Македонија
(Видео) Дождот не ги спречи подготовките, се поставува видео – бим за следење на ракометот
На влезот на „Сити галери“ на плоштад Македонија и на дожд се монтира видео-бим за заедничко следење на ракометниот натпревар на „Вардар“ вечерва. Видео – бимот ја покрива фасадата на „Сити галери“, а оние кои ќе решат да го послушаат повикот на Град Скопје за заедничко следење на натпреварот, ќе го користат просторот меѓу „Сити галери“ и „Пелистер“.
Од Град Скопје велат дека нема да го користат централно поставениот екран на плоштадот, кој исто така е на фасадата на „Сити галери“, но гледа кон МЕПСО оти е на приватник кој ја наплатува услугата, а освен тоа подната фонтана на плоштадот се подготвува за прскање па поради тоа се извадени дел од плочките и целиот простор е ограден со железна ограда. Од Градот решиле организацијата на заедничкото следење на ракометниот натпревар да ја препуштат на Младинскиот културен центар кои имаат соодветна опрема за вакви настани.
Русе Арсов, директор на МКЦ, вели дека имале само неколку часа да се организираат за настанот.
„Ја одбравме оваа локација, на влезот на ‘Сити галери’ од безбедносни причини. Ова е настан што го организираме без најава, имавме само неколку часа за подготовка. Синоќа до доцна имавме настан, а веќе денес дел од вработените повторно се ангажирани за видео-бимот. Тој е на компанијата ‘ДВД ПРО’ со која веќе имаме договор за соработка. Можно е да бидат издвоени дополнителни средства за нивното ангажирање и за овој настан, но тоа ќе биде незначителна сума“, вели директорот Арсов.
И покрај дождот што почна да врне во Скопје, работниците од „ДВД ПРО“ ја донесоа опремата и почна да го монтираат видео-бимот. Околу „Сити галери“ се паркирани камиони, коли, комбиња со кои беше донесена опремата, а дојде и цистерна на противпожарната бригада која донесе вода со која беа наполнети платформите за видео–бимот.
За оние што ќе решат да дојдат на заедничко следење на натпреварот, МКЦ постави и пет мобилни тоалет кабини пред „Сити галери“.
Вардар вчера се пласираше во финалето на Лигата на шампиони со победата на Барселона. Во финалето игра со Веспрем, а натпреварот, кој ќе се пренесува на видео – бим поставен на некогашната стоковна куќа, почнува во 18 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бојмацалиев: Една година ФРОНТЕКС – прв договор потпишан на македонски јазик со ЕУ
Дополнителниот заменик-министер за внатрешни работи, Митко Бојмацалиев, заедно со директорот на Бирото за јавна безбедност, Сашо Тасевски, и државната секретарка, Магдалена Несторовска, оствари работна средба со раководството на Регионалниот центар за гранични работи „Југ“ по повод одбележувањето една година од почетокот на мисијата на ФРОНТЕКС во Република Северна Македонија, а со цел промоција на соработката помеѓу претставниците на ФРОНТЕКС во локалниот координативен центар и одговорните старешини од РЦ за ГР ЈУГ, како и промовирање на европскиот пристап на координирање на сите заеднички активности и справување со предизвиците.
„Одбележуваме една година од работата на макеоднската полиција заедно со ФРОНТЕКС, со цел да ги одбраниме нашите и границите на ЕУ од прилив на мигранти. Тоа успешно го правиме од 2015 до денеска. Договорот е од историска важност, тогашниот министер Оливер Спасовски ја имаше честа да го потпише со Европската Унија и ја отвори вратата за поинтензивна оперативна соработка заснована на доверба и меѓусебно почитување“, истана Бојмацалиев во изјава за медиумите заблагодарувајќи се до Тасевски и Несторовска за напорите што ги направија договорот да биде на македонски јазик и успешно да функционира во нашата држава.
„Со тоа уште еднаш покажуваме дека македонската полиција е рамо до рамо со европските полиции, заедно работиме и од неодамна имаме барање од други полиции да вршиме обуки на нивните службеници како се справуваме со миграцијата. Од земја што бараше помош од другите држави за справување со миграцијата, сега нудиме помош“, рече Бојмацалиев.
Македонија
Ковачки ги повика неопределените да гласаат: „ Да се обединиме за идејата ‘Македонија повторно твоја’“
Народот е подготвен и обединет за промени, приклучете се кон ВМРО-ДПМНЕ за да ја поразиме оваа ненародна и криминална влада на СДС и ДУИ, порача Драган Ковачки, член на ИК на ВМРО-ДПМНЕ и носител на изборна единица 3.
„Денеска сме во Кратово, Ранковце и Крива Паланка. Тука сме да презентираме проекти од Платформата 1198, ќе поразговараме со сите граѓани. Ги повикувам сите граѓани кои сеуште не се определиле и кои што ја чувствуваат позитивната енергија која што доаѓа од ВМРО-ДПМНЕ, да се обединиме околу идејата за Македонија повторно твоја, да се обединиме околу проблемите“, рече Ковачки.
Како што додаде вчерашниот митинг во Охрид покажал дека народот е подготвен и обединет за промени, а ВМРО-ДПМНЕ е партија за македонско национално единство.
Македонија
Успешна сложена дентална операција – изведена транспозиција на нерв
Вчера, успешно заврши сложениот хируршки зафат – транспозиција на нерв на пациент од земјата.
Оваа комплексна техника ја изведе искусен хируршки тим под водство на професор Мазен Тамими од САД, роден во Јордан.
Интервенцијата се изведе во присуство и во приватната специјалистичка ординација на реномираниот орален хирург и имплантолог од овие простори – Дијана Бојковска. Пациентот е во стабилна состојба, се чувствува добро, но претстои период на целосно заздравување по извршување на операцијата поради прилично атрофираната долна вилица.
Видеоприказ од интервенцијата ќе биде емитуван во рамките на меѓународниот имплантолошки конгрес, кој почнува денес во хотелот „Хилтон“ во Скопје, а ќе трае до 20 април. Напредната хируршка техника првпат ќе биде споделена со пошироката стручна јавност од земјата, но и од светот, бидејќи на конгресот ќе учествуваат врвни стоматолози, орални и максилофацијални хирурзи од четири континенти.
Дигитализација во стоматологијата и новите трендови во имплантологијата се дел од темите што ќе бидат во центарот на вниманието на овој конгрес. Конгресот предвидува теоретски, практичен дел и презентирање напредна хируршка техника во делот на имплантологијата.
Еминентни стоматолози специјалисти од Македонија исто така ќе земат активно учество на конгресот: д-р Митко Франгов, орален хирург и меѓународно лиценциран имплантолог, д-р Златко Вршковски, максилофацијален хирург и меѓународно лиценциран имплантолог, д-р Недим Касами, максилофацијален хирург и имплантолог, д-р Петар Вршковски, орален хирург и имплантолог, д-р Дијана Бојковска, орален хирург и имплантолог.
Во Македонија првпат стоматолозите учесници на конгресот ќе бидат дел од меѓународно акредитирана имплантолошка едукација и ќе добијат CME – европски кредит-поени.