Европа
Русија се закани со одмазда за протерувањето на нејзините дипломати низ светот
Руската влада се закани со одмазда за досега најголемите масовни протерувања на руски дипломати во историјата, откако повеќе од 20 држави ја поддржаа акцијата на Велика Британија во врска со труењето на поранешниот руски шпион во Салсбери.
Портпаролот на Кремељ, Дмитри Песков, изјавил дека владата длабоко жали за одлуката на САД за протерување на нивните дипломати и ќе ја анализира ситуацијата пред да донесе предлог за одмазднички активности кој треба да го одобри рускиот претседател, Владимир Путин.
„Ние веќе изјавивме и потврдивме дека Русија никогаш немала врска со скандалот со труењето на рускиот шпион. Ќе се водиме со принципот на реципроцитет како и претходно“, нагласи Песков.
САД вчера најавија протерување на 60 руски дипломати и затворање на конзулатот во Сиетел, што е најцврстиот дипломатски потег на американскиот претседател, Доналд Трамп, против Москва откако ја презеде функцијата во 2017 година, пренесува Си-ен-ен.
Песков изјави за „Тас“ дека Министерството за надворешни работи ќе преземе можни одмазнички мерки кои ги разгледува претседателот Владимир Путин нагласувајќи дека секоја конечна одлука лежи кај рускиот лидер.
Како одговор на најновото протерување на дипломатите, претставникот на Обединетите нации во Русија, Василиј Небензиа, ги обвини САД за злоупотреба на своите права и обврски како домаќин на Генералното собрание на ОН. Небензиа вели дека протерувањето на дипломати од страна на САД ќе ги попречи напорите на Москва во меѓународното тело.
Канада, Украина и земјите членки на Европската Унија вчера им се приклучија на САД во протерувањето на повеќе од 100 руски дипломати.
Британскиот премиер, Тереза Мај, реакцијата низ светот ја нарече најголемото колективно протерување руски разузнавачи во историјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.
Европа
Шпанскиот државен обвинител бара прекин на истрагата против сопругата на Санчез
Шпанскиот државен обвинител, назначен од кралот по препорака на владата, денеска побара од судот во Мадрид да ја затвори истрагата за корупција против сопругата на премиерот Педро Санчез бидејќи „нема индиции за кривично дело“.
Судијата во Мадрид вчера пријавил дека отворил прелиминарна истрага за 59-годишната Бегоња Гомез. Сопругата на премиерот беше пријавена кај судијата од синдикатот Манос Лимпиос (Чисти раце) врз основа на медиумските извештаи дека давала препораки со нејзин потпис на претприемачи кои се пријавиле на јавни тендери. На овој начин, било наведено во пријавата, таа ја искористила својата позиција и влијание за да можат блиските луѓе да добијат јавни пари и работа.
Организацијата Манос Лимпијас претходно изјави дека својата тужба ја заснова на медиумски извештаи и дека не може да гарантира за нивната вистинитост, а шефот на организацијата, Мигел Бернад, рече дека извештаите биле проследени до судијата од „граѓанска должност“ и негираше дека акцијата била политички мотивирани.
Во 1980-тите, Бернад се натпреваруваше на два европски избори како кандидат на екстремно десничарскиот Национален фронт во 1980-тите.
Манос Лимпијас одлучи да побара од судот да отвори истрага за бизнисот на Гомез откако обвинителите не постапија самоиницијативно, а истражниот судија ќе одлучи дали медиумските извештаи се точни или не, рече тој.
Консултантската компанија на претприемачот Карлос Барабес, според пријавата, добила 10 милиони евра од јавно претпријатие во надлежност на Министерството за економија. Тој претприемач подоцна основал постдипломски курс кој го водела Гомез на Универзитетот Комплутенсе во Мадрид.
Во извештајот се споменува поврзаноста на сопругата на премиерот со туристичката компанија Globalia, која беше спонзор на едукативниот центар „Africa Centre del Instituto de Empresa“ управуван од Гомез. Шпанската влада со 600 милиони евра народни пари ја спаси „Air Europa“, во сопственост на Globalia.
Државното правобранителство испрати жалба до судот во Мадрид, во која се наведува дека нема „индиции дека сторила кривично дело“, објави радиото Ла Секста.