Европа
Полска: Поднесено тужбено барање против Туск во врска со падот на претседателскиот авион
Полскиот министер за одбрана Антониј Мачеревич изјави дека во полското обвинителство е поднесено барање во врска со криминални активности на актуелниот претседател на Европскиот совет, Доналд Туск, додека бил полски премиер, поради сомневањата за неговата вмешаност во истрагата за падот на претседателскиот авион крај руски Смоленск.
Во интервјуто за весникот Gazeta Prawna, министерот за одбрана Антониј Мачеревич, рече дека поранешниот премиер на Полска, Доналд Туск учествувал во заговор кој ѝ нанел штети на земјата.
„Никаква должност во полските или европските институции не го ослободуваат од одговорноста за тешките кривични дела за коишто се сомничи Туск“, вели министерот. Одговарајќи на прашањето кој треба да го поднесе тужбеното барање, Мачеревич одговара со „Тоа е веќе поднесено“, но притоа не прецизира кој го сторил тоа.
Како што пренесе полската јавна телевизија, Државното обвинителство на Полска потврдило дека од министерот за одбрана во понеделникот примиле барање коешто се однесува на „дипломатско предавство“. Притоа беше објавено дека „барањето е врзано со авионската несреќа крај Смоленск на 10-ти април 2010 година, како и за истрагата за причините и околностите за трагедијата“.
„Тужбеното барање потпишано од министерот за одбрана се однесува на 129 точки, за кои се предвидуваат казни до 10 години затвор за лица коишто во односите со влади на други држави или со странски организации ѝ нанеле штети на Полска“, прецизираше портпаролката на полското Државно обвинителство, Ева Бјалик.
На 10-ти април 2010 година во несреќата на авионот на тогашниот полски претседателски авион „Ту-154“ во близна на рускиот западен град Смоленск, при што загинаа сите 96 патници, покрај највисоките јавни, политички и воени личности и претседателот Лех Качински, братот близнак на Јарослав Качински челникот на сега владејачката партија Правда и справедливост (PiS).
Во истрагата за трагедијата ја водеа обвинителството на Полска, како и руската истражна комисија.
Во 2011 година полската владина комисија за истражување на околностите за несреќата воден од Јиржи Милер, наведе дека причина за падот е „симнувањето на авионот под минималната височина при преголема брзина во метеоролошки услови кои не овозможувале визуелен контакт со земјата, како и задоцнетото започнување на вториот круг“. Во извештајот на комисијата поднесен 15 месеци по трагедијата, меѓу причините за падот е спомената и грешка на екипажот кој го игнорирал системот за рано предупредување за судир со почвата, како и предупредувањата на белоруските и руските контролори на летот за лошите временски услови и маглата на аеродромот во Смоленск.
Меѓутоа, со ваквите заклучоци не се согласува партијата на Јарослав Качински. Откако оваа PiS уверливо победи на изборите во октомври 2015 година, нејзините претставници почнаа процедура за ревизија на експертската истрага, формираа поткомисија којашто ја обновува истрагата за авионската несреќа. Тие го обвинуваат Туск дека како премиер намерно носел погрешни одлуки во врска со страгата и соработката со руската страна./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.