Општество
Заев: Дојдовме и не заминуваме додека не го вратиме мирот и спокојот во Македонија
Се изнамачи вистината да ја види светлината на денот, а сега таа вистина е голема колку што квадратни километри изнесува Македонија, порача лидерот на СДСМ, Зоран Заев во неделата од граѓанскиот протест организиран од опозицијата пред Владата.
Заев порача дека сега таа вистина се излеала и по улиците на Скопје и низ цела Македонија.
„Ништо повеќе не може да направи Никола Груевски од тоа да ја напушти оваа зграда во која му се одброени часовите. Кукавички од позиција на премиер слушнавме колку сурово се пресметувал со противнциите, со пиштол на глава ги праќал во затвор, им рушел објекти, крадел избори, се инсталирал во судството и полицијата да се штити, мразел и се одмаздувал со соработниците, ги погазил уставот и законите, ги злоупотребил институциите и администрацијата, дури и за името се пазарел. Сега Груевски се плаши дека ќе било кукавички ако заминал, зарем не е кукавички ова што досега го правел, зарем не е кукавичи да се држи во заложништво Македонија? Друго решние за кризата нема, за да се врати демократијата која што ја згази, надежта и достоинството кое што го одзедоа од народот кој е фрлен во очај, за да ги запишеме повторно европските вредности“, порача Заев.
Според лидерот на најголемата опозициска партија, овој 17-ти мај „ќе влезе во историјата на слободна“ Република Македонија, нагласувајќи дека притоа се потребни неколку работи за земјата да излезе од кризата во којашто е длабоко навлезена.
„Почитувани граѓани, решението за излез е Никола Груевски да поднесе оставка, а со него тоа да го направат и јавниот обвинител Марко Зврлевски и обвинителот за организирал криминал Јован Илиевски, после оставки да поднесат и раководните структури на МРТВ, неопходно е да се постигне договор за техничка влада којашто ќе може да организира фер избори, потоа да се прочисити избирачкиот список, да се создадат услови за независно медиумско известување, да се вратат сите механизми на современа македонска држвата. Дојдовме и не заминуваме додека не го вратиме мирот и спокојот на граѓаните на Република Македонија. Очекувам оваа најсилна порака којашто денеска ја испраќа Македонија, вака мултиетнички обединета, вака масовно заедно, жедна за слобода и демократија, очекувам од меѓународанта заедница која што е сведок на сето зло што им е нанесено на граѓаните на Македонија да помогне со директно учество а не само со набљудување за мирна разврска на политичката криза, без насилство. Предупредувам дека можното инатење на Никола Груевски со волјата на народот може да има последици што никој не ги посакува. Од тие причини порачувам сите граѓаните кои што се тука, на еден разумен и мирен процес да ја помогнат посакуваната разврска на кризата“, порача Заев во својот говор пред насобраните демонстранти./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.