Daily news
Дури 17 судии побарале промена во годишниот распоред на судии
Вкупно 17 приговори досега се стигнати до Врховниот суд за годишниот распоред на судии кој пред една недела го објави новоименуваниот ВД претседател на Кривичниот суд Стојанче Рибарев. Од Врховниот суд за Макфакс велат дека сè уште има време за нови приговори, а оечкуваат некои од нив да стигнат и по пошта. По тоа, треба да закажат општа седница на која ќе се одлучува за нив.
Според распоредот на Рибарев, поранешниот претседател на Кривичниот суд Владимир Панчевски и ВД претседателката Татјана Михајлова беа поставени на двете најважни функции во Одделот за организиран криминал, судечки судија, судија на претходна постапка, шеф на цел оддел и претседател на Кривичен совет.
За заменичка на Рибарев е поставена судијката Славјанка Јанкоска, која има уште три месеци до пензионирање и во исто време, ќе биде шефица на Одделот претходна постапка. Јанкоска јавноста ја памети по донесеното решение дека прислушуваните разговори не се доказ. Досегашната заменичка на Панчевски и на Михајлова, Дијана Груевска Илиевска е сменета и од одделот за организиран криминал.
Според постојниот распоред предмети по нов ЗКП (кој се применува од 2013 година) ќе судат: Моника Бахчовановска, која доаѓа од прекршоци, а ќе води и Кривичен совет – таа сопруга е на Владимир Бахчовановски, партиски кадар на ВМРО ДПМНЕ и директор во повеќе јавни претпријатија. На овој список се и судијката Софија Лаличиќ споменувана во „бомбите“ која исто така ќе одлучува во Кривичен совет, како и Џенета Бектовиќ, Биљана Коцевска, Верка Костова Спасеска, Милка Васовска Ангеловска, Марин Станески, Весна Петровска Тагасовска, Даниела Алексоска Стојановска, Душан Јосифов и Дијана Груевска Илиевска и Љубинка Башевска. Башевска го судеше „Пуч“, а Груевска, случаите „Ликвидација“, „Шпион“, Владо Бучковски и други предмети.
Основниот суд Скопје 1, објави соопштение во кое објаснува дека распоредот бил правен врз основа на желби на судиите. Сепак, овој распоред не определува од кој датум ќе почне да се применува, туку пишува по правосилноста, што значи оставена е можноста сите незадоволни судии да поднесат приговори. Дури потоа, како што пишува Стојанче Рибарев во одлуката, ќе го направи распоредот за судење по судници и во петорки и ќе ги определи римските броеви под кои ќе се заведуваат предметите кај судиите. Еве што се вели во соопштението на судот:
На ден 28.03.2017 година в.д Претседателот на судот го достави до судиите Годишниот распоред за работа за 2017 година. При изготвувањето на распоредот се имаа во вид мислењата на судиите од седницата одржана на ден 17.03.2017 година. Некои од желбите на судиите имаше можност да бидат уважени, а за некои ќе се створи можност во текот на годината.
Во моментот се применува досегашниот распоред на работа и закажаните судења се одвиваат според тој распоред. Новиот распоред ќе се применува кога истиот ќе стапи во сила- соопшти Судот.
На општа седница, затворена за јавноста, Врховниот суд минатиот месец одлучи да прифати седум од вкупно осумте поднесени приговори од судии на Основниот суд Скопје 1 кои беа преместени со новиот годишен распоред за работа во Kривичниот суд. крај/мф/вм
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.