Вработен во шумска полиција во попладневните часови на 21 јануари во СВР Струмица пријавил дека околу 13.30 часот, на местото наречено Палазлија, во службениот автомобил „дачија“, кој бил паркиран покрај регионалниот пат Берово-Струмица, удрило возило „мерцедес“ со бугарски регистерски ознаки, во кое имало дрва.

Според пријавата, „мерцедесот“ бил управуван од жител на селото Старо Балдовци.

Возачот почнал да им се заканува на вработените во шумската полиција и потоа го испрскал своето возило со бензин и го запалил по што побегнал.

Увид на местото извршила екипа од СВР Струмица и се работи на расчистување на случајот.

Во два одделни случаи во Тетово и  Гостивар вчера биле уапсени две лица кај кои полицијата пронашла хероин односно кокаин.

Во првиот случај, во попладневните часови на 21 јануари, на тетовската улица „Киро Ристевски – Дрнц“ бил уапсен 45-годишен тетовец, откако кај него била пронајдена дрога хероин, која по претресот му била одземена.

Во вториот случај, на 22 јануари, околу 30 минути по полноќ полицајци од полициската станица Гостивар уапсиле 31-годишник од гостиварското село Здуње, кај кого бил пронајден кокаин.

Против тетовецот и гостиварецот ќе бидат поднесени соодветни поднесоци.

Во текот на изминатиoт ден во Скопје се случиле 13 сообраќајни незгоди од кои четири со телесни повреди и девет со материјална штета.  Како што соопшти МВР, при сообраќајните незгоди девет лица се здобиле со лесни телесни повреди.

Шеесет и осум возачи се санкционирани бидејќи се движеле со поголема брзина од дозволената. Исто така, исклучени се и 12 возачи бидејќи девет го управувале возилото пред да се стекнат со право за управување моторно возило, двајца биле возачи почетници и еден го управувал возилото под дејство на алкохол. 11 возила се исклучени од сообраќај бидејќи 10 биле нерегистрирани и едно технички неисправно. Санкционирани се и тројца возачи кои поминале крстосница на црвено светло, двајца не дале првенство на минување на пешаци, тројца не носеле сигурносен појас и осум користеле мобилен телефон додека го управувале возилото.

Во однос на пешаците санкционирани се 11 пешаци кои поминале коловоз надвор од пешачки премин и седум кои поминале на црвено светло. Во текот на изминатиот ден издадени се 59 мандатни платни налози, додека исто така 62 возила се подигнати со „пајак”.