Нема повредени патници во автобусот на ЈСП, по сударот со два автомобили кај Шумарскиот факултет. Оттаму информираат дека е причинета само материјална штета.

Досега, како повредени се пријавени три лица кои се превезувале со автомобилите.

„Според изјавата на возачот на автобусот дадена на внатрешната контрола на ЈСП Скопје, незгодата се случила околу 15 часот во момент кога автобусот (ЛАЗ) кој сообраќал на линија 50 стоел на автобуската постојка кај Шумарски факултет, за влез/излез на патници, и во него од позади удрило едно од двете патнички возила кои учествувале во незгодата“, информираа од ЈСП.

Од ЈСП велат дека МВР работи на целосно расчистување на случајот.

„Апелираме на поголема внимателност на сите учесници во сообраќајот, со цел избегнување на евентуални човечки жртви и поголеми материјални штети“, додаваат од ЈСП.

Скопското обвинителство донесе Наредба за спроведување истражна постапка против едно лице за неовластено производство и пуштање во промет наркотични дроги како и неовластено изработување, држење, посредување и тргување со оружје.

На 15 јануари, во куќа во сопственост на таткото на 48-годишниот осомничен во Сингелиќ, биле пронајдени речиси 13 килограми марихуана во 39 пакувања, како и околу 4 литри хашиш масло, информираат од полицијата.

Покрај тоа, полициските службеници при претресот пронашле и еден пиштол марка „Црвена застава“ 9мм Para, две рамки со по 9 куршуми за овој пиштол и уште 39 куршуми од неутврден калибар.

Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор за осомниченото лице, бидејќи постои опасност тој да се даде во бегство, да ја попречува кривичната постапка со влијание врз сведоците и сокривање на трагите, како и можност да го повтори делото.​

Шеест и двегодишен кичевец вчера бил физички нападнат од неколку лица, при што едно од нив со пиштол му нанело прострелна рана.

Лицата потоа му одзеле поголема сума на американски долари, евра и денари, во разни апоени, информираат од полицијата.

Човекот е пренесен во болница, а во моментот се преземаат мерки за расчистување на случајот.