Распишани претседателските избори во Србија, Вучиќ главен фаворит

Распишани претседателските избори во Србија, Вучиќ главен фаворит

 

Претседателката на српското Собрание, Маја Гојковиќ во четвртокот ги распиша претседателските избори кои ќе се одржат на 2-ри април, додавајќи дека „програмите на кандидатите се од извонредно значење за понатамошната иднина на Србија и стабилноста на државата“, пренесуваат српските медиуми.

 

„Го повикувам граѓаните и им посакувам да го изберат најдобриот кандидат кој сериозно и одговорно ќе соработува со владата на Србија и кој заедно со нејзе ќе се бори за зачувување на политичката и економската стабилност, како и за слободата, независноста и суверенитетот на Србија“, рекла Гојковиќ.

 

„На кандидатите сакам да им порачам во кампањите да не ги заборават граѓаните на Србија, да ги почитуваат граѓаните на Србија и да сметаат на нивните гласови доколку им се обраќаат со програмата, а не преку омраза. Да се борат преку работа и одговорност, да ги почитуваат демократските процеси и волјата на граѓаните“, навела таа.

 

Владејачката Српска напредна партија го кандидираше својот лидер и премиер Александар Вучиќ, а за над застанаа и Социјалистичката партија и останатите помали партии кои учествуваат во владејачката коалиција.

 

Во јануари својата кандидатура ја истакна и Вук Јеремиќ, зад кого застанаа неколку пратеници од српското Собрание, а како сериозен кандидат може да се смета и српскиот омбудсман Саша Јанковиќ, кој е поддржан од страна на Демократската партија.

 

Меѓу првите кои ги објавија претседателските кандидатури за овогодинешните избори беа и лидерот на радикалите Војислав Шешељ и претседателот на движењето Двери, Бошко Обрадовиќ./крај/мф/бс