Daily news
Ниту протестите нема да го премислат Коневски
Советот на Општина Аеродром во среда без било каква најава го усвои спорниот Детален урбанистички план со кој се планира уништување на зелените површини кај Мајчин Дом и покрај Вардар.
„Деталниот план, што е предмет на дискусија веќе една година, се презентира во јавноста и истиот е во интерес на жителите на општина Аеродром. Тоа дека се уништува зеленило мислам дека е една лажна информација што се обидува да ја презентира опозицијата пред граѓаните, а сè со цел да ги дезинформира и да ги стави во ситуација да размислуваат деструктивно, на истиот начин како што дејствува таа“, вели градоначалникот на општина Аеродром, Ивица Коневски.
По една година затишје, прашањето за ДУП-овите повторно се актуализираше во јавноста. Лани тој не беше изгласан, затоа што се решаваше по триесетте приговори од граѓаните
„Планот беше ставен како дополнителна точка, по предлог на градоначалникот. Ние не можевме точката да ја ставиме на редовна седница, бидејќи не знаевме дали ќе добиеме согласност од Министерството. Доколку чекавме, немаше да можеме да донесеме било кој план, бидејќи мандатот на советниците истекува десетти април овој месец“, рече Коневски.
Тој е уверен дека постоечката локална гарнитура придонела за повеќе зеленило во општината, на што укажува фактот дека последните неколку месеци се посадени преку 50.000 дрва.
„Овие протести што се најавуваат сега не се на граѓаните, туку под превезот на граѓаните протестираат партиските војници од партискиот штаб на СДСМ. Тоа се добро познати ликови за нас кои се политички вметнати и слепо ги слушаат наредбите од своето раководство, а целта им е кризата која ја направија на централно ниво да ја префрлат на локално“, вели Коневски, одговарајќи за прашањето за протестите.
Запрашан дали вечерва планира да се појави на најавените протести против ДУП-от, вели дека тој граѓаните ги прима секој ден во неговата канцеларија, а нема намера да учествува на партиски собири.
Претставничката од иницијативата „Сакаме Аеродром да дише“, Искра Манојлоска, вели дека оваа реакција на Коневски е природна. Таа додава дека никогаш во нејзиниот живот не била член на политичка партија, но не оспорува партиски определените граѓани да го користат своето право на протест и истите се добредојдени.
„Носењето на ДУП-от нè остави запрепастени и изненадени. Спонтано решивме да протестираме пред Општина Аеродром, затоа што немавме друга идеја што да правиме. Некои предлагаат да го оспориме ДУП-от пред Уставен суд. Јас лично немам многу доверба во таа институција. Отворени сме за сугестии од сите граѓани на Македонија, не само од оние од Аеродром. Секој совет и секоја помош се добредојдени за да го споасиме Аеродром“, вели Манојлоска за Макфакс.
Реакција за ДУП-от во Аеродром објави и СДСМ. Тие велат дека Ивица Коневски и ВМРО-ДПМНЕ вчера кукавички, ненајавено и без дебата, го изгласале спорниот ДУП.
„Ваквите градби од бизнис интерес на власта на ВМРО-ДПМНЕ и Коневски се вистинска еколошка катастрофа за Аеродром. Спремен ли е Коневски да го ризикува здравјето на граѓаните на сметка на бизнис интересите? Свесен ли е дека со овие градби дополнително ќе се спречи струењето на воздухот покрај Вардар?“, реагираше Златко Марин од СДСМ.
Вечерва од иницијативата „Сакаме Аеродром да дише“ најавија протести со почеток во 18 часот. /крај/кл
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.