Општество
Ивановски : Македонија напредува на светската информатичка мапа
Република Македонија оваа година е рангирана на 57 место, што претставува напредок за 10 места од минатата 2013 година, кога беа рангирани само 144 земји. Ова се резултатите објавени во 13-то издание на Глобалниот извештај за информатичка технологија објавено од Светскиот Економски Форум, кои денес ги соопшти министерот Ивановски на конференцијата „Европски ден на претприемачот и СЕЕИТА и МАСИТ Отворени денови“.
„Најдобро рангирани и на прво место сме за вкупни даноци, следува второто место за број на денови да се започне нов бизнис, па трето место за број на процедури да се започне нов бизнис итн. Секако дека има и индикатори каде што е потребно повеќе да се работи за да се подобри позицијата на Република Македонија во наредните извештаи.„- рече во обраќањето Ивановски.
Според бројот на интернет корисници во вкупното население, Македонија е на 43 место, според бројот на мобилни корисници на 82 место, потоа според домаќинствата што имаат интернет сме на 49 место, широкопојасен интернет на 48, домаќинства што имаат компјутер 55 место, широкопојасен интернет преку мобилен на 63 место, интернет пристап во училиштата 40-то, софтвер пиратерство на 62 место, пристап до најновите технологии на 80 место итн.
Ивановски се осврна и на глобалните трендови во ИКТ сферата и темите кои се дискутираат на меѓународно ниво на повеќе меѓународни конференции, а едно од прашањата кои повторно беа покренати на 14-та Пленарна конференција на Меѓународната телекомуникациска унија во Јужна Кореја беше „Кој и како владее со интернетот “.
„Оваа тема повеќе се дискутира години, но во изминативе шест месеци и наредната година се очекува да се донесат историски одлуки околу интернетот, одлуки кои може да ја променат целата слика во владеењето и функционирањето на интернетот што го знаеме. На неодамна одржаната Регионална министерска конференција посветена на темата на интернет владеење, чиј домаќин беше Македонија, произлезе иницијатива за потпишување на Балканска Декларација за владеењето со интернетот. Сите сакаме Интернетот да продолжи да се развива во координација со сите засегнати страни, според т.н мултистејк холдер модел, модел кој што ќе придонесе до побрзо одлучување при локални, регионални, национални или светски проблеми што се присутни или што допрво ќе се појават“, додаде Ивановски.
Инаку, Министерството за информатичко општество и администрација започна со изработка на две ИКТ стратегии – едната која ќе биде на краток рок до 2017 година и втората на подолг рок до 2020 година. Министерството подготвува и стратегија за креирање на Дигитална одржлива економија, која што ќе биде соодветно вклопена во ИТК стратегиите. За таа цел, веќе е поднесена апликација до Европската Унија за привлекување на експерти во оваа област, кои што ќе помогнат при нејзиното креирање.
„Во 2014 година го донесовме и Законот за користење на отворени податоци, а го лансиравме и Проектот за отворени податоци. Вкупно 128 дата сетови се достапни за било кој да креира сервиси за нивни потреби или за потребите на граѓаните. Податоците се 100% поставени на Клауд, со што уште еднаш се потврдува стратегијата на Владата на Република Македонија и Министерството за информатичко општество и администрација за максимално користење на услугите што се нудат во облак“, рече министерот Ивановски.
На денешната конференција на МАСИТ свои обраќања имаа и претседателот на Европската бизнис асоцијација, Глигор Бишев, претседателот на Управниот одбор на МАСИТ, Слаѓан Михалјовски, деканот на ФИНКИ, Димитар Трајанов и др. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.