Европа
Британскиот закон за Брегзитот ја мина првата пречка
Британските пратеници, иако во мнозинство против, го одобрија напуштањето на Обединетото Кралство на Европската унија, а некои од нив притоа изјавија дека се сигурни оти прават „историска грешка“.
Во средата вечерата со 498 гласови „за“ и 114 „против“, британските парламентарци ја одобрија првата фаза од нацрт-законот што на премиерката Тереза Меј ќе ѝ овозможи да ги започне преговорите за истапување на Велика Британија од Европската унија. Расправата за текстот од законот ќе продолжи во долниот дом од парламентот следната седмица.
Но, како што пренесува AFP, во вестминистерскиот парламент атмосферата била необична. Дебатата била жива, на моменти и жестока, но надвладувало чувството за помирување со резултатите од сенародниот референдум на 23-ти јуни 2016 година, на кој британските избирачи во мнозинство се изјаснија нивната земја да ја напушти ЕУ.
Според податоците на британските медиуми, повеќе од две третини од британските пратеници на референдумот гласале против Брегзитот. Сега беа ставени пред дилемата: да ја почитуваат волјата на своите избирачи или да се поведат од сопствените уверување.
Повеќето од нив,и од левицата и од десницата во која имаше најмногу поделби околу напуштањето на ЕУ, истакнуваат дека „едноставно немаат друг избор“ и дека мора да ја почитуваат волјата на граѓаните, иако не се согласуваат со тоа.
„Бев одушевен поборник на останувањето во ЕУ и на тоа ја посветив својата работа во владата. Меѓутоа, со подеднаква доследност го бранам фактот дека сме демократија“, изјави поранешниот министер за финансии, Џорџ Озборн,.
„Бев против Брегзитот, но ќе гласам за нацрт-законот… Неки тоа го нарекуваат кукавучлук, а јас тоа го нарекувам демократија“, вели пратеничката од Лабуристичката партија, Ема Рејнолдс.
Некои пратеници познати „еврофили“ од лабуристите не можат да го прифатат раздружувањето од досега 28-члениот блок, иако гласачите во нивните изборни единици, посебно во Англија и во Велс, во голем број гласале за излегувањето од ЕУ. Повеќето незадоволници имаат намера да го прозват лани повторно избраниот партиски челник Џереми Корбин кој повика на прифаќање на текстот на нацрт-законот.
„Се бориме со совеста, тешко е“, изјави поранешниот челник на лабуристичката опозиција Ед Милибанд, со многу загрижен изглед, како што забележува AFP.
Наспроти тоа, евроскпетиците ова гласање го сметаат за повод за славење.
„Овој ден ќе влезе во аналите на британската историја, како ден кога ја потврдивме благородната, смела и славна одлука која народот ја донесе на тој историски ден 23-ти јуни летото Господово 2016-та“, истана конзервативниот пратеник Џејкоб Рис Мог, препознатлив по своите поетични изјави.
А пратениците од Шкотската национална партија (SNP) немаа дилеми, како и најголемиот број шкотски гласачи, решително се бореа против Брегзитот и гласаа против.
„Луѓето мислат дека долниот дом знае што прави, но единственото што го прави е да ги стискаат палците надевајќи се дека сето тоа ќе мине добро. Тоа е крајно неодговорно“, изјави незадоволниот пратеник од SNP, Ангус Брендан Мекнеил./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.