Во товарно возило на регионалниот пат Демир Капија-Неготино биле откриени илегални мигранти, соопшти полицијата. Возачот не застанал на полицискиот знак и продолжил со движење а потоа запрел и го напуштил возилото, велат од МВР.

Настанот се случил вчера во 14.30 часот на регионалниот пат Демир Капија – Неготино, кога полициски службеници дале знак за запирање на товарно возило „цитроен џампер“, со скопски регистарски ознаки, но возилото продолжило со движење.

Набргу потоа, возачот го запрел возилото и го напуштил местото, а при преглед во возилото биле пронајдени 17 лица илегални мигранти.

Тие биле пренесени во Прифатниот центар „Винојуг“ во Гевгелија. Се преземаат мерки за расчистување на случајот, информираат надлежните.

Вчера во с.Вранешница, кичевско, полициски службеници од Полициската станица Кичево го лишиле од слобода 25-годишниот А.К, поради сомнение дека тој околу 20.30 часот во семејниот дом со остар предмет му нанел повреди на неговиот татко Ј.К.(48), од кои подоцна починал.

По преземени мерки било утврдено дека на случајот му претходела расправија и физичка пресметка во која Ј.К. со ловечка пушка му се заканил на А.К.

За случајот е запознаен Јавен обвинител, по чија наредба телото било дадено на обдукција.

При увидот, од просториите каде престојувал Ј.К. биле подигнати ловечка пушка „бокерица“ калибар 12х70 со 2 патрони во цевка, ловечки карабин со оптички нишан калибар 7,9мм, кутија со 13 патрони 12х70 и кутија со 10 парчиња боева муниција 7,9мм.

По целосно расчистување на случајот ќе биде поднесена соодветна пријава, известуваат надлежните.

Во скопската полиција вчера во утринските часови бил пријавен инцидент што се случил на булеварот Партизански одреди, а го предизвикало засега непознато лице, кое управувало електричен тротинет.

Како што информираат од МВР, тротинетот удрил во пешак – 63-годишна жена од Скопје, по што го напуштил местото на незгодата.

Од ударот жената добила тешки повреди, констатирани во Градската општа болница „8 Септември“.

На местото на настанот увид извршила екипа од СВР Скопје и се работи на расчистување на случајот.