Водач на шестчлената група, која вчера беше уапсена за 324 килограми кокаин во Солун, е 40-годишниот Живко Бакиќ, поранешен фудбалер на „Црвена звезда“, објави српски „Блиц“.

Покрај него, уапсени се: А. М., Н. П., С. Ш., М. С. и С. С., поради постоење основано сомнение дека сториле кривични дела здружување за извршување кривични дела во врска со кривичното дело неовластено производство и пуштање во промет наркотични дроги.

Осомничените се обвинети за формирање организирана криминална група во Јужна Америка, Западна Европа, Република Грција и во Република Србија во 2020 и 2021 година со цел купување и пренесување поголема количина наркотична дрога кокаин преку океански бродови од Јужна Америка на територијата на Западна Европа и Република Србија заради пуштање во оптек и прибавување голема противправна имотна корист, пишува српски „Блиц“.

Но, и дека во наведениот временски период оваа организирана криминална група купила, пренела и задржала на продажба 324 килограми наркотична дрога кокаин, од Еквадор до пристаништето во Солун во Грција, каде што наведената наркотична дрога била запленета од грчката полиција.

Осомничените се приведени во полиција по што со кривична пријава ќе бидат изведени пред Јавното обвинителство за организиран криминал, објавија српските медиуми.

Хрватска смета дека е време да се преземат радикални мерки за заштита на хрватските граници и безбедноста на граѓаните поради големиот прилив на илегални мигранти.

Клубот на пратениците на хрватските суверенисти вчера објави дека со оглед на зголемениот прилив на илегални мигранти во Хрватска, што резултира со сè почести инциденти, крајно време е да се преземат радикални чекори за заштита на хрватските граници, како и безбедноста на хрватските граѓани во погранични области.

Во врска со последниот инцидент со илегалните мигранти, кога наводно се слушале истрели врз хрватската полиција на границата со Босна и Херцеговина, од оваа пратеничка група велат дека ова само покажува дека без радикални мерки проблемот со илегалните мигранти нема да се реши или барем да се намали.

Хрватскиот министер за внатрешни работи, Давор Божиновиќ, вчера соопшти дека се води кривична истрага за околностите на пукањето од територијата на Босна и Херцеговина.

Карловачката полиција претходно соопшти дека полицајците, кои спречиле група илегални мигранти да влезат во Хрватска, биле сведоци на истрели од огнено оружје на пограничната област во градот Корански Луг кај Раковица.

Од страната на БиХ, пак, немаше такви информации.

Премиерот на Албанија, Еди Рама, во врска со обвинувањата на Приштина кон Мирослав Лајчак рече дека тоа се работи што те оставаат без зборови.

Според него, ваквите потези предизвикуваат поголема штета наместо да ја подобрат состојбата наведувајќи дека патот што го избра Аљбин Курти не е патот што води до целта.

Во интервју за „Еј-би-си њуз“, Рама рече дека пристапот на Приштина ѝ помага на Србија бидејќи, според него, Србија станува жртва во очите на целата меѓународна заедница, пријателите и партнерите на Косово.

„Реакцијата на премиерот Курти пред неколку дена беше без преседан. Не се сеќавам на сличен случај, висок претставник на Косово директно да го обвини претставникот на ЕУ и да каже дека испратил писмо со жалба до официјалните лица, Шолц и Макрон. Тоа се работи што ве оставаат без зборови и дополнително му штетат на она што наводно се обидуваат да го поправат бидејќи теориите на заговор за соработката што ги откривте меѓу Србија и специјалниот пратеник на ЕУ не се нешто што е препорачливо да се прави“, рече Рама.

Не се сомнева, вели, желбата на Курти да го направи најдоброто за Косово, но никогаш не се доволни големата желба и добрата волја, потребна е стратешка визија за постигнување на целта, која тој овде не ја гледа.

На изјавата дека е малку парадоксално што Албанија претседава со Советот за безбедност, но е немоќна да влијае на Приштина, Рама одговара дека не сака да влијае на Приштина бидејќи постои влада што произлегува од волјата на народот, а има одговорност да го води Косово и да го избере патот до целта.

„Заклучокот е дека мислиме оти патот што го избраа не води до постигнување таа цел, туку води до судир со САД и ЕУ. Ова е тажно, но верувам дека е привремено“, рече Рама.

За него, извесно е дека тоа не го носи посакуваниот резултат за Косово, што е заокружување на процесот на нормализација, а потоа и излез од „ќор-сокакот на признавањето“, пред сè, меѓу земјите од ЕУ.

„Тоа е и целта на француско-германскиот план и тоа требаше да биде најголемото можно достигнување, а тоа би било де факто признавање од Србија, без разлика дали Србија формално ќе го признае Косово или не. Косово ќе има свое место, би се ослободило од товарот на конфликтот во продолжувањето на евроинтеграцискиот процес. ЕУ инсистира на процесот на нормализација бидејќи сакаат да го интегрираат Косово во целата структура на меѓународната организација и во самата Унија, која никогаш нема да се случи ако Косово не го реши овој проблем“, рече Рама.

На прашањето дали смета дека Србија има корист од ваквата состојба, вели дека е жално што пристапот на Приштина ѝ помага на Србија, а не на Косово, бидејќи ја виктимизира Србија во очите на целата меѓународна заедница.

„Србија игра игра бидејќи кратковидата политика на Приштина ѝ дава можност“, рече Рама.

На прашањето дали разговарал со украинскиот претседател за независноста на Косово, одговори дека „патот до конечното признавање на Косово минува низ Приштина“.

„Несомнено, разговаравме за тоа со претседателот Зеленски и за тоа во секое време разговараме со секој лидер кој претставува земја што не го признала Косово, но, од друга страна, ние сме многу јасни и убедени дека патот до конечното признавање на Косово не оди преку Украина или Гана, Нигерија, туку поминува низ самата Приштина, која мора да се потруди до крај да го искористи отворениот пат на голема можност создаден од француско-германскиот план, со поддршка на сојузниците, туку го поткопува со пристап што не го разбирам“, рече Рама.

Тој оцени и дека напорите на Србија и Русија повторно да се отвори прашањето за Косово во Обединетите нации се залудни.

Косово ја доби војната, вели тој, а Меѓународниот суд го потврди тоа.

„Ова се залудни пропагандни напори, но не водат никаде. Косово ја доби војната, Косово го потврди и самиот Меѓународен суд на правдата и тоа е неповратно. Поентата е дека Косово не е во состојба да освои мир, да го претвори мирот во добро, кое треба меѓународно да се потврди и да се развива во сите правци“, рече Рама.