Топ
Претставувајќи се како божји човек кој крши магии, скопјанец дошол до 400.000 евра од сопружници, барале помош за синот

Педесетчетиригодишен маж од селото Трубарево, скопско, е приведен поради сомнеж за измама, со што се стекнал со противправна имотна корист од околу 400.000 евра.
Според пријава поднесена во полицијата во Штип, од страна на Б.Д. (76) од Берово, во периодот од 2022 до 2025 година осомничениот Д.И. (54) со лажно прикажување на факти го довел во заблуда пријавителот и неговата сопруга М.Д. Притоа се претставувал како „Божји човек“ со наводни паранормални способности – бајач и истерувач на магии, тврдејќи дека над нивниот син е направена магија која го загрозува неговото здравје и живот.

Фото: МВР
Во тој контекст, оштетените во повеќе наврати на различни локации во Скопје и Берово му давале парични средства од 5.000 до 6.000 евра за помош, при што во вкупниот период пријавениот се стекнал со 400.000 евра.
По пријавата, полициски службеници од СВР Штип, во соработка со ОВР Берово, Одделот за криминалистичка полиција и СВР Скопје, а по насоки на јавен обвинител од ОЈО Кочани, спроведоа оперативни активности. Парите што оштетениот имал намера да му ги даде на осомничениот биле претходно крим-технички обработени.

Фото: МВР
На 4 јули во Берово биле приведени Д.И. и неговата мајка Д.И. (76). При претрес кај нив биле пронајдени 3.000 евра, како и други предмети поврзани со делото. По спроведените активности, против двете лица е поднесена кривична пријава и се изведени пред судија за претходна постапка во Основниот суд во Кочани.

Фото: МВР

Фото: МВР

Фото: МВР

Фото: МВР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Приведени осомничени за подметнување пожари, дел поврзани со опозицијата

Пратеникот на ВМРО-ДПМНЕ, Бране Петрушевски вели дека последните пожари што ја зафатија околината на Скопје, според досегашните информации, не биле резултат на несреќа или случајност, туку дел од намерна и координирана акција.
Тој рече дека Министерството за внатрешни работи пронашло јасни докази за подметнување, дрва натопени во бензин, ракавици и автомобилски гуми на неколку локации каде што избувнале пожари.
„Институциите веќе презедоа конкретни чекори – неколку лица се приведени, а според неофицијални информации, дел од нив се поврзани со опозициски партии, па дури и со функционери на опозицијата“, вели пратеникот.
Според него во јавноста веќе се отвори прашањето, дали целта на овие пожари била создавање хаос во главниот град?
„Она што се случуваше околу Скопје со пожарите не беше случајно. Станува збор за организирана акција од луѓе кои не му мислат добро ниту на Скопје, ниту на Македонија. Благодарение на брзата реакција на институциите, новата механизација и високо мотивираниот кадар, хаосот беше спречен“, изјави Петрушевски.
Тој посочи и на сомнежот за координирана политичка кампања.
„Веднаш по избивањето на пожарите, сведочевме на брзи реакции и соопштенија од страна на СДСМ и нивни блиски медиумски чинители. Се поставува прашањето, дали опозицијата се обиде да ги искористи пожарите за создавање политички наратив?“, праша Петрушевски.
Во моментов, истрагата е во тек, а јавноста очекува официјални детали од страна на МВР и обвинителството. Доколку се потврдат политичките поврзаности, ќе се отвори сериозно прашање за кривична и морална одговорност на вклучените.
Македонија
МВР потврдува: Роднината убил две лица, фрлил бомба и пукал кон полицијата, па се самоубил

Тешка трагедија го потресе Прилеп, откако тројца членови на едно семејство, меѓу кои и 13-годишно дете, беа пронајдени мртви со повреди од огнено оружје, во куќа на роднина во центарот на градот. Министерството за внатрешни работи потврди дека се работи за сериозен безбедносен инцидент, во кој било фрлено и експлозивно средство врз полициски службеници.
Настанот започнал во саботата вечер, околу 21:20 часот, кога во ОВР Прилеп, 43-годишната К.Ч. пријавила дека нејзиниот сопруг П.Ч. (43) и нивниот 13-годишен син се оддалечиле од домот, со сомнеж дека можеби заминале во куќата на нивниот роднина П.Ѓ. (62).
Полициски службеници веднаш се упатиле на посочената адреса, но никој не ја отворил вратата. По наредба од јавен обвинител, вратата била отворена со примена на сила. Во моментот кога полицијата влегла во објектот, едно лице фрлило рачна бомба кон нив. Бомбата почнала да чади, но, за среќа, не експлодирала.
Полициските службеници веднаш се повлекле од куќата, но одвнатре било пукано кон нив. Во размената на оган, полицијата возвратила со службено оружје.
Неколку часа подоцна, во 01:35 по полноќ, на местото на настанот пристигнала Итна медицинска помош, каде лекарите констатирале смрт кај тројца – таткото П.Ч., 13-годишниот малолетник и 62-годишниот роднина П.Ѓ.
Од Министерството за внатрешни работи соопштија дека се преземаат сите потребни мерки за целосно расчистување на случајот, а увидот на лице место е завршен во координација со јавен обвинител.
Македонија
ОЈО со детали за грозоморното убиство во Прилеп: Ги убил внукот и неговиот 11-годишен правук, па се самоубил

Обвинителството откри детали од вчерашната трагедија во Прилеп. Дежурен јавен обвинител од Основното јавно обвинителство Прилеп извршил увид во куќа лоцирана во центарот на градот, каде беа пронајдени телата на 11-годишно дете и двајца мажи на возраст од 43 и 63 години.
Според првичните сознанија од истрагата, трагедијата започнала поради семејни недоразбирања и нерешени имотно-правни односи. Како што информираат од обвинителството, 63-годишниот маж прво го убил својот внук од сестра и неговиот син, а потоа, откако оставил објава со објаснување на мотивите на социјалните мрежи, си го одзел животот.
„Издадена е наредба за обдукција на телата, како и за вештачење на сите трагите, оружјето и муницијата пронајдени на лице место“, соопштија од Јавното обвинителство, кое продолжува со истрагата за да ги потврди сите околности и детали поврзани со тројното убиство.
Детали за убиството во Прилеп открива и прилепскиот обвинител Стевчо Биновски.
„Таткото и синот отишле во куќата на вујкото на улицата „Стеван Апостолоски“ околу 15 до 16 часот. Освен вујкото немало никој друг во куќата. Инаку, претходно вујкото му ја препишал куќата на внукот. Не се знае што се случувало наредните часови само се знае дека таткото и 11-годишниот син биле убиени со пиштол пред да стигне полицијата околу 22 часот. Ова е утврдено зашто соседите слушнале истрели“, вели јавниот обвинител Стевчо Биноски.
Од Министерството за внатрешни работи засега нема официјални информации што точно се случило, како и потврда за шпекулациите дека убиецот пред да си го одземе животот пукал кон полицаец, како и дека фрлил експлозивна направа.