Полицијата приведе 18 навивачи по инцидентите во салата „Јане Сандански“ каде имаше дерби во Првата македонска ракометна лига меѓу Вардар 1961 и Еурофарм Пелистер. По фрлањето на предмети на теренот, а потоа и судир меѓу групите, известен е и јавен обвинител.

„Известен е јавен обвинител и се преземаат дополнителни мерки и активности за расчистување на случајот по закон за спречување насилство на спортски натпревари“, велат од МВР за „Макфакс“.

По натпреварот, битолската навивачка група Чкембари, со шест автобуси и едно комбе заминаа од салата „Јане Сандански“. Вардар го совлада Пелистер. Долж булеварот беа распоредени униформирани полицајци и специјалци.

Натпреварот беше прекинат во 17-тата минута при резултат од 6-6, откако гостински навивачи при влегување во салата „Јане Сандански“ почнаа да фрлаат кон домашните навивачи со пиротехнички средства, на што возвратија навивачите на Вардар, кои влегоа на теренот фрлајќи со шишиња и тврди предмети.

Во рамките од петтото коло во ракометната Суперлига, Вардар на домашен терен во Скопје со 31:24 (13:10) славеше победа откако го победи Пелистер.

Најавата на Путин дека ќе распореди тактичко нуклеарно оружје во Белорусија предизвика загриженост низ цела Европа.

Оружјето што Путин го распоредува во Белорусија не е стратешко нуклеарно оружје, тоа не се интерконтинентални балистички ракети кои можат да го уништат животот на Земјата, пишува „Ал Џезира“.

Тактичкото нуклеарно оружје (TNW) се преносливи, нестратегиски нуклеарни боеви глави кои се користат за специфични тактички придобивки од првата линија. Аналитичарите го опишуваат тактичкото нуклеарно оружје како наменето за победа во битки, додека стратешкото оружје е наменето за победа во војни.

Тактичкото нуклеарно оружје има помала експлозивна моќ од стратешкото оружје, што би можело да ги направи воено покорисни и помалку политички неприфатливи, а со тоа и поголема е веројатноста да се користи. Иако тактичкото нуклеарно оружје има помала експлозивна моќ од стратешкото оружје, употребата на само една нуклеарна боева глава би имала катастрофални хуманитарни последици.

Атомската бомба што САД ја фрлија врз јапонскиот град Хирошима во 1945 година беше моќна околу 15 килотони и уби 140.000 луѓе. Тоа е со големина на едно од најмалите оружја во сегашниот руски арсенал.

Малкумина знаат точно колку TNW има Русија. Сепак, јасно е дека Русија има огромна нумеричка супериорност во однос на сојузниците на САД и НАТО кога станува збор за тактичкото нуклеарно оружје. Вашингтон верува дека Русија има околу 2.000 такви нуклеарни боеви глави, 10 пати повеќе од САД.

САД имаат околу 200 такви оружја, од кои половина се наоѓаат во базите во Европа. Овие нуклеарни бомби Б61, кои се движат од 0,3 до 170 килотони, се распоредени во шест воздушни бази низ Италија, Германија, Турција, Белгија и Холандија.

Според руската нуклеарна доктрина, рускиот претседател е крајниот одлучувач кога станува збор за употребата на руското нуклеарно оружје, без разлика дали е стратешко или тактичко. Таканаречената нуклеарна актовка е секогаш кај Владимир Путин.

Се верува дека такви актовки имаат и рускиот министер за одбрана Сергеј Шојгу и началникот на Генералштабот на руската армија Валериј Герасимов.

Актовката е поврзана со специјален комуникациски систем со кодно име „Кавказ“, кој поддржува комуникација меѓу високи владини претставници во моменти кога се носат одлуки за употреба на нуклеарно оружје. Ако Русија верува дека се соочува со стратешки нуклеарен напад, Путин би можел да користи актовка за да испрати директна наредба за лансирање до командата на Генералштабот, која ги има нуклеарните шифри.

Путин се закануваше на можноста за нуклеарна војна во изминатата година, речиси секој пат кога неговата воена операција во Украина ќе попушти. Тоа би можело да објасни зошто токму сега реши да распореди оружје во Белорусија.

Шест девојчиња загинаа, а други две лица се повредени во судир на меѓудржавниот пат во Тенеси.

До превртеното возило биле пронајдени телата на девојките на возраст од една до 18 години.

Се претпоставува дека од силината на ударот девојките биле исфрлени од автомобилот.

Жена, за која се верува дека исто така паднала од истото возило со девојчињата, била пронајдена во критична состојба.

Медиумите јавуваат дека во несреќата е повреден и маж, кој исто така е пренесен во болница.

Возачот на другиот автомобил кој учествувал во несреќата не е повреден.

Жртвите се уште не се идентификувани, а засега не е познато дали се во роднинска врска.

Истрагата траела цело утро, а причината за несреќата се уште не е позната.