38-годишен жител од Брвеница, татко и сопруг е осомничен за малтретирање на својата ќерка и за семејно насилство над неговите блиски членови на семејството.

Јавен обвинител од обвинителството во Тетово донесе Наредба за спроведување истражна постапка против 38-годишен жител на Брвеница за кого постои основано сомнение дека ги сторил кривичните дела – Запуштање и малтретирање дете од член 201 став 1 и Загрозување на сигурноста од член 144 став 2 во врска со став 1 од Кривичниот законик.

На 2 август, во семејната куќа во Брвеница, со грубо запоставување на своите должности за грижа и воспитување, осомничениот ја малтретирал својата малолетна ќерка родена 2011 година и ја загрозил сигурноста на својата сопруга и на својот татко, заканувајќи се дека ќе нападне врз нивниот живот.

Во вечерните часови тој пристигнал во домот во алкохолизирана состојба и иако со решение на Основниот суд Тетово му биле изречени повеќе забрани да ги вознемирува домашните и да врши семејно насилство, тој најпрвин започнал да ѝ се заканува на сопругата дека ќе ја убие. Девојчето побарало од осомничениот да не ја вознемирува мајката. Тогаш тој грубо ја фатил ќерката за десната рака, ѝ ги свиткал прстите и почнал да ѝ удира шлаканици, нанесувајќи ѝ физички повреди, болка и страдање. Мајката се обидела да ја одбрани ќерката, но тој ја удрил со тупаница.

Во собата влегол таткото на осомничениот, кој побарал од синот да не прави проблеми. Во тој момент, осомничениот од џебот извадил два скалпела, го фатил за коса својот татко и ставајќи му го скалпелот на вратот, му се заканил дека ќе го убие. Потоа го пуштил, а со скалпелите продолжил да им се заканува на домашните со зборовите: „Вечерва ќе има крв“.

Јавниот обвинител до судијата на претходна постапка од Основниот суд Тетово достави предлог за определување мерка притвор за осомниченото лице.

Судијата го прифати предлогот и на осомничениот му определи притвор во траење од 30 дена, соопштија надлежните.​

Полицијата уапси 30-годишен скопјанец кој се сомничи за кривично дело-тешка кражба.

Според МВР, вчера во 07.30 часот од страна на полициски службеници од СВР Скопје – Единица за внатрешни работи Карпош бил лишен од слобода М.Ј.(30) од Скопје, со што е расчистено едно кривично дело – тешка кражба во обид, извршено во с.Бардовци.

При извршен претрес во куќа во с.Бардовци, кај што М.Ј. престојувал, пронајдени се предмети за кои постои сомнение дека потекнуваат од други кривични дела.

По документирање на случајот против М.Ј. ќе биде поднесена кривична пријава по член 236 во врска со член 19 од Кривичниот законик.

По засилените сообраќајни контроли во текот на вчерашниот ден на територијата на град Скопје од страна на МВР биле изречени 149 казни меѓу кои за возење над дозволената брзина 50 санкции, 18 за возење без возачка дозвола, пет за возење под дејство на алкохол.

Биле изречени и пет мерки за некористење сигурносен појас, пет за користење на мобилен телефон, шест за нерегистрирани возила.

Од МВР најавуваат дека засилените акциски сообраќајни контроли продолжуваат и апелираат до граѓаните да ги почитуваат сообраќајните правила и прописи за поголема безбедност во сообраќајот.