Домашен
Ангеловски: Со „италијанска“ 3-5-2 формација по успех во Шпанија
Македонските фудбалски репрезентативци, во понеделникот, ги започнаа подготвките за квалификацискиот натпревар против Шпанија, кој ќе се одигра на 12. ноември во Гранада. По три одиграни натпревари во квалификациската група за пласман на Светското првенство во Русија, Шпанија има седум, а Македонија сѐ уште е без освоен бод.
Игор Ангеловски, селекторот на Македонија, за мечот со Шпанија повика 21 фудбалер, од кои осуммина се играчи на селекцијата до 21 година, која минатиот месец избори пласман на Европското првенство.
„Ме радува што фудбалерите пристигнаа, ме радува и што здравствениот билтен е поволен, нема повредени играчи. Исто така, ме радува и нивната форма, дојдоа фудбалери кои имаа одлични настапи викендов, Несторовски и Алиоски беа стрелци, Стефан (Ристовски) и Жута со Ријека победија во дербито со Хајдук. Очекувам во една добра атмосфера да се подготвиме за она што нѐ очекува со Шпанија. Од фудбалерите очекувам да одиграат барем за едно ниво подобро од она што го одиграа против Италија“, рече селекторот Ангеловски, дополнувајќи дека сите повикани ќе конкурираат за место во тимот и дека во А селекцијата нема поделба на млади и стари.
Анализирајќи го противникот, за Макфакс македонскиот селектор рече дека иако Дел Боске повеќе не е селекторт на Шпанија, нема драстични промени во начинот на кој игра „црвената фурија“.
„Шпанија не го менува стилот на игра, тој е заснован на начинот на кој се работи во двата најголеми клуба Реал и Барселона. Таа техничко-тактичка супериорност ја пренесуваат и во репрезентацијата. За мене Шпанија е меѓу четирите најдобри светски селекции, светски и европски првак, но против секого може да се игра. Треба само да го дадеме максимумот. Јас никогаш не велам дека ‘нема што да загубиме’, ова е натпревар од кој може многу да добиеме. Без разлика како ќе се одвиваат настаните на теренот посакувам мојот тим да одигра одважно, да верува во себе“, прецизираше селекторот.
Ангеловски уште еднаш потврди дека и против Шпанија неговиот тим ќе игра во формација 3-5-2, тактичка поставеност со која Италија на Европското првенство ја победи „црвената фурија“, а пред еден месец одигра нерешено.
„Начинот на кој игра Италија мора да ни биде показател како да се стремиме да се одвиваат настаните на тој натпревар и да се надеваме дека ќе ни донесе убави моменти“, вели за Макфакс селекторот Ангеловски и дополни:
„Па не само на европското, Италија со години е најголем проблем за Шпанија, тешко поминуваат против Италија. И на првиот меч за око шпанската игра беше доминантна, но тој натпревар заврши 1-1. Една од причините поради која се одлучив да играме 3-5-2 е Италија, во група во која се тие мораш да играш во систем доколку сакаш да бидеш рамноправен. Значи доколку сакаш да направиш нешто против Шпанија треба да се игра тој систем, бидејќи тие тешко играат против тој систем“.
Инаку Шпанскиот селектор Лопетеги пред натпреварот со Македонија се соочува со сериозни проблеми во дефанзивниот ред, бидејќи поради повреди овој меч ќе го пропуштат Пике, Серхио Рамос и Жорди Алба, а од иста причина во составот ќе го нема и Иниеста.
„Тие се фудбалери од светска класа, тие се столбови на Реал и Барселона. Сигурно е дека тоа би бил хендикеп за секој тим, Рамос и Пике седум-осум години играат заедно во репрезентацијата, но далеку од тоа дека немаат доволно квалитетни играчи на тие позиции. Сепак, постои разлика кога ќе настапиш со воигран тим и со фудбалери кои првпат ќе играат заедно. Напоменувам дека мене ми е најважно како ќе одиграме ние, ме радува што моите играчи без респект влегуваат во натпреварите, се надевам дека така ќе биде и против Шпанија која е фаворит на дуелот“, рече Ангеловски.
Македонските репрезентативци до среда ќе се подготвуваат во Скопје, а за Шпанија ќе заминат в четврток. Дуелот се игра в сабота во Гранада со почеток во 20:45 часот./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.