Европа
Шпанска болничарка се зарази со ебола, прва надвор од западна Африка
Шпанска болничарка којашто го лекуваше свештеникот во Мадрид кој почина од хеморагиска треска ебола во септември, исто така, се заразила и стана првото лице кое се зарази со овој вирус надвор од западна Африка, соопштија во понеделникот навечер шпанските здравствени власти.
Шпанската министерка за здравство Ана Мато изјави на прес-конференција дека е воведена постапката за вонредни состојби и дека властите настојуваат да го утврдат изворот на заразата. Претставници на болницата во која е хоспитализирана заболената медицинска сестра изјавија дека под надзор е ставен персоналот за кој се сомневаат дека биле во контакт со жената, иако засега не е познато ниту за еден други случај на зараза со ебола. Функционери од министерството за здравство рекле дека се вкупно под опсервација се ставени 30 здравствени работници кои се грижеле за шпанските мисионери заразени со ебола. Според нив, 44-годишната болничарка, која е омажена и има две деца, почнала да се чувствува лошо на 30-ти септември. Таа се грижеше за постариот свештеник Мануел Гарсија Виехо во мадридската болница „Карлос Трети“ откако беше вратен во татковината од Сиера Леоне каде што се зарази со вирусот на еболата. Гарсија Виехо почина на 25-ти септември, неколку дена подоцна откако друг шпански свештеник почина откако со истата болест беше вратен во земјата од Африка.Два болнички извора изјавиле за Reuters дека болничарката се лекува во болницата „Алкоркон“, во предградие на Мадрид, каде што се јавила на преглед во понеделникот со симптоми на грозница./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.