Свет
Трамп ги критикуваше „силно политизираните“ судови во САД
Американските судови се силно исполитизирани, но тие мора да постапуваат исправно, изјава во средата претседателот Доналд Трамп ден откако апелациониот суд почна да го разгледува неговиот извршен указ за привремена забрана за влез на американска територија на државјани од седум мнозински муслимански земји, со што ја зајакна својата критика врз американскиот правосуден систем.
Тричлениот судиски одбор на апелациониот суд во Сан Франциско во вторникот почна да ги разгледува аргументите за и против привремената блокада на извршната уредба на претседателот Доналд Трамп, која ја донесе судијата на федералниот суд во Сиетл, Џон Робарт, а која важи на целата територија на САД. Се очекува дека судот својата одлука ќе ја донесе подоцна во средата.
„Не сакам да го нарекувам судот пристрасен. Па нема да ги наречам пристрасни. И засега немаме никаква пресуда. Но судовите, се чини, многу се политизирани. А би било добро за нашиот правосуден систем доколку тие би можеле да ја прочитаат изјавата и да го сторат тоа што треба“, изјави Трамп во Вашингтон на собирот со стотиците полициски началници и шерифи на големите американски градови.
На 27-ми јануари претседателот Доналд Трмап го потпиша извршниот указ 13769 „За заштита на земјата од влез на странски терористи“, со кој во рок од 90 дена се суспендира издавање визи за државјаните на седум муслимански држави: Иран, Ирак, Јемен, Либија, Сирија, Сомалија и Судан. Указот, исто така, и им наложува на Стејт департментот и на Министерството за национална безбедност да го суспендираат распоредувањето на бегалците по сојузните држави на 120 дена, како и на неодреден рок се суспендира прифаќањето бегалци од Сирија.
Апелациониот суд мора да одлучи дали Трамп дејствувал во согласност со своите овластувања или неговиот чин претставува дискриминација на муслиманите, иако во неговиот указ никаде не се споменуваат зборовите муслиман или ислам, како што предочи претставникот на министерството за правда кое заедно со министерството за внатрешна безбедност ја поднесоа жалбата против одлуката на судијата Робарт. Жалбениот суд ќе проценува дали неговата забрана е насочена на луѓето поради нивната религија, додека жалителите тврдат дека се мерки за подетална проверка и одбрана од можно влегување во САД на лица кои претставуваат терористичка закана.
Трамп пред полициските функционери потсети дека „доколку претседателот смета дека влегувањето во нашата земја на некои странци или одредени категории странци им наштетува на интересите на американскиот народ“, тогаш тој има право „да определи период во кој прифаќањето на лица од други земји ќе биде запрено“. Трамп истакна дека тие овластувања ѝ се дадени на Белата куќа за да ја осигури безбедноста на земјата.
„Доколку тие судии сакаат, според моето мислење, да му помогнат на судот по прашањето на почитувањето на судот, ќе го сторат она што е потребно“, додаде американскиот претседател. Претходно во средата на својот Twitter профил напиша: „Доколку САД не го добијат овој случај, што очигледно би требало, никогаш нема да имаме безбедност и заштита којашто ја заслужуваме. Политика!“. /крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.
Свет
Си-ен-ен: Сателитските снимки покажуваат дека во Исфахан нема поголеми штети
Според сателитските снимки од вселената до кои ексклузивно дојде Си-ен-ен, се чини дека нема поголема штета во воздушната база која наводно била цел на израелскиот напад во Исфахан.
Сателитски снимки се направени околу 10:18 часот по локално време. Се чини дека нема големи кратери во земјата и нема видливи уништени згради. Меѓутоа, за да се знае со сигурност дали има некаква штета, ќе бидат потребни дополнителни визуелни сателитски снимки, пишува Си-ен-ен.
Сликите не се како обичните сателитски снимки бидејќи се создадени од сателит кој испраќа радарски зраци кои можат да поминат низ облаците, како оние што моментално ги спречуваат сателитите да ја сликаат областа. Овие радарски зраци се одбиваат од објектите на земјата и се враќаат назад кон сателитот.
Иранската новинска агенција ФАРС објави дека една од можните цели бил воен радар во воена база во провинцијата Исфахан, а единствената штета од нападот се скршени прозорци во неколку деловни згради.
Сликите исто така покажуваат дека иранските F-14 Tomcats кои во минатото беа стационирани во воздухопловната база во моментов ги нема. Дополнителни архивски сателитски снимки прегледани од Си-ен-ен покажуваат дека тие F-14 Tomcats не биле таму некое време.