Daily news
САД со ракети нападнаа воздушна база во Сирија
Америка изврши ракетни напади врз воздушна база во Сирија, како одговор на наводниот хемиски напад кој се случи пред два дена во Иблиб, објавија светските медиуми.
Како што објави CNN од бродовите стационирани во Средоземното море кон Сирија биле испукани помеѓу 50 и 60 проектили од тимот „Томахавк“, а мета била пистата во воздушната база Шајрат, во западниот дел на Сирија, во околината на Хомс.
Од оваа база полетувале авионите на сириската армија за кои се верува дека учествувале во нападот со хемиско оружје во Иблиб.
Проектилите биле лансирани во 4:40 часот по сириско време.
Според првичните информации, проектилите ја погодиле метата, но засега нема информации колкава штета претрпела сириската армија.
Американците, според информациите од Пентагон, на Русите им проследиле сигнал да ги следат нападите, а неофицијално во базата која била цел на ракетните напади имало и руски војници.
Операцијата е извршена по наредба на претседателот Доналд Трамп, кој рекол дека „во витален интерес е САД да ја запре употребата и ширењето на смртоносното хемиско оружје“.
Трап, веднаш по првиот напад и се обратил на нацијата од неговата резиденција Мар-А-Лаго во сојузната држава Флорида, во која негов гостин е кинескиот претседател Си Џинпинг.
„Во вторникот диктаторот Башар ал Асад нареди да се изврши напад со хемиско оружје врз невини цивили. Во нападот е користен смртоносен гас, со кој беа загрозени животите на беспомошни мажи, жени и деца. Смртоносниот гас предизвика брутална и бавна смрт на поголем број на луѓе, вклучувајќи и деца, кои беа окрутно убиени во овој варварски напад. Ниту едно божје дете не заслужува такво нешто“, рекол Транп на почетокот на своето обраќање.
„Вечерва наредив да биде нападната воздушна база во Сирија. Од таа база беше извршен нападот со хемиско оружје. Нема сомнежи дека Сирија употреби хемиско оружје и дека ги прекрши меѓународните конвенции. Сите досегашни обиди да се смени однесувањето на Асад пропаднаа. Резултата на тоа е продлабочувањето на бегалската криза и понатамошна дестабилизација на регионот“, рекол Трамп.
Во нападот, во вторникот во покраината Иблиб, убиени беа најмалку 86 лица, од кои 30 деца, соопшти Сириската опсерваторија за човекови права. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.