Контакт

Анализи

Шпигел: Успехот на Ердоган – благослов или клетва за Турција?

Објавено пред

Каква е Турција сега, по осум години владеење на Ердоган, споредено со времето кога стана кандидат за членство во ЕУ

Партијата на правдата и развојот (АКП) повторно победи на парламентарните избори во Турција на 12-ти јуни, со што досегашниот премиер Реџеп Таип Ердоган го доби и третиот мандат на функцијата. Каква е Турција сега,  по осум години владеење на Ердоган, споредено со времето кога стана кандидат за членство во ЕУЗборовите на Ердоган јасно ставаат на знаење дека тој е мајстор во политиката со долгогодишно искуство. Тој повеќе не е во потрага по теми кои би ги задоволиле гласачите и би биле толерирани од војската. Кога денес тој држи говор, секој збор има тежина. А, кога ќе каже нешто провокативно, како што е нарекувањето на лидерот на опозицијата „полуверник“, обвинувањето на генерали за предавство или пораката до израелскиот претседател дека „кога се работи за убивање, вие многу добро знаете како се прави тоа“ – тоа повеќе не се гафови. Всушност, тој точно знае што прави.Ердоган, кој пораснал во истанбулската населба Касимпаша, уште во времето кога таа беше само обична депонија, сега е на власт подолго од американскиот претседател Барак Обама, германската канцеларка Ангела Меркел, францускиот претседател Никола Саркози, како и од повеќето лидери со кои се среќава на самитите на Г-20. Ердоган постигна многу. Тој им ја одзема борбеноста на високите армиски офицери, ги деморализираше секуларните елити и ги доведе во ред кралевите на памукот и тајкуните на цементот, кои, на времето толку другарски ја делеа земјата со генералите. Тој ја изгради Турција од, традиционално земја на воени удари и кризи, во регионална сила. Тој е сериозно сфатен како битен играч и од Лондон и од Вашингтон, исто како и во Ријад и во Пекинг. Па, дури и Израел – со кого се почесто се „’рва“, на големо задоволство на Арапите – со големо внимание го следи секој негов чекор. Ердоган на Турците, дури и на оние кои не можат да го поднесат, им обезбеди самодоверба која до сега им недостасуваше. Економски достигнувањаОтоманската империја некогаш беше нарекувана „Болниот од Босфор“, но денес Турција се чини многу, многу здрава. По осум години на Ердоган, таа е многу побогата и помодерна од земјата која аплицираше да и се приклучи на, како што беше тогаш наречена, Европска заедница, пред 20 години. Нејзината економија расте три пати побргу од економиите на останатите европски земји. Промените почнаа во 2002 година, кога на власт за првпат дојде Партијата за правда и развој (АКП) на Ердоган. Жестоката финансиска криза во 2001 година ја доведе земјата на работ на пропаст. Кемал Дервиш, турски извршен функционер во Светската банка, чие име се споменуваше за можен наследник на Доминик Строс-Кан на челната позиција на ММФ, тогаш понуди масивна програма за реструктуирање на долговите. Владата на АКП ги собра плодовите од неговиот труд. До 2007 година, просечниот раст на Турција се искачи на шест проценти, а ретко која друга држава заздраве од глобалната финансиска криза во 2008 и во 2009 година со толкав успех како Турција.За разлика од неговите духовни претходници, кои сонуваа за „исламски економски поредок“, Ердоган не смета дека капитализмот и Исламот се контрадикторни. Воден од интересите на растечката муслиманска средна класа, најбитната гласачка група за АКП, новиот премиер тогаш се зафати да ја отвори економијата на Турција.Минатата година Турција достигна раст од девет проценти. Невработеноста падна на 11 проценти, инфлацијата сега е на шест проценти, а најновите бројки покажуваат дека јавниот долг е 41 процент од бруто-домашниот производ – параметри на кои би можеле да им завидуваат повеќето членки на Европската унија. Приходот по глава на жител тројно се зголеми од кога на власт е Ердоган. Британскиот магазин The Economist ја нарече земјата „Кина на Европа“. Единствената грижа на Ердоган по третата изборна победа е тоа што економијата се прегрева, дека Турците и купуваат и произведуваат премногу, и дека увозот е толку голем, што дури го надмина и растечкиот извоз на земјата. „И покрај небалансираноста“, пишува Wall Street Journal, „силата на турскиот раст е одржлива. Приказната за растот може да продолжи“. Намален наталитетПовеќето Европејци Турците ги сметаат за чудни луѓе кои имаат премногу деца. Но, дали клишето за „демографската бомба“, еден од најомилените аргументи на оние кои му се спротивставуваат на членството на Турција во ЕУ, е се уште вистинито? Турција, за разлика од европските општества кои стареат, има многу здрава популациска пирамида, која наликува на оние на САД и на Канада. Во последните години, стапката на раст на наталитетот падна на 2,1 дете на секоја жена. Ваквиот развој се должи на растечката добросостојба и подобреното ниво на образование. Демографите дури предвидуваат и намалување на населението на Турција, кое би започнало во 2030 година, што го натера Ердоган да изјави дека во иднина секоја Турчинка ќе мора да има најмалку три деца. Но, турските жени немаат никаква намера да им се потчинат на неговите желби.Економски гледано, на Турција воопшто не и е потребна висока стапка на наталитет. Просечната возраст во моментов е 29 години (споредено со 43 во Германија), а секоја година околу 700.000 нови дипломирани студенти влегуваат на пазарот на трудот. Турција ја има речиси најточната стапка на обнова која и е потребна за стабилен економски раст: не премногу ниска и не премногу висока. Како и да е, сценаријата за претерана популација на вознемирените Европејци се претерани.Но, најсилниот аргумент во корист на аспирациите на Турција за влез во ЕУ е нешто сосема друго. Американците и Британците го користат со години, па дури и Германците, како поранешниот министер за надворешни работи Јошка Фишер и поранешниот канцелар Герхард Шродер. Тоа е геостратешки аргумент и вели вака: која подобра алатка ја има ЕУ на располагање за да влијае на развојот на настаните во исламскиот свет од добрите односи со најмодерната исламска нација, Турција? Добри односи со соседитеДенес Анкара има добри односи со речиси сите нејзини соседи. Во последниве години, турските дипломати учествуваат во преговорите во престолнината на Азарбејџан, Баку, за изградба на гасоводот „Набуко“, во Техеран за иранската нуклеарна програма и во Триполи, со разнишаниот режим на Гадафи. Турските бизнисмени градат аеродроми во северен Ирак, облакодери во Мека и погони за десаланизација на морска вода во Либија. Оваа нова надворешна и економска политика е наречена „нео-отоманизам“, уште еден термин кој буди вознемиреност на Западот. Дали Турците се обидуваат повторно да ја изградат империјата која го контролираше Блискиот исток 400 години?Лојални кон сојузницитеВаквите стравови се претерани. Најмногу што ќе се материјализира од сето ова е лабав комонвелт на поранешни отомански провинции. Она што е важно е дека турскиот пример кој се пренесува во политички заостанат регион е доказ дека дури и исламска влада може да биде демократска и дека не се потребни приходи од нафтата за да се постигне благосостојба. Врските на Турција се, исто така, битни. Од Багдад до Триполи, тие разговараат со радикалните групи и индивидуалци со кои Западот одбива да разговара, или од фундаментални причини или од политички обѕири кон Израел,но кои еден ден можеби ќе мораат да соработуваат. Се чини малку веројатно дека Турција ќе му го сврти грбот на Западот. И покрај сериозните кризи, Анкара не ги прекина односите со Изарел. И, иако се почувствуваа безобразно прескокната од Франција при воената операција против режимот на Гадафи, премиерот Ердоган не се повлече од западната алијанса. Наместо тоа, Турција си го одработи својот дел во имплементацијата на резолуцијата на Советот за безбедност на ОН за Либија – всушност, со поголема посветеност од онаа на Германија. Ова е едната страна на денешна Турција: економски силна, со самодоверба и лојална кон своите сојузници. (Зло)употреба на моќта Премиерот Ердоган, вели Седат Ергин, долгогодишен шеф на анкарското дописништво на турскиот дневен весник „Хуриет“, во првиот мандат пред осум години влезе со голема претпазливост. Тој им се спротивстави на непријателите во армијата, во стопанството и во печатот, но исто така кон нив се однесуваше со почит. Но, смета Ергин, сето тоа се сменило по втората изборна победа во 2007 година, кога почна да ја (зло)употребува моќта на државата.Ергин многу добро знае што зборува. Колку покритични беа одредени весници кон владата, толку кабинетот на премиерот, „башбаканлик“-от, поостро возвраќаше. Еден карикатурист кој се осмели премиерот да го претстави како мачка се соочи со судски процес. Набргу по ова, истото му се случи и на еден друг карикатурист, кој го нацрта Ердоган како крвожеден тафтабит на грбот на еден угледен граѓанин, како коментар на владината даночна политика. Групацијата „Доган“, која е сопственик на весникот „Хуриет“ и на турскиот оддел на американската информативна телевизија CNN, беа под особено силен притисок. Во 2009 година, една дузина даночни инспектори влегоа во компанијата. Кога завршија со ревизијата, на „Доган“ му беше наложено на владата да и плати околу 2,2 милијарди евра. „Тоа е проблемот со Ердоган. Тој се поарбитрарно ја користи моќта на државата за да ги промовира своите политички интереси. Веќе не остана никој кој ќе го стави под контрола“, заклучува Ергин. Тешки вистиниНа крајот, аргументот дека Турција треба да и се приклучи на ЕУ се позиционира малку зад оној дека треба да остане вечен кандидат и е рефлексија на измешаните чувства кои Европејците ги имаат кон својот комплициран сосед со децении. Како и да е, од рационална гледна точка, дали аргументите „за“ ќе надвладеаат над оние „против“ ако Турција треба да стане членка на европското семејство? Нели земјата постигна импресивен напредок во изминативе 12 години, од моментот кога и формално стана кандидат за членство и ги започна своите напори да ги задоволи европските критериуми? И нели поблиски односи со Европа би биле најдобриот начин да се спречи овој процес да ретерира? Поверојатно е дека Европејците и Турците ќе минат уште многу години во дискусии за заедничките цели, но без ниту еден од нив да ги искаже двете вистини кои досега на сите им се јасни: дека Европа не ја сака Турција – и дека наскоро Европа повеќе нема да и биде потребна на Турција. /крај/шпигел/



©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Анализи

Силјановска vs Пендаровски: Кој добива, а кој губи во битката на социјалните мрежи и медиумите?

Објавено пред

Претседателските кандидати Стево Пендаровски и Гордана Силјановска-Давкова најмногу се спомнуваат во медиумите, а најмалку се популарни меѓу твитерџиите. Во негативен контекст почесто е споменувана Силјановска на социјалните мрежи „Феjсбук“ и „Твитер“, но и во медиумите.

Ова го покажа првата сентимент-анализа на истражувачкиот центар на „Макфакс“, која се изработуваше во периодот од 1 до 9 април годинава. Процесот на изработка на анализата е базиран на компјутерски алгоритми и има задача да одреди во каков контекст (многу негативен, негативен, неутрален, позитивен или многу позитивен) е напишан одреден текст или дел од текстот.

Преку системот беа анализирани 220 медиуми, како и објавите и коментарите на над еден милион корисници на „Фејсбук“ и твитовите од 300 илјади профили. Тестирањата на платформата покажaа дека користените технологии даваат резултат со точност поголема од 80 проценти.

Според анализата, имињата на Силјановска-Давкова и на Пендаровски почесто се споменуваат во медиумите отколку на социјалните мрежи „Твитер“ и „Фејсбук“. Во првите девет дена од месецот тие биле споменати вкупно 3.515 пати. На „Фејсбук“ биле споменати речиси двојно помалку, а најмалку биле споменувани на „Твитер“.

Силјановска, според оваа анализа, најмногу била спомената на веб-порталите „Република“, „Курир“, „Инфомакс“ и на „Прес 24“, а Пендаровски на „Прес 24“, „Макпрес“, „24 инфо“ и на „Вечер“. Од инфографикот може да се види комплетната слика за тоа во кој медиум биле најмногу застапени двајцата претседателски кандидати.

Во однос на контекстот на споменување во медиумите може да се заклучи дека постои тесна разлика меѓу Силјановска и Пендаровски, иако кандидатката зад која стои опозициската ВМРО-ДПМНЕ предничи со негативните коментари.

Па, така, во многу негативен контекст Силјановска била спомената 201 пат, а Пендаровски 136 пати. Ако таа била спомната 914 пати во негативен контекст, Пендаровски во истиот контекст бил спомнат 778 пати. Тој предничи и во однос на неутралните спомнувања во медиумите, а Силјановска предничи во однос на позитивните споменувања. Тесна е разликата меѓу многу позитивните конотации, во кои биле ставени двајцата претседателски кандидати на кои се однесува анализата, во која за 8 споменувања предност има Пендаровски.

Според податоците од аналитичкиот центар на „Макфакс“, претседателскиот кандидат Пендаровски е попопуларен од Силјановска во однос на бројот на споменувања. Во многу позитивен или позитивен контекст меѓу твитерџиите тој е споменат 231 пат, а Силјановска 201. Во однос на тоа дали кандидатите се споменати во негативен или многу негативен контекст за нијанса води Силјановска, која е спомената 401 пат, а Пендаровски 389.

Слична ситуација може да се види и на „Фејсбук“, каде што Пендаровски има предност во однос на бројот на споменувања. Ако Силјановска била спомената 481 пат во многу негативен или во негативен контекст, Пендаровски е споменат 429 пати. Кај претседателскиот кандидат зад кој стои СДСМ поголем е бројот на позитивни или многу позитивни споменувања на социјалната мрежа „Фејсбук“.

Според сето ова, Силјановска има поголема вредност на вкупниот сентимент во негативен контекст на социјалните мрежи и во медиумите од Пендаровски. Важно е да се потенцира дека не станува збор за анкета што ги мери гласовите за кандидатите, туку за начинот на кој тие се прикажани и коментирани во интернет-просторот. Истражувачкиот центар на „Макфакс“ на почетокот на кампањата за претседателските кандидати спроведе анкета.

Целосната методологија за начинот на изработката на сентимент-анализите на истражувачкиот центар на „Макфакс“ е достапна на следниот линк.

Прикажи повеќе...

Анализи

СЈО со детали: Како Камчев и Мијалков ги переле парите градејќи империја

Објавено пред

Злосторничко здружение, кое функционирало повеќе од 8 години, од 2009 година, кога биле отворани и затворани фирми, перени милиони и милиони евра, биле менувани сопственици, бил купуван огромен имот, отворани фирми на офшор-дестинации за еднократна употреба, префрлувани пари преку кипарски банки, а потоа овие испрани пари влегуваат како основачки влогови за да формираат македонски фирми.

Вака накусо може да се опише случајот „Империја“ на специјалното јавно обвинителство (СЈО), каде што, меѓу другите, осомничени се едни од највлијателните луѓе во земјата, бизнисменот Орце Камчев и поранешниот директор на УБК, Сашо Мијалков.

Три месеци по почнувањето на истрагата, обвинителството излезе со детали за еден од најобемните предмети за кој засега е утврдено дека се испрани речиси 11 милиони евра.

Истрагата е проширена за „Графички центар“ и за „Медија принт Македонија“ (МПМ), извршени се претреси во фирмите, осомничените се испрашани и собрани се докази.

Соработката меѓу Македонија и Кипар е воспоставена, па сега, конечно, на виделина излегуваат и имињата на оние што се криеле зад офшор-фирмите преку кои се переле пари.

Од крајот на јуни до крајот на октомври 2018 година некои од осомничените од „Империја“ биле под посебни истражни мерки.

„Мијалков не беше под посебни истражни мерки, Камчев многу внимателно зборуваше по телефон, но не и другите осомничени“, велат од СЈО.

Без разлика како ќе се одвива понатаму истрагата за „Империја“, со оглед на тоа што статусот и истрагите на СЈО сè уште се неизвесни, оттаму велат дека собрани се речиси 90 отсто од доказите за случајот да може да продолжи понатаму.

Злосторничкото здружение се распаѓа кон крајот на 2017 и почетокот на 2018 година кога осомничените почнуваат да земаат кредити за да се раздолжат, но тоа не значи дека тука завршуваат и нивните поединечни активности.

Под лупа на СЈО е и фирмата поврзана со семејството Мијалкови, „Бест веј инвестмент“, формирана веднаш по обеледонувањето на таканаречените бомби во 2015 година, чиј сопственик е синот на Сашо Мијалков, Јордан. СЈО истражува како се ширел бизнисот и како оваа фирма успева да заработи огромни суми и да стекне голем имот само за три години работа. „Бест веј инвестмент“, ако во 2016 година имала приходи од 816 илјади евра, во 2017 година веќе приходите ѝ растат на 9,6 милиони евра, што само покажува дека независно кој е на власт, бизнисите на Мијалков работат со полна пареа.

Краен сопственик на мистериозната „Ексико“ бил Камчев

Натписот на поштенското сандаче на улицата Иван Милутиновиќ во Скопје сведочи за постоењето на „Ексико“, чие сопствеништво е скриено

Центарот на истрагата за „Империја“ се познатата офшор-фирма „Ексико“ и бизнисменот Орце Камчев.

Истрагата утврдила дека зад првата фирма-мајка на „Ексико“, „Делта инвестмент“ од Белизе, всушност се крие таткото на Орце Камчев, Илија. Од оваа фирма, која поседуваше акции во големи акционерски друштва, а се јавуваше и како еден од сопствениците на атрактивните плацови на Водно, досега сите креваа раце и демантираа дека стојат зад неа.

Истрагата на СЈО утврдила дека по Илија Камчев, набргу како краен сопственик фигурирал и поранешниот директор на македонски „Телеком“, Жарко Луковски, а кога сопствеништвото на фирмата се сели во Америка, односно сопственик станува извесна „Калвус ЛЛЦ“ (Calvus LLC) од САД, крајниот сопственик е всушност Орце Камчев.

Од оваа американска фирма кон „Ексико“ се влеваат 1,6 милион евра како прилив, а дел од овие пари завршува на личната сметка на Камчев, додека со дел се купувани имот и земјиште во Гевгелија, на кое понатаму е предвидено да се градат казина.

Подоцна, а и до ден-денеска, сопственик на „Ексико“ е фирмата со швајцарски капитал „Т&МЈ инвестмент“ од Лугано, Швајцарија, фирма зад која оперативните сознанија покажале дека краен сопственик е член на семејството Мијалкови. Од швајцарската фирма кон македонската „Ексико“ немало никаков прилив или одлив на пари.

„Ексико“ не е единствената фирма преку која функционирало ова злосторничко здружение. Колку за пример, во истатата 2009 година офшор-компанијата „Хоспитал менаџмент груп ЛЛЦ’ од Кипар ја основа клиничката болница „Систина“. Понатаму, оваа компанија го продава имотот на друга офшор-компанија од Панама. „Орка холдинг“ го купува уделот од панамската, па повторно ѝ го продава на „Систина“, со што фактички Камчев внесува удел од „Хоспитал менаџмент“ од Кипар во Македонија.

Сомнежи за перење пари преку кипарски банки

Преку кипарски банки парите влегуваат во земјата

Значаен дел од истрагата на СЈО за „Империја“ има и фирмата „Финзи“ – истата фирма за која во таканаречените бомби можеше да се слушне дека одела набавката за опрема за следење интернет-комуникации за МВР. Министерството, додека на чело на УБК беше Мијалков, наместо директно да ја набави изреалската опрема за прислушување, тоа го правела преку „Финзи“. Во текот на истрагата за случајот самоубиство изврши директорот на „Финзи“, Коста Крпач, во април 2016 година.

Сега истрагата за „Империја“ повторно допира до „Финзи“, фирма основана од „Финзи ЛЛЦ“ во САД. Краен сопственик на оваа компанија, според СЈО, повторно е Орце Камчев.

Во неколку наврати од „Финзи ЛЛЦ“ преку кипарска банка кон македонската „Финзи“ биле исплатувани 650.000 евра. Во тоа време, односно во 2009 година, директор на „Финзи“ во Македонија е Владислав Стајковиќ, брат на Небојша Стајковиќ, поранешен помошник-министер за информатичка технологија во МВР.

Овие пари понатаму влегуваат како основачки влог во „Систина кардиологија“, фирма што подоцна е преименувана во „Си-Фи-Кар“ („Систина“, „Финзи“, “Кара“). Во 2012 година, според СЈО, кога парите веќе се испрани, американската мајка-фирма се затвора и се отвора нова фирма, во која Крпач влегува како директор, а на истата сметка легнуваат парите од израелската донација за опрема за прислушување.

„Не купуваат компании за да работат со нив, туку за да извлечат што можат“

Орце Камчев и Сашо Мијалков, клучните играчи во „Империја“

Многу компании, офшор, стотици папки со документи и изјави од сведоци содржи еден од најобемните предмети на СЈО – „Империја“. Од она што беше претставено пред новинарските екипи, неизбежен е заклучокот дека од досегашната истрага и собраните докази станува збор за класични примери за сомнежи за перење пари пред кои надлежните институции со години молчеле или се откажувале од гонење поради немање докази.

Дел од истрагата е отстапен и на купувањето на „Бетон Штип“ од страна на ТИМ ДОО, „Орка холдинг“, „Езимит“ ДООЕЛ и „Ексико“.

„Кога тие купуваат компанија, не ја купуваат за да ја работат, туку да извлечат што може од имотот на компанијата“, велат од СЈО.

Па, така, и овој пат сознанијата говорат дека од „Бетон Штип“ се извлечени 4 милиони евра, односно газдите ги тераат акционерите со парите да купуваат имот, а понатаму како што се извлекуваат парите, така се инвестираат во други зделки за што патем говорат и последните информации дека речиси 250 работници веќе ги напуштаат работните места од „Бетон Штип“ и истовремено преку суд си ги бараат неисплатените плати за последните четири месеци.

Дел од истрагата го опфаќа и „Фершпед“, односно од моментот кога Кираца Трајковска, која беше еден од мнозинските акционери во “Фершпед“, поради долг во Еуростандард банка, преку посредник побарала кредит од Стопанска банка АД Битола. Камчев, кој е дел од Управниот одбор на банката, наместо кредит, според СЈО, на Трајковска ѝ понудил преку физички лица да ѝ бидат префрлени парите по што биле ослободени нејзините акции од „Фершпед“.

За да им ги продаде акциите на странски инвеститори, таа го ангажирала брокерот Јованче Тасковски. Но, за нејзината намера дознал Штерјо Наков, кој побарал помош од Мијалков, со цел тој да ги купи акциите. Мијалков се договора со Камчев да ја изиграат, па без нејзино знаење, според СЈО, Ненад Јосифовиќ ги продава акциите на физички и правни лица поврзани со Наков за 4 милиони евра повисока цена од реалната. Парите од зделката завршуваат во фирма чии сопственици се „Ексико“, „Орка холдинг“ и „Тимох“.

Во делот од истрагата за „Империја“ влегуваат и стари случаи, кои претходно во обвинителствата завршувале со откажување од гонење поради немање доволно докази. Таков пример е истрагата за „пропаѓањето“ на „Орка спорт“, „Орка текстил“ и други фирми во сопственост на сега покојниот Илија Камчев. Данокот се избегнувал да се плаќа преку лажни стечаи, обезвреднување на имотот и формирање офшор-компании, а потоа парите „чисти“ биле внесувани во земјата, односно целиот имот бил пренесуван на новоформирани компании.

На овој начин, впрочем, и се градела целата империја – преку лојални соработници, изигрување на законитe и формирање компании за еднократна употреба.

Како ќе заврши истрагата и дали случајот ќе добие епилог останува неизвесно. Засега Орце Камчев и Сашо Мијалков се во домашен притвор, а конечниот збор ќе го каже Врховниот суд.

Освен Камчев и Мијалков, осомничени во случајот „Империја“ се и Ратка Куноска-Камчева, мајка на Камчев и неизвршен член на Одборот на директори на „Орка ходинг“, Кристина Камчева-Стојческа, сестра на Камчев и неизвршен член на Одборот на директори на „Жито полог Тетово“, Лилјана Гајдоска, правник во фирмите на Камчев, неизвршен член на Одборот на директори на ЗК „Пелагонија“, Тодор Мирчевски, директор на „Ексико“, Владислав Стајковиќ, сопственик на НВСП, доскорешен директор на „Мобико“ и поранешен директор на „Финзи“, Ванче Мијалчев, извршен директор на „Бетон Штип“, Јованче Тасковски, брокер, и Дејан Јанев од „О.Т.Е. инвест“.

Прикажи повеќе...

Анализи

Политиката го подели СЈО на табори

Објавено пред

„Чарлиевите ангели“ ги нема. Катица Јанева, Ленче Ристоска и Фатиме Фетаи речиси една година не се појавуваат на заеднички прес-конференции. Во јавноста и на социјалните мрежи сè погласни се критиките за работата на специјалното јавно обвинителство и ослабената доверба во оваа институција.

Три и пол години по формирањето, целосен судски епилог има само за два случаја а сè погласни се шпекулациите дека во СЈО владее поделеност на обвинителите на табори, кои меѓусебно не се согласуваат за дејствувањето на ова обвинителство, па тие разлики во мислењата лесно се забележливи и во јавноста.

Трите жени, кои беа симбол за СЈО, ретко може се видат заедно во јавноста, а речиси една година Ленче Ристоска и Фатиме Фетаи не даваат заеднички изјави. Според нашите извори, со слични ставови на една страна биле обвинителките Катица Јанева и Лиле Стефанова, а на друга Ленче Ристоска и Фатиме Фетаи.

Од друга страна, сè поприсутна во јавноста е главната специјална обвинителка Катица Јанева, која, според најавите, во вторник ќе се појави на „1ТВ“, каде што заедно со обвинителите Лиле Стефанова и Трајче Пеливанов треба да одговараат и на прашања од гледачите. Токму во фирмата сопственик на „1ТВ“, „БМЈ медиа груп“, работи синот на Јанева, младиот гевгеличанец Лазар Јанев, за кого веќе беше објавено дека пред вработените бил претставен како директор на правна служба. Пред точно два месеца Јанева беше гостинка на „1ТВ“ и се фотографира со сопственикот на телевизијата, Бојан Јовановски, со назнака дека станува збор за работен состанок.

Во СЈО во последната година во целост се смени практиката на комуникација со јавноста. Последната прес-конференција СЈО ја одржа на 21 март минатата година.

Повеќе нема брифинзи со новинари, а на обвинителките Ристоска и Фетаи не им е дозволено да даваат интервјуа и изјави. Целосна затвореност владее и во однос на истрагите. Случајот „Империја“, во кој, меѓу другите, се осомничени и бизнисменот Јордан Камчев и ексдиректорот на УБК, Сашо Мијалков, беше отворен пред повеќе од 2 месеца, а од СЈО нема дополнителни информации, освен дека истрагата е сложена.

Сите обиди на „Макфакс“ да обезбедат брифинг за случајот беа залудни. Новинарите меѓу себе коментираат дека ова обвинителство, кое наметна транспарентно работење, последнава година се затворило, иако обвинителите поминале серија обуки за комуникација со јавноста. Тоа остава простор за шпекулации во постапувањето по предметите на обвинителството. Од друга страна, во редовното Обвинителство се спроведува тренинг за односи со јавноста на обвинителите.

Според нашите информации, во специјалното јавно обвинителство меѓу некои од вработените владее незадоволство од начинот на работа, особено по последните политички случувања, амнестии и повици за помирување, кои во голем дел влијаат и врз актуелните предмети што се во судска постапка, но и на оние што се во истрага и предистрага, а во кои, меѓу другите, се вклучени и Сашо Мијалков, Елизабета Канческа-Милевска, Али Ахмети, Бујар Османи.

Ексминистерката за култура, КанческаМилевска, е инволвирана во предистрагата за предметот „Скопје 2014“, кој е еден од најобемните предмети на СЈО, за Мијалков се водат повеќе судски постапки, а предметот за агенцијата за обезбедување СГС е во предистрага.

Во процесот на помирувањето наголемо се споменуваа и измените во Кривичниот законик, односно член 353, став 5, кој ја регулира злоупотребата на службената положба преку јавните набавки. Доколку дојде до промена на овој член, како што беше најавувано, помали казни или ослободување од одговорност ќе добијат голем број обвинети во случаите на СЈО, меѓу кои и Мијалков.

Уставниот суд сè уште не расправал по иницијативата на адвокатот Еленко Миланов, кој бара судиите да се произнесат за овој член од Кривичниот законик.

Сите овие политички инволвирања, кои допираат и до СЈО, според нашите извори, довеле до голем раздор во работата на институцијата, која има годишен буџет од 3,7 милиони евра. Некои од обвинителите се разочарани од фактот што нивните предмети и нивната работа зависат исклучително од тековната политичка ситуација, па токму затоа во последниот период и не се работи на нови предистраги бидејќи се чека исходот од тоа што ќе се случува со институцијата и дали евентуално одредени функционери од претходната, но и од актуелната власт, ќе избегнат одговорност.

Прикажи повеќе...

Најново

Свет2 часа

СЗО: Ризикот за смртност од коронавирус е поголем кај пушачите

Светската здравствена организација (СЗО) соопшти дека пушењето цигари може да предизвика потежок облик на болеста Ковид-19 и поголема смртност кај...

Македонија5 часа

Милошоски со втор негативен тест на Ковид-19

Пратеникот на ВМРО-ДПМНЕ, Антонио Милошоски, објави на социјалните мрежи дека и вториот тест на Ковид-19 му е негативен. „Почитувани пријатели,...

Македонија5 часа

Градоначалникот на Охрид бара поддршка за уривање на дивоградбите на охридското крајбрежје

„Процесот на рушење на дивоградби во Охрид ќе трае и можеби ќе треба да го продолжи некој друг градоначалник по...

Македонија5 часа

15 починати и 173 нови случаи на Ковид-19 во земјава

Министерството за здравство информира дека во последните 24 часа се направени 1.653 тестирања, а регистрирани се 173 нови случаи на...

Македонија6 часа

Утре ќе се разговара за затворање на границите со Србија и Косово

Министерството за здравство информира дека, со оглед на развојот на ситуацијата со коронавирусот во соседството, Комисијата за заразни болести на...

Спорт8 часа

Ѓоковиќ и сопругата се негативни на Ковид-19

Новак Ѓоковиќ и неговата сопруга Јелена се негативни на вирусот Ковид-19, покажале резултатите од последните ПЦР тестови кои на сопружниците...

Економија9 часа

(Видео) Ангеловска: Резултатите се подобри од очекуваното, економијата почна да закрепнува

„Она што го почнавме на почетокот на оваа ковид-криза, а во духот на транспарентноста и отчетноста, односно навремено па дури...

Македонија10 часа

Османи: Процедурите за попис на населението ќе почнат по изборите

Вицепремиерот  Бујар Османи, кој истовремено е висок функционер во ДУИ, најави дека подготовки за спроведување на пописот ќе започнат по...

Македонија11 час

(Видео) Заев: Се забрзува интеграцијата во ЕУ, да запрат лагите дека сме го изгубиле македонскиот јазик

Лидерот на СДСМ, Зоран Заев, на прес-конференција пред Собранието порача дека македонската интеграција во Европската Унија се забрзува, а за...

Свет11 час

Пресечена пратка за Европа: Запленети 7,5 тони кокаин, вреден 286 милиони долари

Во заедничка акција на полицијата на Колумбија и САД, запленети се 7,5 тони кокаин во вредност од 286 милиони долари,...

Свет11 час

Трамп се предомисли: Сите треба да носат маски

Американскиот претседател, Доналд Трамп, кој се противеше на тоа да го покрива лицето во јавноста, рече дека е за тоа...

Македонија11 час

Со донација на коскена срцевина, македонски дарител му помогна на пациент од Бугарија

Од Институтот за трансфузиона медицина информираат дека во изминатите два дена било спроведено колекционирање на хематопоетски матични клетки од доброволен...

Свет11 час

Вооружен напад на рехабилитациски центар во Мексико – 24 убиени

Најмалку 24 луѓе се убиени, а седум се ранети во вооружен напад во нерегистриран центар за лекување зависности од дрога...

Македонија11 час

Санкционирани 461 лице за неносење заштитна маска

Во текот на изминатото деноноќие (1/2.07.2020 година) на територијата на целата држава по однос на мерката за неносење лична заштита...

Свет12 часа

По низа грешки, министерот за здравство на Нов Зеланд поднесе оставка и се нарече идиот

Новозеландскиот министер за здравство, Дејвид Кларк, денеска поднесе оставка по низа лични грешки за време на пандемијата на коронавирусот. Кларк...

Свет12 часа

Голема трагедија во рудник во Мјанмар, загинаа најмалку 50 рудари

Најмалку 50 рудари загинаа во одрони во рудник за жад на северот на Мјанмар, соопштија властите. Се претпоставува дека бројот...

Свет12 часа

По два месеци пауза, коронавирусот се врати во Токио

Во Токио се забележани над 100 новозаболени од коронавирус што е најголем број на нови случаи во последните два месеци....

Свет23 часа

Советот за безбедност на ОН ја усвои резолуцијата за прекин на сите конфликти поради коронавирусот

Советот за безбедност на ОН денеска едногласно ja усвои резолуцијата со која се бара прекинување на конфликтите низ целиот свет...

Македонија1 ден

Нови 120 заболени и четворица починати oд Ковид-19 во земјава

Министерството за здравство информира дека во последните 24 часа се направени 954 тестирања, а регистрирани се 120 нови случаи на...

Македонија1 ден

Ако има потреба ќе бидат воведени рестриктивни мерки, велат Спасовски и Филипче

Ако има потреба ќе бидат препорачани и воведени рестриктивни мерки. Вака техничкиот премиер Оливер Спасовски и министерот за здравство, Венко...

Досие