Во скопското село Трубарево, во вечерните часови на 28 февруари, полицајци сопреле автомобил „шкода“ со скопска регистрација, во кој биле пронајдени предмети од претходно извршена тешка кражба.

Како што информираат од МВР, „шкодата“ била управувана од Д.К.(31) од Куманово, а совозач бил А.Ј.(33) од Скопје. Двајцата веднаш биле уапсени поради сомнение за сторено кривично дело тешка кражба.

Заедно со предметите тие биле предадени во полициската станица во Гази Баба и во извршениот разговор изјавиле дека кражбата ја извршиле истиот ден од вагон на железничката станица во Трубарево.

Инспекторите затворија угостителски објект во село Вруток затоа што работел по дозволеното време.

Според информациите на МВР, вчера во 21.20 часот, полициски службеници со Државниот пазарен инспекторат, извршиле контрола во угостителски објект во Вруток, гостиварско, сопственост на К.С.(23) од село Вруток, при што констатирале дека објектот работи и внатре биле затекнати 13 лица со сопственикот.

Поради непочитување на работното време, односно постапување спротивно препораките од Владата, објектот бил затворен од Државниот пазарен инспекторат, а сопственикот бил приведен во полициска станица.

По целосно документирање на случајот против К.С. ќе биде поднесена пријава за непостапување според здравствените прописи за време на епидемија.

Против 12 лица се поднесени обвиненија за кривично дело- фалсификување исправа, казниво по Кривичниот законик, информираат од скопското јавно обвинителство.

Обвинетите, во периодот од 19 до 23 февруари, на граничниот премин на Меѓународниот аеродром Скопје, прикажувале лажни потврди за негативни ПЦР тестови за SARS-CoV-2 вирусот, кои наводно биле издадени од лаборатории во Скопје.

Потврдите како вистински ги прикажувале пред овластените службени лица, иако знаеле дека воопшто не се тестирале во наведените лаборатории.