Неколку лица од Тетово се осомничени за перење пари, информира Министерството за внатрешни работи.

СВР Тетово поднело кривична пријава против К.Д.(40), Ф.Д.(61) и Е.Р.(20), сите од Тетово, поради постоење основи на сомнение за сторено кривично дело перење пари и други приноси од казниво дело.

Овие лица во текот на 2016, 2018 и 2019 година во повеќе наврати, преку услугата за брз трансфер на пари, на своите трансакциски сметки отворени во Република Северна Македонија, врз основа на нерегулиран правен основ, примиле парични средства во вкупен износ од 22.327 евра и 8.507 американски долари, како и 3.750 денари, а кои им биле испратени од поголем број непознати лица од Германија, Швајцарија и Косово.

Притоа, Е.Р. паричните средства кои ги примил на неговата трансакциска сметка, откако ги извадил му ги дал на К.Д, додека К.Д. и Ф.Д. паричните средства кои ги примиле од непознати лица на нивните трансакциски сметки, откако ги подигале од сметките, во повеќе наврати ги предавале на рака на А.К., државјанин на Турција кој престојувал во Република Северна Македонија, кој за возврат за направената услуга им давал 1.000 денари.

Пријавените лица, со фактот што примиле парични средства од непознати лица и ги испратиле, исто така, на непознато лице, без да постои правен основ на нивното примање и испраќање, биле должни да знаат или можеле да знаат дека наведениот износ на парични средства најверојатно потекнува и е прибавен од казниво дело, велат од МВР.

Од таму дообјаснуваат дека со стореното кривично дело пријавените се стекнале со вкупна противправна имотна корист во висина од 1.821.776 денари.

55-годишен тетовец пријавил измама откако сопственото возило кое го заложил за градежни услуги му било одземено, а градежните работи кои тој ги очекувал не биле извршени.

Во 12:00 часот во Полициската станица Тетово, 55-годишен жител на тетовско село пријавил дека бил измамен од Р.В.(38) од с.Желино, Тетовско.

Според пријавеното, тие пред нотар во Тетово склучиле договор пријавениот да му изврши градежни работи, а за возврат му било дадено патничко возило „фолксваген туарег“ во вредност од 12.000 евра, а градежните работи чинеле 10.000 евра.

Како што е пријавено, во договорот стоело дека Р.В. не смее да го отуѓува возилото додека не ги изврши градежните работи, но тој ниту ги извршил градежните работи, а со помош на вработена кај нотарот го отуѓил возилото.

Се преземаат мерки за расчистување на случајот, информираат надлежните.

Агентот за недвижности, кој измами повеќе лица продавајќи им ист стан, денеска е приведен.

Основното јавно обвинителство Скопје поведе постапка против него за измама. Против него ќе биде поднесен предлог за определување мерки на претпазливост – обврска повремено да се јавува кај определено службено лице во судот, привремено одземање на патната исправа и забрана за издавање нова, како и забрана за преземање определени работни активности.

„Во периодот од мај 2020 година до март 2021 година осомничениот во повеќе наврати, искористувајќи ист траен однос и исти услови, довел и држел во заблуда најмалку седум оштетени граѓани. Со намера за себе да прибави противправна имотна корист тој како агент во својата агенција за недвижности лажно им прикажувал факти на оштетените дека е овластен од разни сопственици да ги продава нивните станови на други лица. Откога ќе ги огласел становите, ги покажувал пред потенцијалните купувачи, договарал продажба и наплаќал средства на име капар, но потоа не доаѓало до склучување купопродажен договор, а уплатените средства не ги враќал“.

Постапката против осомничениот е во тек, се испитуваат лица и се обезбедуваат и други докази.​​