Претседателот на СДСМ, Зоран Заев и претседателот на Комисијата за здравство на СДСМ Венко Филипче, утрово беа во посета на пациентот Иван, на кој му беше трансплантирано срце.

Иван е во добра здравствена состојба и тој денеска заминува од Клиниката за Државна кардиохирургија на домашно лекување.

На 23 мај оваа година, за првпат во земјава се изведе трансплантација на срце. Операцијата траеше 6 часа. Претседателот Заев му посака добро здравје истакнувајќи дека Иван е храбар човек.

„Ви посакувам добро здравје, вие сте храбар човек и имаме златни луѓе, здравствени работници кои се грижат максимално за нашите пациенти. Вие сте нашата гордост. Имаме вредни и учени здравствени работници. Правиме сѐ да им ги подобриме условите и да ги задржиме нашите лекари во јавното здравство. Нема повредна работа од еден спасен човечки живот“, рече Заев.

Осврнувајќи се на досегашните достигнувања, претседателот на СДСМ истакна дека во изминатите три години ги подобриле условите во над 30 јавно здравствени установи и инвестирале во набавка на нова, современа медицинска опрема.

„Ги зголемивме и платите на лекарите специјалисти, на медицинските сестри, но и на помошно-техничкиот персонал во здравството. Со тоа, го подигнавме нивото на здравствената заштита за пациентите и овозможивме подобри услови за работа за нашите здравствените работници“, истакна Заев и додаде дека во следниот мандат обезбедуваме уште повеќе инвестиции во здравството, за уште подобар здравствен систем.

„Ова е огромен успех за македонското јавно здравство. Со оваа интервенција испишавме историја во кардиохирургијата. Од срце се заблагодарувам на целото семејство на донорот Емилија Динева за алтруизмот и хуманоста ја ни ја покажаа на дело. Ни покажаа дека човекољубието е над сѐ. Горд сум на целиот медицински тим кој работеше на оваа операција. Покажавме дека знаеме и можеме. Направивме вистински пресврт во здравството. Срцето на Емилија сѐ уште чука, а екипата продолжува да се грижи максимално и понатаму за Иван“, потенцираше Филипче.

Пациентот Иван кој доби орган беше избран од Националната листа за чекање за срце според медицински утврдени критериуми за совпаѓање кои ги изготви и со кои раководи Министерството за здравство.

Уште два дена ќе трае предизборната кампања за парламентарните избори кои ќе се одржат в среда.

Денеска и утре политичките партии ќе ја бараат довербата на граѓаните, а во недела од полноќ ќе настапи молк.

На 13 јули (понеделник) ќе гласаат лицата со ковид-19 и во самоизолација, на 14 јули (вторник) болните, немоќните, хронично болните и лицата во затворите и во домашен притвор.

Поради состојбата со ковид-19 за остварување на правото на глас на лицата позитивни на болеста и во самоизолација формирани се околу стотина здравствени избирачки одбори составени од по тројца здравствени работници и претставници на политичките партии.

На гласање на 15 јули, сите 3.840 избирачки места ќе бидат дезинфицирани од ДИК. Согласно протоколот, секој гласач е должен да држи растојание од два метра пред објектот на гласачкото место, како и пред влезот на секое гласачко место, и во самото гласачко место. Пред влегување е должен да ги дезинфицира рацете и должен да носи маска.

Денот на одржувањето на изборите ќе биде неработен.

Во Свети Николе вчера беа регистрирани 29 новозаразени од ковид-19, за првпат во овој град, кој станува ново жариште на коронавирусот во земјава.

Двете фабрики на конфекцијата „Мода“ во Свети Николе ги затворија погоните по појавата на случаи на вирусот. Сите 830 вработени ќе бидат подложени на скрининг-тест со цел утврдување на точната бројка на заболени лица.

Вкупната бројка на активни случаи во Свети Николе изнесува 81 лице.

Во моментов најголем број на активни случаи има во Скопје – 1.871, а потоа се Тетово со 324, Куманово со 164, Штип – 161, Струга – 147, Охрид – 133 и Гостивар со 128 заболени лица.

Oд Скопските општини најмногу заболени има во Чаир – 323, а потоа се Гази Баба – 200, Аеродром – 162 и Бутел и Центар со по 146 активни случаи.

Вчера беше регистриран рекорден број на заразени и излечени лица за едно деноноќие.