Daily news
Иво Вајгл: Влада ќе се формира
Европарламентарците доцна вечерва во Стразбур расправаа за извештајот за Македонија подготвен од известувачот Иво Вајгл, што треба да се најде на гласање на сесијата на Европскиот парламент во мај. Речиси без исклучок сите побараа претседателот Ѓорге Иванов да престане да го блокира формирањето на новата влада, а Парламентот да почне да работи на „нормален начин“. Немаше парламентарец кој ситуацијата во земјата не ја оцени како многу сериозна, а политичката криза како се подлабока, со заедничка оценка дека тоа ја загрозува европската перспектива на земјата.
Според преставникот на малтешкото претседателство, Јан Борг кој настапи во име на Советот на ЕУ, Македонија страда од поларизација и култура на поделби, а системски мани се регистрираат во судскиот систем, човековите права и борбата против корупцијата. Ненад Мимица, еврокомесар за меѓународна соработка и развој од Хрватска ги повика политичките фактори да ги почитуваат резултатите од изборите, претседателот Иванов да дозволи да се формира владата, а политичките партии да престанат да долеваат оган на меѓуетничките односи. Тој изрази силна загриженост за нападите врз граѓанскиот сектор од страна на државните институции, нешто што го споделија како став и други говорници во ЕП, и даде силна поддршка за продолжувањето на мандатот на СЈО.
„Влада мора да се формира. Но, тој процес е во рацете на претседателот и на политичките лидери. Само тие можат да ја вратат Македонија на патот на евроинтеграцијата“, порача Мимица. На крајот тој ја предупреди актуелната власт во Македонија дека добрата соработка околу мигрантите не значи дека ќе ги затворат очите пред нарушувањето на демократијата во земјата.
Кнут Фленкештајн порача дека е лошо да се држи цела земја заложник затоа што не се оствариле очекувањата на една партија за останување на власт. „Поголемиот дел од земјата мисли дека демократијата функционира само ако победат,“ забележа тој, додавајќи дека тоа очигледно го мисли и мнозинството од тие што деновиве излегуваат на улиците.
Едуард Кукан посака конечно да го види светлото во тунелот по неколку години криза во земјата, па го повика претседателот Иванов да го даде мандатот за формирање влада, а Парламентот на почне да работи според нормална процедура. Тонино Пицула оцени дека владеечката партија, соочена со губењето на власта ја довела земјата во ситуација без преседан, а Парламентот е толку блокиран што не може да донесе ни одлука за разпишување локални избори. Според него изборите не дале апсолутен туку релативен победник кој, пак, не успеал да формира влада.
Известувачот Иво Вајгл им се обрати на соседите што се мешаат во внатрешните работи на Македонија во време кога состојбата во неа е толку проблематична и комплицирана, во што можеа да се препознаат албанските политичари и грчките европарламентарци.
„Не треба да ја правите ситуацијата уште потешка со мешање во внатрешните работи. Македонија се соочува со големи предизвици на патот кон ЕУ. Сепак, лично очекувам дека ќе дојде крајот на кризата, дека владата ќе се формира и дека ќе се обнови нормалното функционирање на Парламентот“, порача Вајгл додавајќи дека никој не треба да се чувствува после тоа како губитник во националниот проект.
Единствената што не беше на линија на овие ставови беше Маријана Петрит, хрватската европарламентарка, која ги обвини САД и Албанија за мешање во политичката ситуација во земјата и им даде политичка легитимација на протестите што против Тиранската платформа се случуваат во Скопје./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.