Топ
(Видео) Разбиена криминална група, запленетa марихуана вредна 50.000 евра

Основното јавно обвинителство за гонење организиран криминал денеска донело наредба за истрага против три лица за кои постои сомнение дека сториле кривично дело неовластено производство и пуштање во промет наркотични дроги.
Oд МВР за истиот случај додаваат дека вчера (25 јануари) бил спречен транспорт на марихуана со вкупна тежина од 25,3 килограми, вредна 50.000 евра, при што лишени од слобода се М. А. (63), Д. К. (45) и Ј. К. (82).
Првоосомничениот М. А, во текот на овој месец организирал неовластена набавка и пренесување на дрогата, а потоа го ангажирал второосомничениот Д. К. марихуаната да ја пренесе во куќа што првоосомничениот ја изнајмил во викенд-населбата Голиово во општина Чучер Сандево.
На 24 јануари второосомничениот, по претходни инструкции добиени од М. А., ја презел дрогата спакувана во една вреќа, една патна торба и еден куфер, ја сместил во изнајмено возило и ја однел на договореното место, односно во куќата во Голиово, каде што го чекал првоосомничениот и заедно ја сместиле дрогата во објектот по што заминале.
Во текот на вчерашниот ден (25 јануари) првоосомничениот се вратил во куќата, а по него пристигнале и другите двајца осомничени.
Тројцата влегле кратко време во куќата, а на излегување изнеле две црни вреќи, што ги сместиле во задниот дел на возило со кое управувал второосомничениот Д. К., па заедно со третоосомничениот Ј. К. како совозач се упатиле со возилото кон излезот на Скопје, а првоосомничениот М. А. останал во куќата.
Како што информираат од МВР, М.А. договорил купопродажба на 10 килограми од марихуаната во струмичкото село Василево, па ги ангажирал другите двајца да ја пренесат дрогата до викенд куќа во тоа село.
Набргу на автопатот Скопје – Штип, во близина на местото наречено Преод, околу 11.30 часот, осомничените биле запрени од полицијата и при преглед на возилото пронајдени се дваесет најлонски пакувања со марихуана со вкупна тежина од речиси 10 килограми и една торба со остатоци од марихуана, кои се одземени од второосомничениот, а двете лица се лишени од слобода.
Во меѓувреме, првоосомничениот М. А. од куќата во Голиово изнел едно пластично буре и една патна торба, ги сместил во багажниот простор на возилото со кое управувал, односно со остатокот од дрогата се упатил кон Скопје.
Во главниот град на улицата Јадранска магистрала, околу 14 часот, бил запрен од полицијата и при преглед на возилото биле откриени 30 поголеми полиетиленски пакувања со марихуана, едно помало полиетиленско пакување, заедно со вкупна тежина од над 15 килограми, како и една зипер-кеса со непозната растителна материја, а и две дигитални ваги, што се одземени од првоосомничениот, кој бил лишен од слобода.
Тројцата осомничени во текот на денот ќе бидат изведени пред судија при Основниот кривичен суд – Скопје.
Ценејќи дека се исполнети условите, надлежниот обвинител од Основното јавно обвинителство за гонење организиран криминал на судот ќе му предложи на осомничените да им биде изречена мерка притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Орбан прогласи вонредна состојба во земјата

Унгарската влада денеска прогласи вонредна состојба, соопшти премиерот Виктор Орбан.
Причина за прогласување вонредна состојба е војната во Украина, а таа ќе стапи на сила на полноќ.
Во видеото што го објави на Фејсбук неколку часа откако парламентот го усвои амандманот на уставот во кој се наведуваат конфликти, војна или хуманитарна катастрофа во соседна земја како причини за преземање таква мерка, Орбан рече дека војната во Украина претставува закана за Унгарија. физичка сигурност на своите граѓани, енергетски залихи и финансиска сигурност на семејствата и стопанството, јавува МТИ.
Тој нагласи дека Владата која денеска положи заклетва веднаш почна со работа и посочи дека се уште никој не го гледа крајот на војната во Украина.
„ Светот е на работ на економска криза. Унгарија мора да се држи настрана од оваа војна и да ја заштити финансиската сигурност на семејствата“, рече Орбан.
Тој додаде дека за да се направи тоа, Владата мора да биде способна да носи одлуки и брзо да реагира.
„ Вонредната состојба, слична на онаа воведена за време на пандемијата, ќе и овозможи на владата брзо да реагира и да ги искористи сите достапни методи за заштита на Унгарија и Унгарците“, рече Орбан.
Унгарскиот парламент претходно денеска го усвои 10-тиот амандман на Уставот, со кој се дозволува владата да прогласи вонредна состојба во случај на вооружен конфликт, војна или хуманитарна катастрофа во соседна земја.
За амандманот гласаа 136 пратеници, а против беа 36.
Македонија
(Видео) Пендаровски од Давос: Политиката на отворени врати не треба да важи само за НАТО, туку и за ЕУ

Претседателот Стево Пендаровски, во рамки на учеството на Годишниот состанок на Светскиот економски форум во Давос, денеска се обрати на панел сесијата „Одржувањето на безбедноста во Европа“.
Учесници на дебатата беа Генералниот секретар на НАТО, Јенс Столтенберг, премиерот на Белгија, Александар де Кро, министерката за одбрана на Холандија, Кајса Олонгрен и шефот на претседателската администрација во Украина, Андриј Јермак, модерирана од новинарката Френсин Лаква, уредничка во Блумберг.
Во фокусот на дискусијата беше војната во Украина, како заедничка закана што го урна безбедносниот поредок кој со децении ѝ помогна на Европа да напредува во мир, но и чекорите што Европската Унија треба да ги преземе во радикално променетиот контекст.
Учесниците на панелот ја осудија руската агресија и изразија поддршка за украинскиот народ. Тие ја посочија важноста од превенција на ескалација на конфликтот во Украина и неопходноста да се обезбеди заштита на НАТО сојузниците.
Претседателот Пендаровски истакна дека руската инвазија врз Украина како никогаш претходно ја наметна потребата Европската Унија да се фокусира на интеграцијата кон земјите од Западен Балкан, процес кој дополнително ќе ја зајакне стабилноста, безбедноста, демократизацијата на нашиот регион, а со тоа ќе придонесе и кон целокупната безбедност на континентот.
Нагласи дека НАТО, но и Европската Унија, се двата коридори за подобра, побезбедна и попросперитетна иднина.
„ Потребно е да ѝ помогнеме на Украина, да ги убедиме и другите сојузници кои можеби имаат одредена доза на скептицизам. Политиката на „отворени врати“ не треба да важи само за НАТО, туку да се применува и за Европската Унија, вратите и на двете организации да останат отворени за украинскиот народ. Украинците се борат за сопствената слобода, но оваа борба е и за одбрана на демократските вредности. Ова е војна на една автократија против демократија. Доколку Путин успее некако да победи во оваа војна, тогаш нема само да ја победи Украина“ додавајќи дека Северна Македонија во рамки на своите можности дава поддршка на Украина, од воена до дипломатска помош и дека политиката на отворени врати мора да продолжи, не само во однос на НАТО, туку и во однос на Европската Унија.
„Политиката на отворени врати не треба да важи само за НАТО Алијансата, туку и за Европската Унија. Во спротивно, концептот за обединета Европа, во мир со себе и со светот од Атлантикот до Урал, ќе биде само сон“, рече претседателот Пендаровски.
Топ
Од водите на Вардар извлечен маж и итно пренесен во болница

Mеѓу зградата на МРТ и Железничкиот мост од водите на реката Вардар во Скопје бил изваден маж од Скопје, кој бил во контактибилна состојба.
Како што информираат од МВР, се работи за К.В.(55), кој е пренесен во Комплекс клиники „Мајка Тереза“ за укажување на лекарска помош. Се работи на расчистување на случајот.