Полицијата го приведе 53-годишниот Н.К. од Ресен кој со неговото комбе се обидел да прегази комунални инспектори и полициски службеник откако бил отстранет од Градскиот пазар Припел каде продавал производи.

Од МВР информираат дека полицискиот службеник испукал со пиштол во гумите на возилото.

Н.К. е приведен во полициска станица, а известени се Јавен обвинител и Одделот за внатрешна контрола, криминалистички истраги и професионални стандарди. По документирање на случајот против сторителот ќе биде поднесен соодветен поднесок, информираат од полицијата.

Вчера во Гостивар, на булеварот „Браќа Ѓиновски“, патничко возило „голф“, со гостиварски регистарски ознаки, управувано од Б.З.(67) од Гостивар удрило во малолетен пешак од градот.

Во несреќата пешакот се здобил со тешки телесни повреди, констатирани во Ургентен центар Гостивар, информираат од МВР.

Увид извршила полициска екипа.

Три лица се приведени денеска во Битола, откако кај нив била најдена дрога.

Според информациите од МВР, на ул.„Тодор Скаловски“ во Битола, полициски службеници од СВР Битола ги привела Г.К.(32), С.Г.(43), двајцата од Битола и Х.М.(33) од Саудиска Арабија, затоа што кај нив биле пронајдени и одземени марихуана, бела прашкаста материја и други предмети.

Истиот ден од страна на полициски службеници при СВР Битола извршен е претрес во домот на Г. К на ул. “Партизанска” во Битола при што пронајдени и одземени се грутчеста материја, прашкаста материја, растителна материја, 18 семки, дробилка, ризли и др. предмети. По документирање на случајот, ќе биде поднесена соодветна пријава.