Полициски службеници попладнево ги приведоа А.Ј.(31) и П.С.(63), кои претходно во текот на денот со закана одзеле пари од вработен во филијала на финансиско друштво.

„Веднаш по добиената пријава од Д.Б., вработен во филијалата на бул. ВМРО во Скопје, преземени се соодветни мерки и активности и разбојниците веднаш се приведени во близина на Камениот мост“, велат од МВР.

Двајцата приведени се сомничат за уште две разбојништва.

Полицијата приведе две лица од Куманово осомничени за шверц на дрога. Тие набавиле марихуана од Косово со намера да ја продаваат во Турција.

Според информациите на МВР, кривична пријава е поднесена против А. И. (59) и З. М. (52), двајцата од Куманово, за неовластено производство и пуштање во промет наркотични дроги, психотропни супстанции и прекурсори.

А. И. и З. М. од Косово набавиле марихуана заради понатамошен транспорт до Турција. На 4 ноември тие отпатувале во Косово за да ја преземат марихуаната по што се вратиле во Македонија, а камионот во кој била марихуаната, по насоки на А. И., бил паркиран на договорена локација во Скопје.

На 9 ноември З. М., по инструкции на А. И., тргнал за Турција, при што на автопатот Скопје – Велес изгубил контрола над возилото и излетал од патот.

Од страна на полициски службеници извршен е преглед на камионот во кој биле пронајдени 36 килограми марихуана.

На двајцата осомничени определен им е притвор од 30 дена.

По претходно добиена судска наредба во врска со извршена тешка кражба, полициски службеници од подрачјето на општина Ѓорче Петров на 26 ноември извршиле претреси во Скопје и селото Кондово.

Притоа уапсени се скопјанецот Е. Б. (22) и 21-годишниот жител на Кондово, С. С.

Претходно, на 19 овој месец, во полициска станица бил повикан А. А. (24) од селото Љубин.

Oд МВР информираат дека станува збор за акција во врска со тешка кражба извршена во маркет во Ѓорче Петров на 19 ноември, од каде што биле одземени пари.

Против лицата ќе биде поднесена соодветна пријава до надлежното обвинителство.