Daily news
(ВИДЕО) Кристине Алтхаузер: Договорот со Бугарија е „вин вин“ ситуација
Германската амбасадорка Кристине Алтхаузер во интервјуто за Макфакс пред да замине на нова мисија во Шангај, порача дека две клучни работи што се случиле додека беше во Македонија се манифестираната желба за создавање различно општество и големото учество на граѓаните во тоа. Околу дилемата дали поранешниот премиер Никола Груевски е веќе политичка историја за Македонија или треба да му се верува дека ќе се врати на власта, таа вели:
„Поранешниот премиер сè уште е лидер на најголемата опозициска политичка партија. Партиските членови се тие што треба да разговараат за ова прашање. Во земјава се зборува многу за рестартирање на проближувањето кон ЕУ, за рестартирање на приближувањето кон НАТО така што можеби треба да има рестартирање и внатре во политичките партии. Но, како што реков, тоа ќе го решат партиските членови и самата партија.
Веќе реков дека за танго се потребни двајца, а и вие имате прекрасен македонски танц „оро“. Учеството повторно е клучен збор. Потребно е учество на сите политички партии, инаку ќе биде многу тешко да се проследи идната работа. За да се успее ќе бидат неопходни и Владата, и Парламентот и опозицијата, и граѓанското општество и другите актери“.
На прашањето дали ВМРО-ДПМНЕ може да биде конструктивна, имајќи ја предвид опструкцијата со десетте парламентарни групи, Алтхаузер порача дека тоа е нешто ново и изненадувачко за неа, но дека од друга страна, членови на ВМРО-ДПМНЕ застанале исто така зад планот 3-6-9 на владата на Комисијата за надворешни работи минатиот петок, така што треба да се почека со заклучоците. За мене нагласи таа една „една партија никогаш не постои преку еден лидер туку и преку другите членови“, навестувајќи потоа возбудлива политичка есен во Македонија.
Потезите на новата влада Алтхаузер ги оцени како храбри, и во односот кон Бугарија и Грција, и на внатрешен план. На забелешката дека договорот со Бугарија предизвикува многу негативни реакции во земјата, Алтхаузер со контра став:
„Да, но има исто така и многу позитивни. Многу храбар чекор е да тргнете со други односи кон соседите, а исто така и многу проективно. По сè, ова е ‘вин вин’ ситуација за сите земји во регионот. Донесов лист хартија на кој стои нашата изјава на самитот на Групата 20 во Хамбург за тоа како да се обликува поповрзан свет. Насловот е дека можеме да постигнеме повеќе ако делуваме заеднички отколку ако делуваме поединечно. Тоа е вистина за секаде, па и за овој регион.Така што, за да се дојде до поголемо разбирање со Бугарија, ова е голем чекор напред. Ви посакувам сè најдобро на почетокот на август. Потпишувањето на договорот и прославувањето да се случат на соодветен начин“, вели таа.
За спорот со името таа оценува дека е многу комплицирано прашање и дека не се однесува само на името туку и на идентитетот, и многу други работи. Германија, рече таа, е подготвена да помогне ако се побара од неа, но пред сè решението треба да дојде од двете засегнати земји.
Прашана која е смислата Велика Британија да биде следниот домаќин на самит на ЕУ за Западен Балкан, кога во исто време ќе води преговори за излегување од Унијата, Алтхаузер вели дека на терен имаат многу добра соработка со оваа земја и дека таа е многу заинтересирана и посветена на овој регион, така што нејзиното добро искуство треба да се искористи.
Околу дилемите за Скопје 2014, поточно дали треба да се уриваат дел од спомениците или не, и паралелата со Германија, која урна повеќе објекти од времето на ДДР, вклучувајќи го и Берлинскиот зид, Алтхаузер вели дека двете ситуации не се споредуваат. Како реалноста може да даде неочекувана нова содржина на спомениците од историјата, таа го посочи примерот со споменикот на Карл Маркс во неговиот роден град Триер во Германија, кој станал таква голема атракција за кинеските туристи што Кина побарала да изгради уште еден, многу поголем во истиот град. Дебатата дали да се дозволи тоа или не, според неа, сè уште трае во Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.