Вчера во 20 часот, полициски службеници од СВР Куманово го лишиле од слобода 35-годишниот З.П. од Куманово, извести МВР.

При преглед кај него била пронајдена прашкаста материја, а потоа при претрес во неговиот дом, извршен со судска наредба, биле пронајдени монети и други метални предмети, за кои постои сомнение дека потекнуваат од кривично дело по член 265 од Кривичниот законик, соопшти МВР.

З.П. бил приведен во полициска станица и по целосно документирање на случајот против него ќе следува соодветна пријава.

Вчера, во 18.30 часот, во Скопје, во Старата скопска чаршија, инспектори од ОКР Центар и Бит-пазар при СВР Скопје го лишија од слобода 36-годишниот С. А. од Тетовско, кој претходните денови извршил кривични дела разбојништво во обложувачници и помали трговски објекти на територија на Скопје заканувајќи се со скалпел, извести МВР.

При преглед кај него се пронајдени скалпел и пари што потекнуваат од кривичните дела. Известен е јавен обвинител и по целосно расчистување на кривичните дела, против С. А. ќе биде поднесена кривична пријава, велат од МВР.

Вчера во Полициската станица Кочани, Б.С. од Кочани пријавил дека околу 18.10 часот, Б.Ѓ., М.Н. и уште едно лице, дошле пред неговата куќа и фрлале тврди предмети, при што го оштетиле неговото возило, а Б.Ѓ. влегол во дворот и ја нападнал неговата мајка.

Се преземаат мерки за расчистување на случајот.