Македонија
Протест: Секое дете е Тамара!
Детскиот живот нема цена…Секое дете е Тамара, беа транспарентите кои можеа да се забележат во недела напладне за време на мирниот протест на велешани во Младинскиот парк.
Присутните сметаат дека овој згаснат живот е резултат на бирократскиот однос на институциите.
Покажувајќи црвен картон, насобраните побараа оставка од Тодоров, Андовски, Парнаџиева-Змејкова, Мехази, Софијанова, но и оние „од горе“ кои на членовите на Комисијата им наредиле да не дозволат лекување во странство.
„Кога системот убива дете, што останува како утеха? Нема утеха. има само гнев тага и недоверба, и тоа недоверба кон министерот за здравство, кон Фондот за здравство, лекарската комисија, јавното обвинителство, кон судството“, рече Моника Петковска, јави велешкиот портал Лисица.
Низ солзи мајката на Тамара раскажува за радоста на својата ќерка дека штом чичковците ќе одлучат каде да се лекува ќе лета со авион, но наместо лет до Турција, таа одлетала кај ангелите.
Солзите не ги криеја сите присутни во Младинскиот парк кога скршена од болка Жаклина јавно на сите им кажа дека со собраните средства од хуманите луѓе за лекување на малото девојче семејството ги подмирило посмртните трошоци. Апелирајќи судбината на нејзината Тамара да не се повтори кај ниедно друго дете, таа рече.
„Упатувам апел до сите функционери, пратеници и министри, доктори..сите… доколку некој родител чека прием кај Вас сослушајте го во чест на Тамара, за да не се случи нова Тамара“, рече Жаклина Димовска, мајка на Тамара.
Тамара почина на деветти, месецов. Имаше вродена мана на рбетниот столб. Пред две години и беше направена првата операција. Се броеја деновите кога семејството преку ФЗО ја очекуваше информацијата кога ќе биде втората операција. Иронијата да биде поголема, два дена по нејзината смрт стигнало долго очекуваното писмо.
Родителите, но и јавноста, сега се во исчекување на резултатите од обдукцијата кои ќе го дадат одговорот од што почина малата Тамара. /крај/лсц
Извор: Лисица
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Европскиот фронт е голема идеја чие време е дојдено
Кандидатот на Европскиот фронт, Бујар Османи, вечерва на митинг пред граѓаните на Кичeво изрази благодарност до лидерите на Европскиот фронт и коалицијата која, како што вели Османи, е продолжение на битките во континуитет една по една, за разбивање на замоците на етничките монополи.
„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.
Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.
„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател. Значи, браќа и сестри, се натпреварувам, на 24 април да ја разберете тежината на оваа мисија, дека вашиот глас не е само за мојата кандидатура, вашиот глас, вашата поддршка е за да ја разбиете последната тврдина на етничкиот монопол и за заокружување на еднаквоста на сите заедници во нашата заедничка држава“, заклучи Османи.
Македонија
Таравари: Ќе ја вратиме некогашната репутација на Куманово и Липково
Ќе ја вратиме некогашната репутација на Куманово и Липково. Ќе го поврземе Куманово со Гњилане и Прешево, ќе инвестираме во агробизнис, грантови и земјоделци Ќе ги поврземе Куманово со Гњилане и Прешево, ќе инвестираме повеќе во агробизнисот, во грантови за земјоделците и во економски развој за да ја вратиме некогашната репутација на земјоделството и производството на регионот на Липково и Куманово. Ова беа дел од пораките кои претседателскиот кандидат Арбен Таравари ги испрати вечерва од општина Липково. Оваа општина ја донесе ДУИ на власт а како награда добива само штета, неправда и лошо владеење.
„Наместо да се привилегира и развива овој регион кој некогаш важеше за кризен регион, лошото владеење на ДУИ го втурна во повеќекратни кризи. Економска и земјоделска криза, невработеност и миграциска криза, но и безбедносна криза и монтирани случаи. Никој повеќе од жителите на овој крај не ги почувствувал последиците од лошото владеење на ДУИ“, нагласи Таравари во својот говор.
Но, според него, оваа состојба ќе заврши со гласот на самите граѓани, кој ВРЕДИ и ќе ја донесе долгоочекуваната промена.
„Ќе донесеме повеќе правда, прво за политичките монтирани случаи, каде што ќе се заложиме за правда и обештетување за оние Албанци кои неправедно се држат во затвор. Никогаш не го забораваме војникот на слободата и жител на овој крај, Реџаил Ќерими, кој неправедно беше држен во затвор 13 години и почина во ќелијата кога отворено се знаеше дека нема врска со она за што го обвинуваа, изјави Таравари.
Меѓу другото, Таравари од Липково повтори дека со доаѓањето на ВРЕДИ на власт ќе се забрани коцкањето, а ќе се простат и долговите од фирмите за брзи кредити кои исто така рече дека ќе се затворат.
Македонија
Кои се седнатите на софра со најголемите криминалци од Грчец, Шиша бар, со оние од убиствата во Ханиоти, прашува Силјановска-Давкова
Ги нема сликите низ весниците кои се најдобар доказ, бидејќи сликите понекогаш повеќе кажуваат од зборовите, за тоа кој е кој во ова корупциско и криминално гнездо, вели професорката Горданa Силјановска -Давкова вечерва од Велес.
„Колку претседатели сте виделе, колку премиери сте виделе, колку министри за внатрешни работи сте виделе седнати на софра со најголемите криминалци од Грчец, Шиша бар, со оние од убиствата во Ханиоти? Може да се сликате со некого на улица, ама на софра да бидете тоа значи дека сте во спрега. Значи, во право е претседалот на ВМРО-ДМПНЕ кога вели дека, не само со чинење, не само со криминални активности, туку и со замижување пред криминалот и корупцијата вие сте соучесник во нив, посочи Силјановска Давкова и додаде:
„Во овие избори има нешто специфично, до ѕидот сме доведени. Вие заслужувате власт соодветна на вашето достоинство, власт од којашто нема да се плашите и срамите, туку ќе се гордеете“, порача вечерва од Свети Николе, кандидатката за претседател на државата, поддржана од ВМРО – ДПМНЕ и коалициските партнери