа општина ја донесе ДУИ на власт а како награда добива само штета, неправда и лошо владеење.
„Наместо да се привилегира и развива овој регион кој некогаш важеше за кризен регион, лошото владеење на ДУИ го втурна во повеќекратни кризи. Економска и земјоделска криза, невработеност и миграциска криза, но и безбедносна криза и монтирани случаи. Никој повеќе од жителите на овој крај не ги почувствувал последиците од лошото владеење на ДУИ“, нагласи Таравари во својот говор.
Но, според него, оваа состојба ќе заврши со гласот на самите граѓани, кој ВРЕДИ и ќе ја донесе долгоочекуваната промена.
„Ќе донесеме повеќе правда, прво за политичките монтирани случаи, каде што ќе се заложиме за правда и обештетување за оние Албанци кои неправедно се држат во затвор. Никогаш не го забораваме војникот на слободата и жител на овој крај, Реџаил Ќерими, кој неправедно беше држен во затвор 13 години и почина во ќелијата кога отворено се знаеше дека нема врска со она за што го обвинуваа, изјави Таравари.
Меѓу другото, Таравари од Липково повтори дека со доаѓањето на ВРЕДИ на власт ќе се забрани коцкањето, а ќе се простат и долговите од фирмите за брзи кредити кои исто така рече дека ќе се затворат.
Македонија
Кои се седнатите на софра со најголемите криминалци од Грчец, Шиша бар, со оние од убиствата во Ханиоти, прашува Силјановска-Давкова
Ги нема сликите низ весниците кои се најдобар доказ, бидејќи сликите понекогаш повеќе кажуваат од зборовите, за тоа кој е кој во ова корупциско и криминално гнездо, вели професорката Горданa Силјановска -Давкова вечерва од Велес.
„Колку претседатели сте виделе, колку премиери сте виделе, колку министри за внатрешни работи сте виделе седнати на софра со најголемите криминалци од Грчец, Шиша бар, со оние од убиствата во Ханиоти? Може да се сликате со некого на улица, ама на софра да бидете тоа значи дека сте во спрега. Значи, во право е претседалот на ВМРО-ДМПНЕ кога вели дека, не само со чинење, не само со криминални активности, туку и со замижување пред криминалот и корупцијата вие сте соучесник во нив, посочи Силјановска Давкова и додаде:
„Во овие избори има нешто специфично, до ѕидот сме доведени. Вие заслужувате власт соодветна на вашето достоинство, власт од којашто нема да се плашите и срамите, туку ќе се гордеете“, порача вечерва од Свети Николе, кандидатката за претседател на државата, поддржана од ВМРО – ДПМНЕ и коалициските партнери