Македонија
Млади од Африка, Азија и Европа учат да развиваат мобилни апликации во Скопје
Дваесет и пет млади од Африка, Азија и Европа учествуваат на меѓуконтинентален проект за мобилно учење и нови технологии кој се одржува во Скопје, а е организиран од Асоцијацијата за едукација Младиинфо интернационал.
Меѓу учесниците на проектот „Мобилни млади: можности, техонологија, и поддршка за здружени мобилни млади“ (mYouth: Mobile, Youth, Opportunitiy, Unity, Technology, Help) се млади таленти за нови технологии од Хонг Конг, Сингапур, Сенегал, Гана, како и од европските земји: Италија, Шпанија, Бугарија, Полска, Австрија и Македонија. Во рамки на проектот, тие ќе работат на мобилни апликации со кои сакаат да придонесат кон решавањето на некаков општествен проблем или да остварат општествено влијание. Во Скопје, учесниците посетуваат тренинг за интеркултурно учење, тренинг за развој на мобилни апликации, како и тренинг за бизнис модели за мобилни апликации во соработка со Hub Skopje. Мобилните апликации кои младите ќе ги подготват за време на својот престој во земјава, ќе се натпреваруваат за Европската награда за млади (European Youth Award: http://www.eu-youthaward.org/) која секоја година наесен се одржува во Грац, Австрија. Во рамки на доделувањето на наградите ќе има и посебен гала настан на кој ќе се промовира проектот и ќе бидат поканети учесниците. Младите кои не доаѓаат од Европа ќе аплицираат за учество на Светската награда за млади (World Youth Summit Award: http://www.youthaward.org/), чија цел е поврзување на младите дигитални претприемачи кои со помош на интернет и нови технологии помагаат при остварувањето на целите на Обединетите Нации за одржлив развој (www.youthaward.org/united-nations-sustainable-development-goals). Учесниците на тренингот во Македонија беа избрани како победници на локалните кампови за развој на мобилни апликации кои се одржаа во нивните земји во периодот март-мај 2016. Целиот проект за градење на капацитети вклучува 10 организации и повеќе од 200 млади и е финансиски поддржан од Европската програма Ерасмус Плус. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во вторник предизборен молк, до тогаш продолжува презентацијата на изборните програми
Во рамки на кампањата за парламентарните избори, која почна во четвртокот, и денеска кандидатите за пратеници во шесте изборни единици ќе ги претстават своите платформи пред граѓаните во повеќе делови од државата. Во исто време продолжува и кампањата за претседателските избори, чиј прв круг ќе се одржи в среда, на 24 април, додека вториот круг треба да се одржи заедно со парламентарните избори на 8 мај.
Кандидатот за претседател поддржан од коалицијата на СДСМ Стево Пендаровски во рамки на изборниот караван денеска ќе ги посети жителите на Ново Село, Босилово, Василево, а митинзи ќе одржи во Радовиш и во Струмица.
Кандидатката за претседател на државата поддржана од ВМРО-ДПМНЕ, Гордана Силјановска-Давкова ќе ја презентира програмата пред граѓаните во Македонска Каменица, Пехчево, Берово и Делчево.
Претседателскиот кандидат Стевчо Јакимовски и коалицијата „Храбро за Македонија“ ќе одржат митинг во скопската населба Карпош, а кандидатот за претседател на Движењето ЗНАМ – За наша Македонија Максим Димитриевски ќе ја презентира програмата пред граѓаните во Ресен, Претор, Новаци и во Битола.
Во рамки на третиот ден од кампањата за парламентарни избори, претседателот на СДСМ Димитар Ковачевски ќе биде меѓу граѓаните на Брвеница и на Тетово.
Македонија
Пендаровски: Понудата на Мицкоски за коалицирање е знак на слабост
Кандидатот за претседател Стево Пендаровски синоќа од Бутел рече дека е легитимно и дека е демократски избор секој да коалицира со кого сака. Но, понудата на претседателот на ВМРО-ДПМНЕ, Христијан Мицкоски за коалицирање со неговата партија, уште на првиот ден од кампањата за парламентарни избори, покажува дека тој бара помош.
„Ние среде кампања не бараме помош од пријател. Мене ми се чини дека тоа е јасен знак на слабост, затоа што господинот Мицкоски знае што го очекува на 24 април и на 8 мај. Инаку зошто би барал помош од страна?“, рече Пендаровски.
Македонија
Силјановска-Давкова со 8 прашања, како граѓаните да се решат дали и за кого ќе гласаат на изборите
Во својот говор на синоќешниот митинг во Крива Паланка професорката Горданa Силјановска -Давкова порача дека оваа власт не креира рационални политики, оти да креираше рационални политики, почнувајќи од образованието, здравството, социјалната заштита, меѓународната политика, граѓаните немаше да се чувствуваат понижени.
– Се наоѓате пред многу важен момент, да донесете клучна одлука. Како да го направите изборот? Прашајте се, прво, дали подобро живеете? Дали ви е подобра економијата? Дали ви е подобро здравството? Дали ви е подобра социјалната заштита? Дали се чувствувате посигурни? Дали вие сте горди на оваа власт? Дали мислите дека власта е горда на вас? Дали мислите дека се горди на Македонија ако се плашат да го изговорат тоа име? Дали мислите дека се горди на сите кои гинеле за Македонија ако постапуваат, не според државните и националните интереси, туку според личните и олигархиските интереси?, рече Силјановска-Давкова и додаде „дека часовникот го отчукува заминувањето на оваа делигитимирана власт и дека набрзо ќе го отчука времето на промените врзани со новата власт, како на претседателско ниво, така и на парламентарно.