Руските и сириските специјалци успешно ја завршиле мисијата на спасува на навигаторот од рускиот бомбардер „Су-24“ кој во вторникот беше соборен од турски „F-16“ во Сирија, соопшти во средата рускиот министер за одбрана, генералот на армија, Сергеј Шојгу.

„Операцијата заврши успешно. Навигаторот е донесен во нашата база. Жив и здрав“, изјавил министерот Шојгу на колегиумот на министерството за одбрана, пренесува агенцијата РИА.

Шојгу истакнал дека операцијата траела 12 часа и им изразил благодарност на „нашите момци кои под голем ризик работеа цела ноќ“. „Во 3,40 часот (1,40 по македонско време) тие ја завршија работата“, истакнал Шојгу.

„За успешно завршената операција го известив врховниот командант (претседателот Владимир Путин). Тој ме замоли да им се заблагодарам на сите кои учествуваа во операцијата“, рекол Шојгу.

Во вторникот вечерта беше соопштено дека еден од пилотите на соборениот руски авион е убиен со оган од земја а по другиот се трага.

Сириските бунтовници од туркменските бригади, кои се сириски државјани а имаат турско етничко чувство и се поддржувани од Турција, тврдеа дека ги убиле двајцата руски пилоти. На интернет беше поставено видео на бунтовнички борци околу мртвото тело на рускиот пилот, кои извикуваат во слава на Алах и според преводот жалат што не го запалиле неговото тело. Неименуван турски владин извор за медиумите изјави во вторникот вечерта дека двајцата пилоти можеби се живи и дека Анкара работи на нивно ослободување.

Москва тврди дека рускиот авион бил гаѓан над територијата на Сирија, на најмалку еден километар од воздушниот простор на Турција. Местото на падот на „Су24“ е четири километри во сириска територија.

Во спасувачката мисија сириските сунитски бунтовници кои ги подржува Западот и Турција со ракета уништија руски хеликоптер кој бил во спасувачка мисија во покраината Латакија, откако хеликоптерот бил погоден, а притоа загинал еден руски маринец поради што Русија ги групира силите во споменатата област и предупредува дека ќе уништи сé што ќе го смета за потенцијална закана.

Бунтовничката група која е вооружена со американски ракети „Tow“ тврди дека нејзините припадници во лет погодиле руски хеликоптер со противтенковска граната. На видео снимка објавена подоцна, чија автентичност не е потврдена, се гледа како друг бунтовник го разнесува хеликоптерот со уште една ракета.

Хеликоптерот од типот „Ми-8“, кој бил ангажиран во спасувачка мисија во Сирија бил погоден при што еден припадник на поморската пешадија е убиен, изјави началникот на операциите на рускиот Генералштаб, генерал-полковникот Сергеј Рудскиј. Тој потврдил дека леталото подоцна е уништено.

Во спасувачката операција на местото на приземјување на руските пилоти од претходно соборениот „Су-24“ учествувале два хеликоптера „Ми-8“.

Според Рудској, рускиот Генералштаб презема дополнителни мерки да се осигури безбедноста на руската воздухопловна база. Прво, сите активности на ударната авијација ќе бидат извршувани под закрила на борбени авиони. Второ, се преземаат мерки за зајакнување на противвоздушната одбрана. За таа цела крстосувачот ‘Москва’, засилен со системот ‘Форт’ (поморска варијанта на С-300), ќе заземе позиција крај брегот на Латакија./крај/мф/сн

Извор: Макфакс