СВР Охрид поднесе кривична пријава против П.М.(55) од Охрид, поради постоење основи на сомнение за сторено кривично дело злоупотреба на службената положба и овластување.

Тој, на 12.11.2020 година, во својство на службено лице во Јавното претпријатие „Градски гробишта“ во Охрид, го известил Јавното претпријатие „Охридски комуналец“ дека за потребите на „Градски гробишта“ неопходен им е камион кипер за транспорт на 800 бекатон плочки, наменети за поплочување на пат до црква во охридското село Љубаништа. Откако биле пренесени, пријавениот плочките ги пренесол во дворот од својата викендичка која се наоѓала веднаш до црквата, со што се стекнал со противптравна имотна корист од над 60.000 денари.

Полицијата привела 25-годишен тетовец, откако при преглед на неговото возило било пронајдено оружје, за кое немал дозвола.

„На 25.2.2021 во 21.15 часот на ул. Видое Смилевски Бато во Тетово, полициски службеници од СВР Тетово го лишиле од слобода Ш.И.(25) од с.Желино, Тетовско, затоа што при преглед во неговото возило ‘ауди’, со тетовски регистарски ознаки, бил пронајден и одземен пиштол ‘ЕКОЛ 99’-9 мм, за кој немал дозвола“, соопшти МВР.

Тој бил приведен во полициска станица и по целосно документирање на случајот против него ќе биде поднесена соодветна пријава.

Полициски службеници од СВР Тетово во содејство со Управата за јавни приходи извршиле контрола во угостителски објект во с.Добридол, Гостиварско, сопственост на Е.Џ.(32) .

При контролата, како што информираат од Министерството за внатрешни работи, било констатирано дека во објектот, без лиценца, нелегално се приредуваат игри на среќа, поради што времено му била одземена целокупната опрема за приредување игри на среќа.

„По расчистување на случајот, против Е.Џ. ќе следува соодветен поднесок“, велат од МВР.