Европа
Меркел: Мигрантите ќе ја променат Германија
Германија со доаѓањето на големиот број мигранти ќе се промени, оцени во понеделникот канцеларката Ангела Меркел, ветувајќи дека ќе работи на тоа сите тие промени коишто ги носи со себе големиот бран бегалци и мигранти да бидат „позитивни“ за земјата.
„Ова што сега го преживуваме, е нешто што ќе нé преокупира во претстојните години и тоа нé менува, а ние сакаме таа промена да биде позитивна. Веруваме дека ќе биде така“, изјави германската канцеларка Ангела Меркел за медиумите по „,многу емотивното и потресно“, како што оцени, доаѓање на 20.000 мигранти во текот на изминатиот викенд во Германија.
Канцеларката, исто така, истакна и дека ја „радува тоа што Германија станала земја којашто на луѓето им асоцира на надеж, и оти тоа, доколку се гледа преку нашето минато, е нешто многу вредно“.
Меѓутоа, конзервативната канцеларка заедно со вицеканцеларот и министерот за економија, социјалдемократот Зигмар Габриел, јасно порачаа дека толку големиот прилив на бегалци и мигранти „не може да падне само на грбот на неколку земји од Европската унија“ и истакна дека „итно е неопходен заеднички европски“ одговор на таа криза. „Германија, Австрија и Шведска не можат сами да ги прифатат сите бегалци“, рече, пак, Габриел.
Се очекува дека во понеделникот во Германија по копнен пат од Унгарија и Австрија ќе пристигнат уште 10.000 мигранти, изјави претставникот на регионалните власти кој дежура на главната железничка станица во Минхен.
Околу 2.100 баратели на азил пристигнуваат во Минхен со три чартер возови, додека другите ќе пристигнат преку коловозните патни правци со автобуси, појасни Кристоф Хиленбранд, челник на источните регионални власти на германската сојузна земја Баварија.
Изрази надеж дека некои од најавените возови ќе биде пренасочен кон другите германски сојузни земји, истакнувајќи дека споменатиот дел од Германија го достигнал максимумот во поглед на капацитетите за прифаќање на мигрантите и бегалците. Имено, од последните 20.000 мигранти коишто побарале политички азил, две третини се сместени во Баварија./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.