Дваесет и петгодишна девојка од Скопје е тешко повредена кога во неа удрил автомобил што го управувал 80-годишен старец. Девојката била на велосипед.

Според информациите на МВР, несреќата се случила вчера во 20.30 часот на булеварот Кочо Рацин кога автомобил „опел астра“, управуван од Ј.С. (80) од Скопјe, удрил во А.Т. (25) од Скопје, која се движела со велосипед. Девојката со тешки повреди била пренесена во градската општа болница „Св. Наум Охридски“.

Полицијата извршила увид на местото. Засега нема информации како дошло до несреќата.

Пожар избил во куќа на улицата Боро Шаин во Струга, каде што се наоѓала жена на возраст од 62 години, која добила тешки изгореници. Таа била префрлена во Медицинскиот центар во Струга, од каде што, поради сериозноста на повредите, била пренесена во комплексот клиники „Мајка Тереза“.

Во пожарот повреди добила и друга жена на возраст од 31 година, која била префрлена и задржана на лекување во Медицинскиот центар во Струга. Пожарот бил изгаснат од екипа на Територијалната противпожарна единица Струга.

Извршен бил увид од страна на Полициската станица Струга и се работи на целосно расчистување на слуачјот.

Комбе „форд транзит“, вчера околу 16.30 часот удрило седумгодишно дете пешак во скопското село Морани. Детето со друго возило било пренесено во Поликлиниката „Драчево“, а од таму со возило на Итната медицинска помош било препратено во комплексот клиники „Мајка Тереза“, каде што му биле констатирани тешки телесни повреди и е задржано е на понатамошно лекување.

Увид на местото на настанот извршила екипа од Секторот за внатрешни работи Скопје и се работи на целосно расчистување на случајот.