Тројца пешаци се тешко повредени откако биле удрени од автомобили во три одделни сообраќани несреќи во Скопје, Охрид и Битола, информираат од МВР.

Во вечерните часови на 15. декември на скопскиот булевар „Александар Македонски“ се случила една од сообраќајките во која тешко е повреден 21-годишен пешак од Скопје. Непознато лице управувајќи автомобил „опел“ со скопски регистарски ознаки удрило во младиот скопјанец, по што го избегало од местото на настанот. Со возило на Итна медицинска помош, 21-годишникот бил пренесен во комплексот клиники „Мајка Тереза“ каде му биле констатирани тешеки телесни повреди.

Втора слична сообраќајна несреќа се случила исто така во вечерните часови на 15. декември во Охрид на улица „Расоица Новачки“, кога 30-годишен возач од охридското село Горно Лакочереј, со автомобил „ланчиа“ удрил во 55-годишен пешак од Охрид. Пешакот се здобил со тешки телесни повреди, а по укажаната лекарска помош во болницата „Св.Еразмо“ бил пренесен во комплексот клиники „Мајка Тереза“ во Скопје.

Третата сообраќајка од ваков карактер се случила доцна синоќа, пет минути по полноќ во Битола на крстосницата на булеварот „1-ви Мај“ и улицата „Македонски гемиџии“. Возач на возраст од 21-година, кој управувал автомобил „фолксваген голф“ со битолски регистарски ознаки удрил во 58-годишен пешак. Пешакот се здобил со тешки повреди и му била укажана лекраска помош во Општата болница во Битола.

Полицијата во сите три случаи извршила увид на местата на сообраќајките и работи на расчистување на случаите.

На Граничниот премин Делчево за влез во државава, во вечерните часови на 14. декември се пријавил 32-годишен злетовец. Тој управувал автомобил „мини купер“ со бугарска национална ознака, а како совозач со него било 18-годишно лице од Пробиштип.

Службениците на граничниот премин извршиле преглед над лицата и на нивниот личен багаж, при што кај злетовецот била пронајденa кесичка со непозната прашкаста материја. Додека траела постапката на царинските службеници, во еден момент 32-годишникот ја земал кесата ја скинал најлонската фолија и непознатата материја ја голтнал.

Веднаш била повикана екипа на Итна медицинска помош и злетовецот бил префрлен во Здравствен дом Делчево, каде по неколку часа починал.

Од МВР информираат дека за случајот известен е јавен обвинител по чија наредба телото е предадено за обдукција. Се преземаат мерки за расчистување на случајот.

Полицијата информира дека вчера при вршење на патролна дејност во водите на Охридското Езеро, од страна на полициски службеници во 00,10 часот спроти плажата Лагадин и спроти плажата Елешец на околу 300 метри од брегот на езерото, пронајдени се рибарски мрежи. Се работи на расчистување на случајот.