Европа
Еврозоната порача дека новите преговори зависат од референдумот, Варуфакис тврди оти ги одобрилa новите предлози
Министрите за финансии на земјите од еврозоната извршија во средата притисок врз грчките гласачи и нивната влада, предупредувајќи дека преговорите за новата програма меѓународна финансиска помош зависат од резултатите од референдумот на кој Грците ќе се изјаснуваат за прифаќање или одбивање на предлогот на доверителите. Грчкиот министер за финансии, Јанис Варуфакис, пак, истовремено изјави дека Еврогрупата ги одобрила новите предлози на Атина за реформите, а ЕУ побарала повеќе детали за финансиските резултати.
„Ќе се навратиме на вашето барање за поддршка на финансиската стабилност и Европскиот стабилизациски механизам (ЕСМ), дури по и врз основа на исходот од референдумот“, порача претседателот на Еврогрупата (министрите за финанси од земјите на еврозоната – з.м.), холандскиот министер Јероен Дијселблом во писмото до грчкиот премиер Алексис Ципрадс, кој претходно во средата навечер во телевизиското обраќање до нацијата ги повика грчките избирачи да ги отфрлат досегашните услови за меѓународната помош.
Според тоа, условите за исплата на натамошните заеми би можеле да бидат построги, доколку Грците се изјаснат против предлозите на доверителите. Европските челници порачаа претходно дека изјаснувањето со „не“ би можело да го загрози опстанувањето на Грција во еврозоната, додека „да“ би значело поддршка на Европската унија. Се смета, исто така, дека поддршката за предлогот на доверителите би можело да значи и крај на петмесечното владеење на Ципрас и да му даде на Брисел пофлексибилен партнер за преговарање.
Писмото на Дијселблом е испратено како одговор на барањето на Ципрас за нов кредит кое само кусо време било разгледувано на состанокот на Еврогрупата која во средата навечер одржа телеконференција. Министрите се договориле дека повеќе нема да преговараат со Грција, додека не бидат познати резултатите од референдумот на 5-ти јули. Конференцијата се одржа кусо откако Ципрас во обраќањето на јавниот сервис повторно ја критикуваше „нивната уцена“ и ги повика Грците да им кажат „не“ на условите за програмата за помош, којашто инаку истече во вторникот откако по повеќемесечни преговори не беше постигнат договор.
Ципрас во вторникот, неколку часови пред истекот на програмата за помош и рокот Атина да ги плати ратите од 1,6 милијарди евра кон Меѓународниот монетарен фонд (ММФ), побара нејзино продолжување под условите слични на оние кои претходно во петокот му ги понудија доверителите, но со битни отстапки, вклучително и задржување на пониската стапка на данокот за додадена вредност за островите. Еврогрупата одговори дека писмото стигнало предоцна за да може да се продолжи програмата, и тоа откако Ципрас го одби предлогот и закажа референдум.
Европски извори за Reuters изјавиле дека во средата за писмото на Ципрас не било детално разговарано, но оти постои консензус да не им се одговара на барањата на должниците. „Во овој момент едноставно тие предлози ги примивме на знаење“, соопшти Дијслеблом во посебна изјава.
Хаосот кој ги следеше петмесечните преговори со контроверзните изјави продолжи и ноќта кон четвртокот, откако по соопштението на Еврогрупата, грчкиот министер за финансии Јанис Варуфакис изјави дека министрите за финансии порачале дека новите предлози на Грција се реформите биле направени во вистинска насока, но побарале повеќе детали за финансиските резултати, го цитираше весникот The Wall Street Journal./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.