Спорт
„Фуријата“ го парализираше Роналдо
Осминафиналниот дуел меѓу ибериските ривали, донесе тврд фудбал во кој Шпанија победи 1:0, благодарејќи на стратегијата со којашто целосно беше отсечен најдобриот фудбалер на Португалија
Статистика на мечот покажува целосна доминација на шпанските фудбалери кои речиси двојно ја имаа топката во својот посед, а кон голот на противникот упатија дури десет шута повеќе од Португалците. И овој осминафинален меч на светското првенство ќе остане забележан, покрај другото, и по една во најмала рака многу дискутабилна одлука кога аргентинскиот арбитер Хектор Балдаси во 89. минута му покажа црвен картон на Рикардо Коста, за наводно удирање на противнички играч Капдевиља без топка во неговиот казнет простор, но остана впечатокот дека тоа беше извонредно добро совладана актеркса техника од страна на Шпанецот. Вечерва во Кејптаун, на стадионот „Грин поинт“ пред околу 64 илјади гледачи, панските фудбалери кои ја имаа според квалитетот предноста на својата страна, покажаа и поголема тактичка дисциплина. Голот на одлуката го постигна најдобриот шпански стрелец и нов член на Барселона, Давид Виља кој со четири погодоци се израмни на листата на стрелците со Аргентинецот од Реал Мадрид, Гонзало Игуаин и со веќе елиминираниот Словак Витек. Тоа беше 34-то дерби за Пиринеите во кое Шпанија ја забележа 16-та победа, Португалија остана на пет триумфа а 12 мечеви завршиле без победник. Тоа само посебе покажува дека „црвената фурија“ играше и со традицијата на своја страна, а се чини дека во португалската игра решавачко беше и отсуството на повредениот Деко на средината од теренот од каде се градат акциите за Кирстијано Роналдо. И Португалија имаше добар скор пред мечот, последниот меѓусебен меч го доби на Европското првенство како домаќин, 16 месеци немаше доживеано пораз а на последните девет натпревари немаше примен гол. Меѓутоа, налета на противник кој не попусто е највисоко котиран на обложувалниците како најсериозен кандидат за титулата.Шпанците од самото тргнување од центарот покажаа дека не размислуваат на ништо друго, туку како да постигнат го. Португалскиот голман Едуардо кој вечерва имаше повеќе одлични инервенции веќе во првата минута ја скрати радоста на Шпанците, бранејќи го ударот на Торес од 16 метри. Еудардо и во третата минута ги покажува своите квалитети одбранувајќи го првиот обид на мечот на Давид Виља. Потоа по обратен редослед во седмата и во 12. минута повторно Виља и Торес го загрозуваат противничкиот гол. Во тие моменти се очекуваше во секој момент Шпанците да ја затресат португалската мрежа, но тие ја пропуштија можноста и попуштија со притисокот. Така во 21. минута Икер Касиљс правовремено интервенираше на шутото од 20-ина метри на Тиаго, а до крајот на полувремето Португалија беше на моменти многу подобар противник. Притоа Португалците не искористија во низа три добри можности, но Роналдо, Алмеида и повторно Тиаго не успеаја да постигнат гол.Тоа беше доволен знак дел Боске на полувремето да бара порешителна игра, па неговите фудбалери во второто полувреме целосно го надиграа португалскиот тим. Подобрата игра на крајот беше крунисана со гол во 63. минута. Давид Виља беше блескаво проигран од својот нов клупски колега Чави и луцидно со петица го совлада Едуардо. Притоа, португалскиот голам го одбрани првиот обид на Виља, но тој подготвено ја дочека одбиената топка.Седум минути подоцна Рамос се закани, а во 76. Виља повторно опасно шутира, но вечерва Едуардо навистина бранеше во голема форма. Како што се доближуваше крајот на мечот, Шпанците со куси додавања ги изморуваа противничките играчи кои мораа да го „бркаат“ резултатот но тешко доаѓаа до топката, така што до крајот не успеаја ниеднаш сериозно да му се заканат на Касиљас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Ливерпул замената за Клоп ја најде во Лисабон
Откако Јирген Клоп јавно објави дека на крајот од сезоната ќе ја напушти клупата на Ливерпул и ќе замине на долг одмор, фудбалска јавност шпекулира кој ќе биде новиот тренер на „црвените“.
Како очигледен избор се истакна поранешниот играч на Ливерпул, Чаби Алонсо (42). Неговиот Баер Леверкузен игра неверојатно добар фудбал оваа сезона. Статистиката на германскиот тим е 38 натпревари без пораз во сите натпреварувања, со 109 постигнати голови.
Извесно е дека Чаби Алонсо ќе им ја донесе на „фармацевтите“ првата шампионска титула во клупската историја, со која ќе ја прекинат единаесетгодишната доминација на Баерн.
Сепак, од релевантни извори во Германија доаѓаат информации дека Алонсо ова лето нема да го напушти Леверкузен, а доколку реши да замине од Баер, ќе остане во Германија и ќе се се пресели во Минхен.
„Скај Спортс“, пишува дека Ливерпул покажал сериозен интерес за Португалецот Рубен Аморим (39), тренер кој четири години е на клупата на Спортинг, а претходно беше тренер на Брага. Тој користи систем со три стопери исто како и Алонсо, а неговиот напаѓачки стил на игра му донесе титула на Спортинг во првата сезона на Аморим.
Спорт
УЕФА ќе го разгледа предлогот секој тим да има по 26 фудбалери на ЕП
Европската фудбалска унија (УЕФА) ќе разговара за можноста за проширување на бројот на играчи за претстојното ЕП 2024 во Германија на состанок следниот месец.
Според актуелните правила, секоја репрезентација може да има по 23 пријавени фудбалери на ЕП. Српскиот селектор, Драган Стојковиќ Пикси, предложи, секоја селектор да може да пријави 26 играчи. Овој предлог доби поддршка од селекторите на 24 репрезентации кои ќе учествуваат на континеталниот шампионат.
„Добивме неколку пораки од селекторите на репрезентациите во врска со бројот на играчи ЕП 2024. Работната група на УЕФА и претставниците на репрезентациите учесници ќе ги разгледаат предлозите на селекторите на 8 април и ќе ги проучиме сите можни решенија и идеи“, најавија од УЕФА.
На последното ЕП во 2021 година, поради епидемијата на коронавирус, секоја репрезентација имаше 26 фудбалери.
Спорт
Колку заработи Иванишевиќ од соработката со Ѓоковиќ?
Прекинот на соработката меѓу Новак Ѓоковиќ и Горан Иванишевиќ е топ тема кај регионалната спортска јавност.
Ниту една страна не ги откри точните причини за разделбата, освен што Ѓоковиќ изјави дека „достигнале точка на заситеност“.
Ѓоковиќ најверојатно пукна по лошиот почеток на сезоната во која се уште нема освоено трофеј, пред најважните турнири во годината, додека Хрватите пишуваат дека, без разлика на се, Иванишевиќ добро заработил од оваа соработка.
Соработката на ова дуо траеше речиси шест години, во кои Ѓоковиќ освои 12 грен слем титули.
Наводно, Ѓоковиќ му плаќал на Иванишевиќ од 6.000 до 10.000 евра неделно, односно легендарниот Хрват добивал 10 отсто премија од заработката на српскиот тенисер на турнирите.
Иванишевиќ заработил повеќе од 300.000 евра само од плата минатата година.
Ако ја земеме таа бројка како просечна заработка на Иванишевиќ за време на соработката со Ѓоковиќ и процентот од освоените турнири, Иванишевиќ во последните шест години како тренер на најдобриот тенисер во светот заработил помеѓу два и четири милиони евра.
Инаку, Иванишевиќ во кариерата како активен играч заработи околу 16 милиони евра. Кариерата во која освои еден грен слем (Вимблдон), Иванишевиќ ја заврши во 2011 година.